លោកស្រី គុជ សុខម៉េង កសិករដាំថ្នាំជក់នៅស្រុកក្រូចឆ្មារ ខេត្តត្បូងឃ្មុំ បានគូសបញ្ជាក់ថា មកទល់ពេលនេះ ការប្រមូលផលថ្នាំជក់នៅតំបន់របស់លោកស្រី ស្ទើររួចរាល់ទាំងស្រុងហើយ ហើយក៏មានកសិករមួយចំនួនបានបង្វែរផ្ទៃដីដាំដំណាំពោត និងដំណាំផ្សេងទៀតផងដែរ។ បើតាមកសិកររូបនេះ បច្ចុប្បន្នថ្នាំជក់ត្រូវបានឈ្មួញចុះទិញដោយផ្តល់តម្លៃចន្លោះពី១ម៉ឺន១ពាន់រៀល ទៅ១ម៉ឺន២ពាន់រៀល ក្នុង១គីឡូក្រាម ពោលគឺអាស្រ័យលើគុណភាពរបស់ថ្នាំជក់។
ជាមួយគ្នានេះ លោក ធិ ឃាង ប្រធានភូមិទី៣ នៃឃុំរការខ្នុរ បានឱ្យដឹងថា ថ្នាំជក់ត្រូវបានឈ្មួញចុះទិញ និងឱ្យតម្លៃទៅតាមគុណភាព ខណៈកាលពីដើមដៃទទួលបានតម្លៃខ្ពស់ជាងពេលបច្ចុប្បន្ន។ យ៉ាងណាមិញមកទល់ពេលនេះ តម្លៃថ្នាំជក់ស្ថិតក្នុងចន្លោះពី១១០០០រៀលទៅ១១៥០០រៀល ក្នុង១គីឡូក្រាម ខណៈតម្លៃនេះត្រូវបានមេភូមិរូបនេះ អះអាងថា បានរួមចំណែកធ្វើឱ្យកសិករទទួលបានផលចំណេញ និងធ្វើឱ្យជីវភាពរបស់ពួកគេមានភាពប្រសើរមួយកម្រិតផងដែរ។ តាមរយៈតម្លៃថ្នាំជក់មានលំនឹងក្នុងរយៈពេល២ឆ្នាំជាប់ៗគ្នានេះ លោក ធិ ឃាង ជឿជាក់ថា នៅឆ្នាំក្រោយ ផ្ទៃដីដាំថ្នាំជក់អាចនឹងមានការកើនឡើងបន្ថែមទៀត ខណៈដំណាំក្រៅពីនេះពុំសូវមានទីផ្សារល្អដូចថ្នាំជក់នោះទេ។
ពាក់ព័ន្ធនឹងដំណាំថ្នាំជក់នេះដែរ លោក ហេង ពិសិដ្ឋ ប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តត្បូងឃ្មុំ បានគូសបញ្ជាក់ថា នៅឆ្នាំ២០២៥ នេះ ផ្ទៃដីដាំថ្នាំជក់នៅក្នុងខេត្តត្បូងឃ្មុំ មានចំនួន១,៧៦០ហិកតា មានការកើនឡើងប្រមាណ៣៤៥ហិកតា បើធៀបឆ្នាំ២០២៤ ខណៈបរិមាណផលទទួលបានក្នុងឆ្នាំនេះមានចំនួន៣,០៨០តោន កើនឡើងជាង៦០៥តោន។ បើតាមមន្រ្តីជំនាញកសិកម្មរូបនេះ តម្លៃទីផ្សារថ្នាំជក់ក្នុងឆ្នាំនេះធ្លាក់ចុះបន្តិច ប៉ុន្តែនៅតែផ្ដល់ផលចំណេញដល់កសិករ។
សូមបញ្ជាក់ថា ទីផ្សារនាំចេញថ្នាំជក់សំខាន់ៗរបស់កម្ពុជា រួមមានវៀតណាម ដោយបានស្រូបទាញថ្នាំជក់កម្ពុជា ចន្លោះពី៧០%ទៅ៨០% ប្រទេសចិន ចន្លោះពី២% ទៅ៥% និងទីផ្សារក្នុងស្រុកចន្លោះពី២០% ទៅ២៥%៕
អត្ថបទ៖ បូ ដូឡា
