![វិស័យទេសចរណ៍](https://cdn.cambonomist.com/media/images/phnhvtschrrtptkks2222hhh.2e16d0ba.fill-960x540.jpg)
កាលពីថ្ងៃទី១ ខែមេសា ឆ្នាំ២០២៤ កន្លងទៅ ប្រទេសក្រិកបានដាក់ចេញកម្មវិធីផ្ដល់ទិដ្ឋាការឆាប់រហ័សនៅនឹងកន្លែងផ្ទាល់សម្រាប់ភ្ញៀវទេសចរតួកគី ហើយក្រោមកម្មវិធីនេះ ពលរដ្ឋតួកគី អាចទៅលេងកោះចំនួន១០របស់ប្រទេសក្រិក ដោយចូលក្នុង១លើកភ្ញៀវអាចស្នាក់នៅបានរហូតដល់ទៅ៧ថ្ងៃ។
យោងតាមគេហទំព័រ VisaGuide.World ឱ្យដឹងថា កត្តានេះបានបណ្តាលឱ្យចំនួនភ្ញៀវទេសចរតួកគី ដែលទៅលេងប្រទេសក្រិក កើនឡើងយ៉ាងគំហុក ខណៈពេលដែលបន្ទប់សណ្ឋាគារច្រើនរាប់មិនអស់នៅតាមរីហ្សតនានា ក្នុងប្រទេសតួកគី ទទេស្អាតគ្មានភ្ញៀវសោះ។ តំណាងខាងវិស័យទេសចរណ៍នៅប្រទេសតួកគី បានសម្តែងការព្រួយបារម្ភយ៉ាងខ្លាំងចំពោះស្ថានភាពស្ងាត់ភ្ញៀវនេះ ដោយមជ្ឈដ្ឋានខ្លះបានទាមទារឱ្យរដ្ឋាភិបាលលុបចោលកម្មវិធីផ្ដល់ទិដ្ឋាការឆាប់រហ័សបែបនេះ។
ការដាំក្បាលចុះយ៉ាងខ្លាំង នៃវិស័យទេសចរណ៍នេះបានបង្ខំឱ្យរីហ្សតនានាក្នុងប្រទេសតួកគី បញ្ចុះតម្លៃរហូតដល់ទៅ៥០% ចាប់ពីពាក់កណ្តាលខែកក្កដា មកដើម្បីទាក់ទាញភ្ញៀវទេសចររ៕
ដោយ: តែម សុខុម