សំណើនេះទំនងជាង សំណើដ៏ធំមួយសម្រាប់ស្ថាប័នអន្តរជាតិទាំងពីរ ដើម្បីបំពេញតាម ហើយក៏ទំនងជាពិបាកសម្រេចបានត្រឹមរយៈខ្លីនេះដែរ។ នេះបើតាមការចុះផ្សាយដោយទីភ្នាក់ងារសារព័ត៌មានរ៉យទ័រ។
រដ្ឋមន្ត្រីហិរញ្ញវត្ថុអាមេរិកលោកស្រី ចានិត យេលេន ក្នុងកិច្ចប្រជុំកាលពីថ្ងៃអង្គារជាមួយ មន្ត្រីជាន់ខ្ពស់ដទៃទៀតមកពី ក្រុមប្រទេសG7 និងមន្ត្រីរបស់ស្ថាប័នផ្តល់កម្ចីដទៃទៀត បានអំពាវនាវឱ្យធនាគារពិភពលោក និងស្ថាប័នអ្នកផ្តល់ហិរញ្ញវត្ថុផ្សេងទៀត កំណត់គោលដៅកៀរគរមូលធនឯកជនបន្ថែម សម្រាប់ផ្តល់ជំនួយដល់ប្រទេសក្រីក្រ ដែលកំពុងជួបការលំបាក ពីភាពមិនច្បាស់លាស់នៃសេដ្ឋកិច្ចបច្ចុប្បន្ន។
ក្រៅពីនោះ ក្រុមអង្គការសង្គមស៊ីវិល និងសូម្បីតែសមាជិកសភាអាមេរិកកំពុងអំពាវនាវឱ្យមានការបញ្ចេញទ្រព្យបម្រុងពីមូលនិធិរូបិយវត្ថុអន្តរជាតិជាលើកទីពីរ ដើម្បីជួយដល់ប្រទេសសមាជិក ដែលកំពុងជួបការលំបាក ដូចអ្វីដែលគេធ្លាប់ធ្វើកាលពីឆ្នាំមុន ដែលបានផ្តល់ប្រាក់សរុបប្រមាណ ៦៥០ពាន់លានដុល្លារ ដលប្រទេសដែលត្រូវការដើម្បីដោះស្រាយជាមួយវិបត្តិកូវីដ១៩ធ្ងន់ធ្ងរ។
អត្ថបទគួរអាន
ការអំពាវនាវដូចនេះធ្វើឡើងស្របគ្នានឹង IMF ក៏ដូចជា ធនាគារពិភពលោកកាលពីសប្តាហ៍មុន បានទាញសញ្ញាពី សម្ពាធកាន់តែខ្លាំងឡើងលើប្រទេសកំពុងអភិវឌ្ឍន៍ បណ្តាលមកពីអតិផរណា ថាមពលឡើងថ្លៃ និងកង្វះស្បៀងអាហារ ដែលបង្កឡើងដោយសង្រ្គាមរបស់រុស្ស៊ីនៅអ៊ុយក្រែន កំណើនសេដ្ឋកិច្ចយឺត ការកើនឡើងបញ្ហាបំណុល និងការកើនឡើងភាពងាយរងគ្រោះ ចំពោះការប្រែប្រួលអាកាសធាតុ។
ជាការឆ្លើយតប ប្រធានធនាគារពិភពលោក លោក David Malpass បាននិយាយនៅក្នុងកិច្ចប្រជុំមួយថា ធនាគាររបស់លោកនឹងប្រើប្រាស់ធនធាន ឧបករណ៍ហិរញ្ញវត្ថុ និងការធានារបស់ខ្លួនដើម្បីគៀគរហិរញ្ញវត្ថុពីវិស័យឯកជនកាន់តែច្រើនសម្រាប់ជំនួយប្រកបដោយគុណភាព និងនិរន្តរភាព។
ដោយឡែក មូលនិធិរូបិយវត្ថុអន្តរជាតិ IMF ថ្មីៗនេះក៏បានត្រៀមរៀបចំបង្កើតក្របខណ្ឌផ្តល់ប្រាក់កម្ចីថ្មីដែលមានភាពងាយស្រួលជាងមុន ដើម្បីជួយប្រទេសនានាក្នុងការដោះស្រាយវិបត្តិស្បៀងអាហារ ដែលបណ្តាលមកពីសង្រ្គាម។ ប៉ុន្តែនាយកគ្រប់គ្រង IMF លោកស្រី Kristalina Georgieva បាននិយាយថា ធនធានរបស់ IMF គឺមានកំរិត និងត្រូវមានបញ្ហាច្រើនសម្រាប់ការចំណាយ ដោះស្រាយ។ លោកស្រីអះអាងថា IMF មានធនធានប្រមាណ៧០០ពាន់លានដុល្លារ ដើម្បីទប់ទល់នឹងសេដ្ឋកិច្ចដែលមានកំណើនយឺត ស្របពេលដែលប្រទេសជាច្រើនទៀតប្រឈមនឹងសម្ពាធបំណុលកាន់តែខ្លាំង៕
