សម្ដេចប៉ាប លីអុង ព្រមានថា ពិភពលោកនឹងជួបបញ្ហាធំ បើលោក អេឡុន ម៉ាស់ ក្លាយជា មហាសេដ្ឋីប្រាក់ខ្ទង់ទី្រលានដុល្លារមុនគេ

នៅក្នុងបទសម្ភាសផ្លូវការលើកដំបូងចាប់តាំងពីបានក្លាយជាសម្តេចប៉ាបនៅបុរីវ៉ាទីកង់ប្រទេសអ៊ីតាលី សម្តេចប៉ាប លីអុងទី១៤ បានមានបន្ទូលថា ការកើនឡើងប្រាក់បៀវត្សរ៍របស់នាយកប្រតិបត្តិអាចនឹងធ្វើឱ្យពិភពលោកជួបបញ្ហាធំ ដោយព្រះអង្គចង់សំដៅដល់លោក អេឡុន ម៉ាស់ ដែលគេរំពឹងថា នឹងក្លាយជាមហាសេដ្ឋីមានប្រាក់ខ្ទង់ទ្រីលានដុល្លារដំបូងគេនៅលើពិភពលោកឆាប់ៗនេះ។

សម្ដេចប៉ាបវ័យជិត៧០ឆ្នាំអង្គនេះ បានរិះគន់អំពីគម្លាតប្រាក់ចំណូលរវាងវណ្ណៈកម្មករ និងអ្នកមាន ដោយព្រះអង្គបានរិះគន់ខ្លាំងៗចំពោះនាយកប្រតិបត្តិក្រុមហ៊ុនផលិតរថយន្តអគ្គិសនី ថេស្លា អេឡុន ម៉ាស់ ថា វាជាគម្រូដ៏អាក្រក់ចំពោះការដំឡើងប្រាក់បៀវត្សរ៍ដល់នាយកប្រតិបត្តិ។ សម្ដេបប៉ាប លីអុង បានរំលឹកថា នាយកប្រតិបត្តិកាលពី៦០ឆ្នាំមុនមានប្រាក់បៀវត្សរ៍ច្រើនជាងកម្មកររហូតប្រមាណ៤ទៅ៦ដងប៉ុណ្ណោះ ប៉ុន្តែតួលេខដែលព្រះអង្គបានឃើញថ្មីៗនេះបង្ហាញថា ប្រាក់បៀវត្សរ៍របស់នាយកប្រតិបត្តិច្រើនជាងកម្មកររហូតដល់ទៅជាង៦០០ដងឯណោះ ដែលជាគម្លាតមួយធំខ្លាំងណាស់។

ការរិះគន់របស់សម្តេចប៉ាប ​ធ្វើឡើងចំពេលក្រុមប្រឹក្សាភិបាលរបស់ក្រុមហ៊ុន Tesla ស្នើសុំកញ្ចប់ប្រាក់បៀវត្សរ៍ចំនួន១ទ្រីលានដុល្លារសម្រាប់លោក ម៉ាស់ ពាក់ព័ន្ធនឹងសមត្ថភាពរបស់លោកក្នុងការធ្វើឱ្យតម្លៃក្រុមហ៊ុនរថយន្តអគ្គិសនីនេះកើនឡើង៨ដងនៅមួយទសវត្សរ៍ខាងមុខ ហើយកាលថ្ងៃទី១៥ កញ្ញា លោក ម៉ាស់ បានទិញភាគហ៊ុន Tesla ដែលមានតម្លៃ១ពាន់លានដុល្លារ ជាសញ្ញាមួយបង្ហាញថា លោកកំពុងជាប់គាំង៕

ដោយ៖ សុខ មង្គល