ប្រការនេះត្រូវបានសមាជិកសភាអាមេរិក ជំរុញឱ្យមានសកម្មភាពកាន់តែខ្លាំងជាងនេះទៀត ប្រឆាំងនឹងទីក្រុងប៉េកាំង ដែលបានជ្រោមជ្រែងដល់ទីក្រុងម៉ូស្គូសម្រាប់ការធ្វើសង្គ្រាមដ៏ក្ដៅគគុកនៅអ៊ុយក្រែននោះ។
ក្រសួងការហិរញ្ញវត្ថុ និងក្រសួងការបរទេសរបស់អាមេរិកបានចេញមកទម្លាយពីសកម្មភាពមួយចំនួនដែលក្រុមហ៊ុនចិនបានចូលដៃចូលជើងជួយរុស្ស៊ីធ្វើសង្គ្រាមនៅអ៊ុយក្រែន។ ការទម្លាយនេះ គឺធ្វើឡើង នៅស្របពេលដែល កាលពីសប្តាហ៍មុនសេតវិមានអាមេរិកក៏ទើបនឹងកំណត់ក្រុមទាហានស៊ីឈ្នួល Wagner ជាអង្គការឧក្រិដ្ឋកម្មឆ្លងដែនរបស់រុស្ស៊ីផងដែរ។
រដ្ឋមន្ត្រីការបរទេសអាមេរិកលោក Antony Blinken បាននិយាយនៅក្នុងសេចក្តីថ្លែងការណ៍មួយថាទណ្ឌកម្មថ្មីៗនឹងទៅរារាំងបន្ថែមទៀត ដល់សមត្ថភាពរបស់វិមានក្រឹមឡាំង ក្នុងការបំពាក់បំប៉នសព្វាវុធរបស់ខ្លួននៅក្នុងការធ្វើសង្គ្រាមនៅអ៊ុយក្រែន ដែលបណ្តាលឱ្យមានការស្លាប់ និងការបំផ្លិចបំផ្លាញយ៉ាងក្រៃលែង។
គួរជម្រាបថា ក្នុងចំណោមក្រុមហ៊ុនដែលកំណត់គោលដៅនោះ គឺមានក្រុមហ៊ុនស្រាវជ្រាវលំហអាកាស និងបច្ចេកវិទ្យាឆាងសា (Changsha Tianyi Space Science and Technology Research Institute) ដែលជាក្រុមហ៊ុនរបស់ចិន។ មន្ត្រីក្រុងវ៉ាស៊ីនតោនបានឱ្យដឹងថា ក្រុមហ៊ុននេះបានផ្តល់រូបភាពផ្កាយរណបពីលើប្រទេសអ៊ុយក្រែន ឱ្យទៅក្រុមទាហានស៊ីឈ្នួលរបស់រុស្ស៊ី។
អត្ថបទគួរអាន
សេចក្តីថ្លែងការណ៍មួយរបស់ក្រសួងហិរញ្ញវត្ថុអាមេរិក បានប្រកាសដាក់ទណ្ឌកម្មលើក្រុមហ៊ុនបុត្រសម្ព័ន្ធរបស់ក្រុមហ៊ុនចិននេះ មានមូលដ្ឋាននៅឯប្រទេសលុចសំបួរ។ សេចក្ដីថ្លែងការណ៍ដដែលនេះ បានបញ្ជាក់ថា អាមេរិកនឹងធ្វើឱ្យពួកគេដឹងខ្លួនថា អាមេរិកមិនមែនមិនដឹងអំពីការរំលោភបំពានរបស់ក្រុមហ៊ុនចិន លើវិធានការនៃការដាក់ទណ្ឌកម្មរបស់វ៉ាស៊ីនតោននោះទេ។
សមាជិកព្រឹទ្ធសភាអាមេរិកបានអំពាវនាវឱ្យរដ្ឋបានលោក បៃដិន គិតគូរលើការដាក់ទណ្ឌកម្មប្រឆាំងនឹងប្រទេសចិនតែម្តង ប្រសិនប្រទេសនេះមិនព្រមទប់ស្កាត់ការបញ្ចេញបច្ចេកវិទ្យារបស់ខ្លួន និងកម្មវិធីយោធាផ្សេងទៀតទៅឱ្យរុស្ស៊ីទេនោះ។
នេះមិនមែនជាលើកទីមួយទេចំពោះការដាក់ទណ្ឌកម្មលើក្រុមហ៊ុន ដែលពាក់ព័ន្ធនឹងសង្គ្រាមឈ្លានពានរបស់រុស្ស៊ី នៅអ៊ុយក្រែន។ ក្រុមហ៊ុនអាកាសចរណ៍ដែលមានមូលដ្ឋាននៅប្រទេសអារ៉ាប់រួម Kratol ត្រូវបានចោទថា បានផ្តល់យន្តហោះសម្រាប់ក្រុមទាហាន Wagner ប្រើប្រាស់ និងដឹកឧបករណ៍យោធារវាងសាធារណរដ្ឋអាហ្វ្រិកកណ្តាលដូចជាប្រទេសលីប៊ី និងម៉ាលី សម្រាប់ក្រុមនេះផងដែរ។
សូមរំឭកបន្តិចថា ក្រុមទាហានស៊ីឈ្នូល Wagnerរបស់រុស្ស៊ី ដែលដឹកនាំដោយលោក យីវជីននី ព្រីហ្គូស៊ីន (Yevgeny Prigozhin) ត្រូវបានគេស្គាល់ថា ជាមនុស្សជំនិតមួយរបស់លោក ពូទីន ដែរនោះ បាននិងកំពុងចូលខ្លួនក្នុងសង្គ្រាមនៅអ៊ុយក្រែនយ៉ាងសកម្ម។ ក្រុមទាហានេះ ត្រូវបានជ្រើសរើសចេញពីអ្នកទោសរុស្ស៊ី ដើម្បីទៅប្រយុទ្ធដោះដូរនឹងការលើកលែងទោស។ បើតាមសេតវិមានក្រុមទាហានស៊ីឈ្នួលទាំងនេះ មានកម្លាំងប្រហែល ៥ម៉ឺននាក់ ដែលកំពុងប្រយុទ្ធក្នុងប្រទេសអ៊ុយក្រែន ហើយ ៨០% នៃពួកគេត្រូវបានរើសចេញពីពន្ធនាគារ៕
