ការធ្លាក់ចុះតម្លៃស្រូវ OM នៅមួយរយៈចុងក្រោយនេះកំពុងបង្កជាក្តីបារម្ភដល់កសិករដែលធ្វើស្រែដោយប្រើពូជប្រភេទនេះហើយត្រូវប្រមូលផលនៅដើមខែមករា នេះ ហើយបញ្ហានេះក៏កំពុងក្លាយជាវិញ្ញាសារដ៏លំបាកមួយសម្រាប់ភាគីពាក់ព័ន្ធក្នុងការដោះស្រាយផងដែរ។
ជាក់ស្តែងបើតាមការគូសបញ្ជាក់របស់ឯកឧត្តម យ៉ង សាំងកុមារ រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ក្រសួងកសិកម្ម កំពុងជជែកជាមួយរោងម៉ាស៊ីនកិនស្រូវក្នុងស្រុក ដើម្បីសិក្សាពីតម្រូវការ និងលទ្ធភាពទិញចូលរបស់រោងម៉ាស៊ីនទាំងនោះ ដើម្បីប្រមូលទិញស្រូវពីប្រជាកសិករ ដែលកំពុងជួបបញ្ហាធ្លាក់ថ្លៃ។ ជាមួយគ្នានេះ ក្រសួង ក៏កំពុងចុះសិក្សាពីបរិមាណប្រមូលផលរបស់ប្រជាកសិករក្នុង១ថ្ងៃៗផងដែរ។
ជាមួយគ្នានេះលោក បណ្ឌិត មាស នី អ្នកវិភាគបញ្ហាសង្កមយល់ឃើញថា រដ្ឋាភិបាលគួរតែពិនិត្យឡើងវិញនូវគោលនយាបាយទីផ្សារស្រូវ ក៏ដូចជាជួយស្វែងរកទីផ្សារថ្មីៗបន្ថែមទៀត ដើម្បីឱ្យប្រជាពលរដ្ឋមានច្រកកាន់តែច្រើនក្នុងការលក់ ជាជាងពឹងផ្អែកតែលើឈ្មួញវៀតណាម ព្រោះអាចឱ្យពួកគេកំណត់តម្លៃស្រេចតែចិត្ត ហើយពលរដ្ឋអាចនឹងឈប់ធ្វើស្រែបន្តទៀត។
អត្ថបទគួរអាន
ពាក់ព័ន្ធបញ្ហានេះដែរ លោក ច័ន្ទ សុផល ប្រធានមជ្ឈមណ្ឌលសិក្សាគោលនយោបាយ បានអះអាងថា ការធ្លាក់ចុះតម្លៃស្រូវ OM ដោយសារឈ្មួញវៀតណាម និងថៃ កាត់បន្ថយការទិញ មិនមែនដោយសារជិតចូលឆ្នាំចិន វៀតណាមទាំងស្រុងនោះទេ ពោលគឺដោយសារប្រទេសឥណ្ឌា ចាប់ផ្ដើមនាំចេញស្រូវ ហើយឥណ្ឌូនេស៊ី ផ្អាកនាំចូលដោយសារផលិតកម្មក្នុងស្រុកមានការកើនឡើង។ បើតាមការអះអាងរបស់អ្នកជំនាញរូបនេះ ស្រូវធ្លាក់ថ្លៃនេះមិនមែនកើតឡើងតែនៅកម្ពុជា នោះទេ ពោលគឺប្រទេសជាច្រើននៅលើពិភពលោកក៏កំពុងជួបបញ្ហានេះដែរ។
គួរបញ្ជាក់ថា ស្រូវដែលកំពុងថ្លៃមកនៅត្រឹមចន្លោះពី៦៨០រៀលទៅ៧០០រៀលក្នុងមួយគីឡូក្រាមនេះជាប្រភេទស្រូវ OM ដែលភាគច្រើនសម្រាប់នាំចេញទៅកាន់ប្រទេសវៀតណាម និងថៃ ខណៈប្រភេទស្រូវស្រង៉ែ និងស្រូវសែនក្រអូបជាដើម ដែលជាពូជស្រូវក្នុងស្រុកនៅតែមានតម្លៃខ្ពស់ដដែល បើធៀបនឹងឆ្នាំមុន។ ពាក់ព័ន្ធវិស័យស្រូវអង្ករនេះដែរ កាលពីពេលកន្លងទៅថ្មីៗ ក្រសួងកសិកម្ម រុក្ខាប្រមាញ់ និងនេសាទលើកទឹកចិត្តដល់កសិករឱ្យងាកមកប្រើប្រាស់ពូជស្រូវ ដែលផលិតក្នុងស្រុកដូចជាសែនក្រអូបជាដើម ដើម្បីបញ្ចៀសបញ្ហាពាក់ព័ន្ធនឹងទីផ្សារ និងតម្លៃ ដ្បិតស្រូវប្រភេទនេះមានទីផ្សារល្អ៕
អត្ថបទដោយ៖ ជា ម៉ារ៉ា
