ការបើកកិច្ចប្រជុំរវាងប្រទេសសម្ព័ន្ធមិត្តទាំង៣នេះ គឺបន្ទាប់ពីកូរ៉េខាងជើងនាពេលថ្មីៗនេះ បានបង្ហាញឫទ្ធិជាថ្មីទៀត ដោយបានបាញ់គ្រាប់មីស៊ីលរបស់ខ្លួនជាបន្តបន្ទាប់ ដែលវាបានបង្ហាញពីសារព្រមានមួយ ដល់ប្រទេសកូរ៉េខាងត្បូង ជប៉ុន និង អាមេរិក ដែលកំពុងមានបំណងចង់រួមគ្នាដាក់សម្ពាធទៅកូរ៉េខាងជើងឲ្យបោះបង់កម្មវិធីអាវុធនុយក្លេអ៊ែរបស់ខ្លួនចោល។
ប្រភពព័ត៌មានពី Reuters បានឲ្យដឹងថា កូរ៉េខាងជើងបានបាញ់គ្រាប់ស៊ីលចំនួន២គ្រាប់ចូលទៅក្នុងសមុទ្រក្បែរនឹងប្រទេសជប៉ុន កាលពីសប្ដាហ៍មុននេះ ដែលវាជាការបង្ហាញពីដំណើរការទៅមុខនៃកម្មវិធីផលិតអាវុធរបស់កូរ៉េខាងជើង និង កំពុងបង្កើនសម្ពាធទៅលើរដ្ឋបាលថ្មីរបស់អាមេរិកបន្ថែមទៀត នៅគ្រាដែលអាមេរិកកំពុងតែត្រួតពិនិត្យលើគោលនយោបាយរបស់កូរ៉ខាងជើង។
លោក Sulivan ទីប្រឹក្សាសន្ដិសុខសេតវិមានអាមេរិក នឹងជួបជាមួយនឹងអគ្គលេខាធិការសន្ដិសុខជាតិរបស់ជប៉ុន រួមទាំងទីប្រឹក្សាសន្ដិសុខជាតិរបស់កូរ៉េខាងត្បូងផងដែរ ដោយជំនួបនេះនឹងធ្វើឡើងនៅថ្ងៃសុក្រ ទី០២ ខែមេសា នៅលើទឹកដីសហរដ្ឋអាមេរិក។
អត្ថបទទាក់ទង
គួររំឭកបន្ដិចថា កូរ៉េខាងត្បូងកាលពីពេលថ្មីៗនេះ ទើបតែបានព្រមព្រៀងបង់ការចំណាយទៅឲ្យអាមេរិកប្រមាណ១ពាន់លានដុល្លារ ក្នុងមួយឆ្នាំ ចាប់ពីឆ្នាំ២០២២ ដល់២០២៥ ដើម្បីឲ្យអាមេរិកដាក់ទ័ពជាង២ម៉ឺន៨ពាន់នាក់ នៅកូរ៉េខាងត្បូងសម្រាប់ធ្វើជាខែលការពារពីការគំរាមកំហែងពីសំណាក់កូរ៉េខាងជើង ហើយការចំណាយនេះ គឺមានលើសកាលពីឆ្នាំមុនដល់ទៅប្រមាណ១៤%ឯណោះ។
ដោយឡែក ប្រទេសជប៉ុនវិញ នៅថ្ងៃទី ៣១ ខែមីនា ម្សិលមិញនេះ សភារបស់ជប៉ុន ក៏ទើបតែបានសម្រេចអនុម័តលើកិច្ចព្រមព្រៀងចំណាយរបស់ជប៉ុនទៅកាន់សហរដ្ឋអាមេរិក ដើម្បីឲ្យអាមេរិកបន្ដដាក់កងទ័ពនៅក្នុងទឹកដីជប៉ុនសម្រាប់រយៈពេល៥ឆ្នាំ ។ នេះបើតាមការរាយការណ៍ដោយសារព័ត៌មានជប៉ុន Kyodo។
ជប៉ុននឹងត្រូវចំណាយក្នុងមួយឆ្នាំប្រមាណជាង ១ពាន់៨រយលានដុល្លារទៅឲ្យអាមេរិក ប៉ុន្ដែការចំណាយនេះ ដូចទៅនឹងឆ្នាំមុនដែរ មិនមានឡើងថ្លៃដូចកូរ៉េខាងត្បូងនោះទេ។ អាមេរិកបច្ចុប្បន្ននេះ មានកងទ័ពជាង ៥ម៉ឺន៥ពាន់នាក់កំពុងឈរជើងនៅក្នុងប្រទេសជប៉ុន។
ខណៈដែល អាមេរិក កូរ៉េខាងត្បូង និងជប៉ុនកំពុងទំនាក់ទំនងស្អិតល្មួតឡើងនោះ ចិនឯណោះវិញហាក់កំពុងស្និទ្ធជាមួយកូរ៉េខាងជើងជាមុនដែរ ដោយថ្មីៗនេះ ចិន និងកូរ៉េខាងជើងបានប្រកាសនឹងបើកការធ្វើពាណិជ្ជកម្មជាមួយគ្នាឡើងវិញនៅពាក់កណ្ដាលខែមេសាខាងមុខនេះហើយ បន្ទាប់ពីប្រទេសទាំងពីរបានផ្អាកការធ្វើពាណិជ្ជកម្មជាមួយគ្នាមួយរយៈ ដោយសារតែបញ្ហាកូវីដ-១៩។ កូរ៉េខាងជើង ងាកមករកចិនកាន់តែខ្លាំងឡើងនេះ នៅចំពេលដែលចិន បច្ចុប្បន្នក៏កំពុងតែពាក់មុខយក្សដាក់គ្នាជាមួយនឹងប្រទេសលោកខាងលិច ពិសេសអាមេរិកនេះតែម្ដង៕
None
