ក្រសួងឧស្សាហកម្មនិងពាណិជ្ជកម្មវៀតណាម បាននិយាយថា សំណើសុំបញ្ចុះតម្លៃអគ្គិសនីនេះ គឺក្នុងគោលបំណងជួយគាំទ្រដល់ជីវភាពរបស់ប្រជាពលរដ្ឋនិងក្រុមហ៊ុនអាជីវកម្ម ក្នុងអំឡុងពេលវិបត្តិវីរុសកូវីដ១៩នេះ។
យោងតាមសំណើនេះ ការបញ្ចុះតម្លៃអគ្គិសនី ១០% នឹងអនុវត្តចំពោះតម្លៃអគ្គិសនីសម្រាប់ផ្ទះប្រជាពលរដ្ឋដែលប្រើប្រាស់អស់ក្រោម ៣០០គីឡូវ៉ាត់ម៉ោង។ ចំណែកឯ ក្រុមហ៊ុនអាជីវកម្មក៏នឹងទទួលបានការបញ្ចុះតម្លៃ ១០% ផងដែរ នៅក្នុងអំឡុងម៉ោងប្រើប្រាស់ច្រើន ម៉ោងប្រើប្រាស់ធម្មតា និងម៉ោងមិនសូវមានការប្រើប្រាស់។ ដោយឡែក ទីកន្លែងស្នាក់នៅសម្រាប់អ្នកទេសចរណ៍ នឹងទទួលបាននូវការគិតតម្លៃដូចគ្នានឹងផ្ទះប្រជាពលរដ្ឋ និងក្រុមហ៊ុនផលិតកម្ម ផងដែរ។
គ្រឹះស្ថានដែលប្រើប្រាស់សម្រាប់ការដាក់អ្នកជំងឺកូវីដ១៩ឲ្យនៅដាច់ដោយឡែក សម្រាប់វិធានការចត្តាឡីស័ក ឬការព្យាបាល នឹងត្រូវលើកលែងពីការបង់ថ្លៃអគ្គិសនី ចំណែកឯគ្រឹះស្ថានដែលផ្ដល់ការពិនិត្យវេជ្ជសាស្ត្រ ការធ្វើតេស្ត និងការព្យាបាលអ្នកជំងឺដែលសង្ស័យ ឬដែលផ្ទុកវីរុសកូវីដ១៩ នឹងទទួលបានការបញ្ចុះតម្លៃ ២០% សម្រាប់ថ្លៃប្រើប្រាស់អគ្គិសនី។
អត្ថបទទាក់ទង
សណ្ឋាគារនិងផ្ទះសំណាក់ ដែលគេប្រើប្រាស់សម្រាប់ការដាក់ឲ្យនៅដាច់ដោយឡែកនៃអ្នកជំងឺកូវីដ១៩ ឬអ្នកដែលសង្ស័យផ្ទុកវីរុសនេះ ក៏ទទួលបានការបញ្ចុះតម្លៃ ២០% លើថ្លៃប្រើប្រាស់អគ្គិសនី ផងដែរ។
បើតាមការគណនា តម្លៃសរុបជាទឹកប្រាក់នៃវិធានការបញ្ចុះតម្លៃលើការប្រើប្រាស់អគ្គិសនីនេះ គឺជិត ៤៧០លានដុល្លារអាមេរិក ដែលក្នុងនេះ អាជីវកម្មនានាអាចនឹងសន្សំថវិកាពីការចំណាយលើថ្លៃអគ្គិសនីបាន ជាង ២៦២លានដុល្លារអាមេរិក; ផ្ទះប្រជាពលរដ្ឋទូទៅ នឹងកាត់បន្ថយចំណាយបាន ១២៥លានដុល្លារ; សណ្ឋាគារនិងផ្ទះសំណាក់នឹងកាត់បន្ថយចំណាយបាន ជាង ៧៧លានដុល្លារអាមេរិក និងគ្រឹះស្ថានផ្សេងៗទៀតដែលចូលរួមក្នុងការប្រយុទ្ធប្រឆាំងនឹងវីរុសកូវីដ១៩ នឹងសន្សំថវិកាបាន ៤,៣លានដុល្លារអាមេរិក៕
ប្រភព៖ VN Express International
