បើតាមគម្រោងផែនការរាជរដ្ឋាភិបាលកម្ពុជាគ្រោងបើកទទួលភ្ញៀវទេសចរបរទេសចាក់វ៉ាក់សាំងកូវីដ-១៩ រួចនៅចុងឆ្នាំនេះ ហើយការបើកសាកស្បងនេះគ្រោងអនុវត្តដំបូងជាមួយភ្ញៀវទេសចរចិន។ នេះបើតាមការបញ្ជាក់កន្លងមករបស់សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា។
អគ្គនាយកក្រុមហ៊ុនអចលនទ្រព្យ CPL ឧកញ៉ា ចេង ខេង មើលឃើញពីចំណុចវិជ្ជមានចំពោះគម្រោងបើកទទួលភ្ញៀវទេសចរបរទេសចាក់វ៉ាក់សាំងកូវីដ-១៩ រួចនៅចុងឆ្នាំនេះ ក្នុងការចូលរួមចំណែកស្តារវិស័យអចលទ្រព្យនៅកម្ពុជា។ សម្រាប់អ្នកជំនាញអចលនទ្រព្យចាស់វស្សារូបនេះ ទោះបីការបើកទទួលភ្ញៀវទេសចរបរទេសដំណាក់កាលដំបូងជាលក្ខណៈសាកល្បង និងក្នុងទំហំប៉ុនណាក៏ដោយ តែវាជាចំណុចាប់ផ្តើមមួយដ៏ល្អក្នុងការផ្សព្វផ្សាយ និងទាក់ទាញវិនិយោគិនបរទេសឲ្យមកបោះទុនអភិវឌ្ឍន៍នៅកម្ពុជា។
ឧកញ៉ា ចេង ខេង បានជឿជាក់ថា ប្រសិនបើរាជរដ្ឋាភិបាលកម្ពុជាជ្រើសរើសយកខេត្តព្រះសីហនុធ្វើជាគោលដៅបើកសាកល្បងទទួលភ្ញៀវទេសចរបរទេសបានចាក់វ៉ាក់សាំងកូវីដ-១៩ រួចមែននោះ វានឹងជួយឲ្យវិស័យអចលនទ្រព្យក្នុងខេត្តនេះមានប្រជាប្រិយភាពមួយកម្រិតទៀតក្នុងការទាក់ទាញវិនិយោគិនបរទេសពិសេសជនជាតិចិន។ អ្នកជំនាញដែលមានបទពិសោធន៍ជាង ២៥ឆ្នាំនៅក្នុងវិស័យអចលនទ្រព្យរូបនេះ បានរំលឹកថា ពេលដែលកម្ពុជាបើកឲ្យវិនិយោគិនចិនចូលមកខេត្តព្រះសីហនុ ឃើញថា សំណង់ អគារខ្ពស់ៗលេចត្រដែតឡើងជាបន្តបន្ទាប់ ដែលធ្វើតម្លៃអចលទ្រព្យក្នុងខេត្តនេះឡើងថ្លៃខ្ពស់កប់ពពក។
អត្ថបទទាក់ទង
ជាមួយគ្នាដែរនេះលោក ច្រឹក សុខនីម ប្រធានសមាគមទីភ្នាក់ងារ និង វាយតម្លៃអចលនវត្ថុកម្ពុជាយល់ឃើញថា គម្រោងបើកទទួលភ្ញៀវទេសចរបរទេសបានចាក់វ៉ាក់សាំងកូវីដ-១៩ រួចនៅចុងឆ្នាំនេះ វាពុំទាន់អាចជួយជំរុញឲ្យមានចរន្តទិញលក់ក្នុងវិស័យអចលនទ្រព្យភ្លាមៗនោះទេ គ្រាន់តែចួលរួមចំណែកខ្លះៗប៉ុណ្ណោះក្នុងការផ្សព្វផ្សាយពីវិស័យមួយនេះ។ សម្រាប់អ្នកជំនាញរូបនេះ គម្រោងបើកនេះគ្រាន់តែជាវិញ្ញាសារ សាកល្បងក្នុងការឈានទៅបើកតំបន់ទេសចរណ៍ទាំងស្រុងតែប៉ុណ្ណោះ។
គួររំលឹកថា សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បានថ្លែងនាពេលថ្មីៗកន្លងមកនេះថា សម្តេចនឹងបើកតំបន់ទេសចរណ៍ទទួលភ្ញៀវទេសចរបរទេសបានចាក់វ៉ាក់សាំងរួចនៅចុងឆ្នាំ២០២១នេះ ដើម្បីជួយស្តារវិស័យទេសចរណ៍ និងសេដ្ឋកិច្ចកម្ពុជា ដែលរងផលប៉ះពាល់ដោយសារវិបត្តិកូវីដ-១៩។ សម្តេចបានគូសបញ្ជាក់បន្ថែមថា ការបើកទទួលទេសចរបរទេសដំណាក់កាលដំបូងនេះ គ្រោងអនុវត្តដំបូងជាមួយប្រទេសចិន។
បន្ថែមលើនេះ ប្រមុខដឹកនាំរាជរដ្ឋាភិបាលកម្ពុជាបានអះអាងថា រាជរដ្ឋាភិបាលនឹងបើកសកម្មភាពសេដ្ឋកិច្ច និងសង្គមឡើងវិញលើគ្រប់វិស័យ ប្រសិនបើក្នុងរយៈពេល១០ទៅ១៥ថ្ងៃក្រោយពិធីបុណ្យភ្ជុំបិណ្ឌពុំមានការផ្ទុះការឆ្លងរាលដាលនៃជំងឺកូវីដ-១៩ ហើយរក្សាស្ថានភាពដូចបច្ចុប្បន្ន។ បើតាមការប្រកាសរបស់ក្រសួងសុខាភិបាលនៅប៉ុន្មានថ្ងៃចុងក្រោយនេះអ្នកឆ្លងកូវីដ-១៩ នៅកម្ពុជាបានថយចុះមកនៅក្នុងរង្វង់ជាង២០០នាក់ និងស្លាប់ជាង២០នាក់ក្នុង១ថ្ងៃ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
