នេះបើតាមការចេញផ្សាយរបស់សារព័ត៌មានធំៗជាច្រើន
ក្រុមហ៊ុន TikTok ដែលជាបុត្រសម្ពន្ធរបស់ក្រុមហ៊ុន ByteDance គ្រោងនឹងបិទប្រតិបត្តិការរបស់ខ្លួននៅលើទឹកដីអាម៉េរិក ដែលមានអ្នកប្រើប្រាស់ចំនួន១៧០លាននាក់ នៅថ្ងៃអាទិត្យចុងសប្ដាហ៍នេះ តាមការកំណត់របស់រដ្ឋាភិបាលសហព័ន្ធ ដោយបានបិទបញ្ចប់ការទាមទារឱ្យបើកដំណើរការឡើងវិញនៅនាទីចុងក្រោយ។
ទោះយ៉ាងណា កាសែត Washington Post បានរាយការណ៍កាលពីថ្ងៃពុធថា ប្រធានាធិបតីជាប់ឆ្នោតលោក ដូណាល់ ត្រាំ ដែលនឹងចាប់ផ្ដើមអាណត្តិរបស់លោកផ្លូវការនៅថ្ងៃចន្ទសប្ដាហ៍ក្រោយនេះ កំពុងពិចារណាចេញបទបញ្ជាអនុវត្តមួយ ដើម្បីផ្អាកការអនុវត្តការបិទកម្មវិធី TikTok នេះរយៈពេលពី៦០ទៅ៩០ថ្ងៃទៀត ប៉ុន្តែកាសែតនេះមិនបានបញ្ជាក់ថា តើលោកអាចធ្វើបែបនេះបានដោយស្របច្បាប់ក្នុងកម្រិតណានោះទេ។
ក្រុមអន្តរកាលរបស់លោក ត្រាំ មិនបានធ្វើអត្ថាធិប្បាយភ្លាមៗជុំវិញបញ្ហានេះទេ ប៉ុន្តែលោកត្រាំ បាននិយាយថា លោកគួរតែមានពេលវេលាបន្ទាប់ពីស្បថចូលកាន់តំណែងហើយ ដើម្បីបន្តរកដំណោះស្រាយនយោបាយនៃបញ្ហានេះ។ ចំណែកលោក ម៉ៃ វ៉ល់ (Mike Waltz) ទីប្រឹក្សាសន្តិសុខជាតិ របស់លោក ត្រាំ បានប្រាប់ Fox News កាលពីថ្ងៃពុធថា កម្មវិធី TikTok នេះជាវេទិកាដ៏អស្ចារ្យមួយ ដូច្នេះពួកគេនឹងរកវិធីរក្សាកម្មវិធីនេះ ប៉ុន្តែទាមទារឱ្យការពារទិន្នន័យរបស់អ្នកប្រើប្រាស់។
មន្ត្រីសេតវិមានម្នាក់បានអះអាងថា ប្រធានាធិបតីអាម៉េរិក លោក ចូ បៃដិន គ្មានបំណងធ្វើអន្តរាគមន៍រារាំងការហាមឃាត់នៅថ្ងៃចុងក្រោយនៃអាណត្តិរបស់លោកនោះទេ ប្រសិនបើតុលាការកំពូលមិនចាត់ការលើសំណុំរឿងនេះ ហើយបានបន្ថែមថា លោក បៃដិន ក៏មិនអាចធ្វើអន្តរាគមន៍តាមផ្លូវច្បាប់បានដែរចំពោះការមិនគោរពតាមផែនការដ៏គួរឱ្យទុកចិត្តពី ក្រុមហ៊ុន ByteDance ដើម្បីដកកម្មវិធី TikTok ។
ទោះបីជាយ៉ាងណា ក្រោយមកទូរទស្សន៍ NBC បានរាយការណ៍ថា រដ្ឋបាលលោក បៃដិន បានថ្លឹងថ្លែងជម្រើស ដើម្បីរក្សាកម្មវិធីនេះឱ្យបន្តរហូតដល់លើសថ្ងៃអាទិត្យដើម្បីទុកពេលឱ្យលោក ត្រាំ សម្រេចចិត្តឱ្យបានច្បាស់លាស់៕
អត្ថបទ៖ សុខ មង្គល
