តើអ្នកជំនាញមានការរំពឹងបែបណាចំពោះចរន្តដើរលេងកម្សាន្តរបស់ភ្ញៀវទេសចរក្នុងឱកាសពិធីបុណ្យចូលឆ្នាំថ្មី?

លោកជំទាវ ឆាយ ស៊ីវលីន ប្រធានសមាគមទេសចរណ៍កម្ពុជា ជឿជាក់ថា នៅក្នុងឱកាសពិធីបុណ្យចូលឆ្នាំថ្មីប្រពៃណីខ្មែរខាងមុខនេះ នឹងមានប្រជាពលរដ្ឋកម្ពុជា ចេញដើរកម្សាន្តច្រើននៅតាមបណ្តាខេត្តក្រុងនានា ដូចជាខេត្តសៀមរាប បាត់ដំបង បន្ទាយមានជ័យ កំពង់ធំ និងខេត្តនៅភាគឦសាន និងខេត្តជាប់មាត់សមុទ្រជាដើម។ ការរំពឹងបែបនេះរបស់ប្រធានសមាគមរូបនេះ ក៏ដោយសារខេត្តទាំងនោះគ្រោងរៀបចំព្រឹត្តិការណ៍សង្រ្កាន្តឆ្នាំថ្មី ពិសេសព្រឹត្តិកាណ៍អង្គរសង្រ្កាន្តនៅខេត្តសៀមរាប តែម្តង។ បើតាមការអះអាងរបស់អ្នកជំនាញរូបនេះ មកទល់ពេលនេះមានភ្ញៀវទេសចរបរទេស និងប្រជាពលរដ្ឋខ្មែររស់នៅក្រៅប្រទេសបានកក់កញ្ចប់ដំណើរកម្សាន្តមកកម្ពុជា ជាបណ្តើរៗហើយ។

​​ស្រដៀងគ្នានេះ លោក ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិកប្រចាំនៅកម្ពុជា ជឿជាក់ថា នៅក្នុងឱកាសពិធីបុណ្យចូលឆ្នាំប្រពៃណីខ្មែរ នាពេលខាងមុខនេះ កម្ពុជានឹងទទួលបានភ្ញៀវទេសចរជាតិ និងអន្តរជាតិ ច្រើនជាងឆ្នាំមុនៗ។ ការរំពឹងបែបនេះ ក៏ដោយសារលោកកត់សម្គាល់ឃើញថា ការរៀបចំព្រឹត្តិកាណ៍អង្គរសង្រ្កាន្ត នៅខេត្តសៀមរាប និងតាមបណ្តាខេត្តមួយចំនួន ទទួលបានការទទួលស្គាល់កាន់តែទូលំទូលាយជាងមុន។ ម្យ៉ាងទៀតបញ្ហាគ្រោះរញ្ជួយដីនៅប្រទេសថៃ កាលពីពេលថ្មីៗនេះ ក៏ជាកត្តារួមចំណែកជំរុញឱ្យមានកំណើនភ្ញៀវទេសចរផងដែរ ដ្បិតថា ប្រជាពលរដ្ឋមួយចំនួនបានជ្រើសរើសការដើរកម្សាន្តក្នុងស្រុកជំនួសឱ្យការចេញទៅក្រៅប្រទេស។

​យ៉ាងណាមិញ លោកជំទាវ ឆាយ ស៊ីវលីន បានវាយតម្លៃថា តាមរយៈការចេញដើរកម្សាន្តរបស់ប្រជាពលរដ្ឋ និងភ្ញៀវទេសចរបរទេសនៅកម្ពុជា នាឱកាសពិធីបុណ្យចូលឆ្នាំថ្មីនេះ ចង់ ឬមិនចង់វានឹងរួមចំណែកជួយជំរុញសាច់ប្រាក់ក្នុងចរន្តសេដ្ឋកិច្ចនៅតាមមូលដ្ឋាន ពិសេសសម្រាប់អ្នកប្រកបអាជីវកម្ម និងសេវាកម្មក្នុងវិស័យទេសចរណ៍។ គួរជម្រាបថា ពិធីបុណ្យចូលឆ្នាំថ្មីប្រពៃណីខ្មែរឆ្នាំនេះ នឹងប្រព្រឹត្តទៅរយៈពេល៣ថ្ងៃ ចាប់ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៥៕