ប្រាក់ដុល្លារហក់ឡើងថ្លៃជាលើកដំបូងក្នុងឆ្នាំ២០២៥ ក្រោយធនាគារកណ្ដាលអាម៉េរិក សម្រេចរក្សាអត្រាការប្រាក់ឱ្យនៅដដែល

ប្រាក់ដុល្លារអាម៉េរិក បានហក់ឡើងថ្លៃប្រចាំខែប្រមាណ៣% នៅខែកក្កដា នេះ ដែលជាការហក់ឡើងថ្លៃប្រចាំខែដំបូងសម្រាប់ឆ្នាំ២០២៥ នេះ។ ការហក់ឡើងថ្លៃនេះ កើតមានឡើងក្រោយធនាគារកណ្ដាលអាម៉េរិក កាលពីថ្ងៃទី៣០ ខែកក្កដា បានសម្រេចរក្សាទុកអត្រាការប្រាក់ឱ្យនៅដដែល និងនៅពេលដែលការព្រួយបារម្ភអំពីពន្ធគយបានធូរស្រាល ក្រោយសហរដ្ឋអាម៉េរិក បានឈានដល់កិច្ចព្រមព្រៀងពាណិជ្ជកម្មថ្មីជាមួយប្រទេសនានា ជាបន្តបន្ទាប់។

ធនាគារកណ្តាលអាម៉េរិក បានរក្សាអត្រាការប្រាក់ឱ្យនៅដដែលដោយគ្មានការផ្លាស់ប្តូរក្នុងរង្វង់ចន្លោះពី៤,២៥% ទៅ៤,៥០% កាលពីថ្ងៃទី៣០ ខែកក្កដា ទោះបីជាប្រធានាធិបតីអាម៉េរិក លោក ដូណាល់ ត្រាំ បានអំពាវនាវម្ដងហើយម្ដងទៀតឱ្យធនាគារកណ្ដាលអាម៉េរិក បញ្ចុះអត្រាការប្រាក់ច្រើនយ៉ាងណាក្ដី។

ប្រធានធនាគារកណ្ដាលអាម៉េរិក លោក Jerome Powell បាននិយាយថា ធនាគារកណ្តាលអាម៉េរិក ត្រូវការទិន្នន័យបន្ថែមទៀតដើម្បីពិនិត្យផ្ទៀងផ្ទាត់ មុននឹងឈានដល់ការពិចារណាបញ្ចុះអត្រាការប្រាក់ ហើយបានសង្កត់ធ្ងន់ថា ការប្រយុទ្ធប្រឆាំងនឹងអតិផរណានៅតែជាអាទិភាពកំពូលដែលត្រូវដោះស្រាយមុនគេ គឺមិនមែនគិតតែពីបញ្ចុះអត្រាការប្រាក់តាមដែលលោក ដូណាល់ ត្រាំ ចង់បាននោះទេ។

ទិន្នន័យបង្ហាញថា សន្ទស្សន៍ប្រាក់ដុល្លារអាម៉េរិក បានស្ថិតនៅក្នុងរង្វង់ ៩៩,៦៧% ដែលជាកម្រិតខ្ពស់មិនធ្លាប់មានក្នុងពេលជិត២ខែមកនេះ ដោយសារតែទិន្នន័យមានការងារធ្វើ និងអតិផរណានៅលើទឹកដីសហរដ្ឋអាម៉េរិក មានភាពល្អប្រសើរ និងមួយទៀតដោយសារតែភាពមិនប្រាកដប្រជាក្នុងពិភពលោកត្រូវបានកាត់បន្ថយ៕

ដោយ: តែម សុខុម