នៅក្នុងសន្និសីទសារព័ត៌មានចម្រុះក្នុងស្រុករុស្ស៊ី អ្នកនាំពាក្យក្រសួងការបរទេសរុស្សីលោកស្រីម៉ារៀ ហ្សាខារ៉ូវ៉ា (Maria Zakharova) បានព្រមានចំៗថា ប្រទេសរុស្ស៊ីបានត្រៀមលក្ខណៈដើម្បី "អនុវត្តឲ្យសមស្រប" ប្រសិនបើលោកខាងលិចសម្រេចចិត្តប្រើប្រាស់ទ្រព្យសម្បត្តិរដ្ឋដែលជាប់គាំងរបស់រុស្ស៊ីនៅក្នុងប្រទេសពួកគេនោះ ដែលក្នុងនោះមានចំនួនប្រហែល ៣០០ ពាន់លានដុល្លារនៃទុនបម្រុងរូបិយបណ្ណបរទេសរបស់ធនាគារកណ្តាលរុស្សីផងដែរ។
លោកស្រីម៉ារៀ ហ្សាខារ៉ូវ៉ាបាននិយាយកាលពីថ្ងៃពុធថា "បើប្រទេសលោកខាងលិចយកទ្រព្យសម្បត្តិរុស្សីដែលបង្កកទាំងនោះទៅប្រើប្រាស់ រុស្សីនឹងចាត់ទុកទង្វើនោះជាការវាយប្រហារមួយ ដែលមិនអាចទទួលយកបាននិងខុសច្បាប់" ហើយវិមានក្រឹមឡាំងនឹងមានសិទ្ធិក្នុងការចាត់វិធានការសងសឹកវិញដោយខានមិនបាន ដើម្បីការពារផលប្រយោជន៍ជាតិរុស្សី"។
យ៉ាងណាមិញ មន្ត្រីកំពូលលោកខាងលិចមួយរូប និងជាប្រធានគោលនយោបាយការបរទេសរបស់សហភាពអឺរ៉ុបលោកចូសេព បូរែល (Josep Borrell) កន្លងទៅ បានស្នើឱ្យរឹបអូសយកទុនបម្រុងរុស្ស៊ីដែលបង្កកនៅក្នុងប្រទេសអឺរ៉ុប ក្នុងការជួយជាមូលនិធិ ដើម្បីកសាងសេដ្ឋកិច្ច និងស្ថាបនាប្រទេសអ៊ុយក្រែនក្រោយចប់សង្គ្រាមជាមួយប្រទេសរុស្សីផងដែរ។
អត្ថបទគួរអាន
លោកស្សី Zakharova អ្នកនាំពាក្យក្រសួងការបរទេសរុស្សី បានហៅចំណាត់ការរបស់លោកខាងលិចក្នុងការបង្កកទ្រព្យសម្បត្តិនេះថា ជាការរំលោភលើច្បាប់អន្តរជាតិយ៉ាងពិតប្រាកដ ដោយការបង្កកនេះធ្វើឡើងក្រោយទីក្រុងម៉ូស្គូបានបញ្ជូនទាហានរាប់ម៉ឺននាក់ចូលទៅក្នុងអ៊ុយក្រែននៅថ្ងៃទី ២៤ ខែកុម្ភៈ កន្លងទៅ។
ក្នុងនោះ អ្នកនាំពាក្យក្រសួងការបរទេសរុស្សីរូបនេះ បានគូសរំលឹកថា "រុស្សីមិនដែលភ្លេចអំពីទ្រព្យសម្បត្តិបរទេសរបស់ប្រទេសលោកខាងលិច អាជីវកម្មនានា និងប្រជាពលរដ្ឋ ដែលមានទីតាំងនៅលើទឹកដីនៃប្រទេសរុស្សីឡើយ"។
លោកស្រី Zakharova បានបន្ថែមថា ប្រសិនបើលោកខាងលិចបរាជ័យក្នុងការប្រកាន់ខ្ជាប់នូវគោលការណ៍ប្រជាធិបតេយ្យ សេដ្ឋកិច្ចបើកចំហ ទ្រព្យសម្បត្តិឯកជន និងឯករាជ្យភាពរបស់តុលាការនោះ «ទីក្រុងម៉ូស្គូនឹងមើលឃើញអំពីរឿងនេះ ហើយរុស្សីនឹងវាយបកវិញឲ្យបានសមស្របបំផុត»។
គួរជម្រាបថា ក្រុមហ៊ុនអន្តរជាតិជាច្រើន ដែលបានទីផ្សារប្រតិបត្តិការនៅក្នុងប្រទេសរុស្សី ដែលភាគច្រើនត្រូវបានបិទ និងបញ្ឈប់ប្រតិបត្តិការរបស់ខ្លួនក្រោយពីទទួលរងទណ្ឌកម្មរបស់ខាងលិច។ ហើយក្រុមហ៊ុនទាំងនោះមាន ក្រុមហ៊ុនប្រេងខ្នាតយក្ស BP (BP.L) ក្រុមហ៊ុនផលិតរថយន្តបារាំង Renault (RENA.PA) និងក្រុមហ៊ុនអាហារ McDonald'sជាដើម៕
អត្ថបទ៖ ហ៊ុន គន្ធថៃ
