តើគោលនយោបាយពន្ធ កាត់បន្ថយកម្លាំងពលកម្ម និងការចំណាយរបស់លោក ត្រាំ អាចជះឥទ្ធិពលយ៉ាងណាដល់សេដ្ឋកិច្ចអាម៉េរិក?

ជាមួយនឹងភាពច្របូកច្របល់នៃការអនុវត្តគោលនយោបាយពន្ធគយ ការបញ្ឈប់ការងារមន្រ្តីរបស់រដ្ឋាភិបាល និងការបង្កកការចំណាយផ្សេងៗរបស់រដ្ឋបាល លោក ដូណាល់ ត្រាំ កំពុងបង្កការព្រួយបារម្ភកាន់តែខ្លាំងឡើងនៅក្នុងស្រទាប់មហាជននៅសហរដ្ឋអាម៉េរិក ដោយអ្នកខ្លះបានចោទជាសំណួរថា តើនៅក្នុងរយៈពេលដែលលោក ត្រាំ នៅបន្តដឹកនាំសេតវិមាននឹងមានគោលនយោបាយអ្វីទៀត ដែលអាចបង្កផលប៉ះពាល់ដល់សេដ្ឋកិច្ច។

តែយ៉ាងណាមកដល់ពេលនេះទីផ្សារការងារនៅសហរដ្ឋអាម៉េរិក នៅតែមានសុខភាពល្អជាមួយនឹងអត្រាគ្មានការងារធ្វើ៤,១% និងការងារថ្មីជាង១៥ម៉ឺននាក់ ត្រូវបានបន្ថែមនៅក្នុងខែកុម្ភៈ ប៉ុន្តែរបាយការណ៍មួយដែលចេញកាលពីថ្ងៃសុក្រ សប្តាហ៍មុនបានបង្ហាញថា ចំនួនអ្នកធ្វើការក្រៅម៉ោងបានកើនឡើងដល់ទៅ៤៦ម៉ឺននាក់ កាលពីខែមុន។ ក្នុងវិស័យទេសចរណ៍ និងបដិសណ្ឋារកិច្ចមានពលរដ្ឋជាង១ម៉ឺន៦ពាន់នាក់ បានបាត់បង់ការងារធ្វើ ហើយមន្រ្តីរដ្ឋាភិបាលជាង១ម៉ឺននាក់ទៀត ក៏បានបាត់បង់ការងារធ្វើផងដែរ។

លោក នីកូឡាស ប្លូម ( Nicholas Bloom ) អ្នកជំនាញសេដ្ឋកិច្ចនៅសកលវិទ្យាល័យ Stanford បានអះអាងថា ចាប់តាំងពីខែមករា មក សន្ទស្សន៍ភាពមិនប្រាកដប្រជានៃគោលនយោបាយសេដ្ឋកិច្ចបានកើនឡើង៤១%។ ស្ថិតក្នុងស្ថានភាពនេះ លោកមានការព្រួយបារម្ភកាន់តែខ្លាំងសម្រាប់សេដ្ឋកិច្ចអាម៉េរិក ក្នុងការធ្លាក់ចូលទៅក្នុងវិបត្តិ។ លើសពីនេះអ្នកជំនាញរូបនេះ មើលឃើញថា ភាពមិនច្បាស់​លាស់នៃគោលនយោបាយពន្ធរបស់លោក ត្រាំ អាចធ្វើឱ្យសេដ្ឋកិច្ចអាម៉េរិក ធ្លាក់ចូលទៅក្នុងវិបត្តិសេដ្ឋកិច្ចក្នុងរយៈពេល ៥ឆ្នាំខាងមុខនេះ។

តែយ៉ាងណាក៏ដោយ នៅក្នុងបទសម្ភាសមួយជាមួយសារព័ត៌មាន Fox News លោក ដូណាល់ ត្រាំ បានថ្លែងការពារគោលនយោបាយរបស់លោក ហើយបានស្តីបន្ទោសបញ្ហាព្រួយបារម្ភពីការធ្លាក់ចុះសេដ្ឋកិច្ច រួមទាំងការរំជើបរំជួលទីផ្សាភាគហ៊ុននៅពីរសប្តាហ៍ចុងក្រោយនេះ គឺដោយសារបញ្ហាសកលនិយម។

លោក ចន ស៊ីលវ៉ា (John Silvia) នាយកប្រតិបត្ក្រុមហ៊ុន Dynamic Economic Strategy ជឿជាក់ថា គោលនយោបាយពន្ធរបស់លោក ត្រាំ នឹងបានបង្កឱ្យអតិផរណាកើនឡើងខ្ពស់ កំណើនសេដ្ឋកិច្ចយឺត និងប្រាក់ដុល្លារអាម៉េរិកធ្លាក់ចុះ៕

ដោយៈ សរ សុជាតិ