យោងតាមរបាយការណ៍ ចំនួនជនជាតិចិន ដែលជាប់ក្នុងចំណាត់ថ្នាក់ជាអ្នកមានទ្រព្យសម្បត្ដិច្រើន នោះ មានរហូតដល់ទៅ ១០០ លាននាក់ ក្នុងចំណោម ១០% នៃចំនួនប្រជាជនមានទ្រព្យច្រើនបំផុតទូទាំងសកលលោក ធៀបនឹងទៅនឹងសហរដ្ឋអាមេរិកវិញ មានចំនួនប្រជាជន ដែលជាអ្នកមានទ្រព្យសម្បត្តិច្រើន ត្រឹមតែ ៩៩ លាននាក់។
របាយការណ៍បានគូសបញ្ជាក់ថា ការផ្លាស់ប្តូរយ៉ាងឆាប់រហ័សរបស់ប្រទេសចិន ពីប្រទេសមានការផ្លាស់ប្តូរការីកចម្រើន ទៅជាសេដ្ឋកិច្ចទីផ្សារពេញលេញ បានជួយឲ្យប្រទេសនេះ បង្កើតបាននូវចំនួនប្រជាជនមានទ្រព្យសម្បត្តិធូរធាកាន់តែច្រើនឡើង ទោះបីជាសេដ្ឋកិច្ចសកលកំពុងថមថយល្បឿន និងការកើនឡើងនៃភាពតានតឹងផ្នែកពាណិជ្ជកម្មក៏ដោយ។
អត្ថបទទាក់ទង!
អ្នកដែលអាចចាត់ទុកថាជាអ្នកមាន នៅក្នុងចំណោម អ្នកមានទ្រព្យច្រើនបំផុត ១០% នៃអ្នកមានបំផុតទូទាំងសកលលោកនោះ ត្រូវតែមានប្រាក់សន្សំផ្ទាល់ខ្លួន ចំនួន ១០៩.៤៣០ ដុល្លារអាមេរិក។
ទោះបីជាត្រូវ ឈរនៅពីក្រោយចិន ក្នុងនាមជាប្រទេសមានចំនួនប្រជាជនច្រើនបំផុត ដែលជាអ្នកមាន ក៏ដោយ ប៉ុន្ដែ អាមេរិក នៅតែជាប្រទេស ដែលមានចំនួនសេដ្ឋីប្រាក់លានដុល្លារ មានប្រមាណ៤០% នៃចំនួនសេដ្ឋីប្រាក់លានដុល្លារ ទូទាំងពិភពលោក។ មានន័យថា អាមេរិក នៅតែជាប្រទេសដែលមានកំពូលអ្នកមាន ច្រើនដដែល។
ចំនួន មហាសេដ្ឋីប្រាក់លានដុល្លារអាមេរិក នៅសហរដ្ឋអាមេរិក បានកើនឡើង ៦៧៥.០០០ នាក់ គិតត្រឹម ពាក់កណ្ដាលឆ្នាំ២០១៩ ធ្វើឲ្យចំនួន សេដ្ឋីប្រាក់លានដុល្លារ របស់អាមេរិក កើនឡើងដល់ទៅ ១៨,៦ លាននាក់។ មានន័យថា មានមនុស្សពេញវ័យម្នាក់ ក្នុងចំណោមមនុស្សពេញវ័យ១៤នាក់ គឺជាសេដ្ឋីប្រាក់លានដុល្លារ។ នេះបើតាមការអះអាងនៅក្នុងរបាយការណ៍ របស់ ស្ថាប័ន Credit Suisse។ ទន្ទឹមនឹងនេះ នៅឯប្រទេសចិនវិញ មានចំនួនប្រជាជន តែប្រមាណ ៤,៤ លាននាក់ប៉ុណ្ណោះ ដែលជាសេដ្ឋីប្រាក់លានដុល្លារ។
អត្ថបទគួរអាន!
តាមការប៉ាន់ស្មានរបស់របាយការណ៍ ដដែលនេះ បានបញ្ជាក់ថា នៅពាក់ណ្ដាលឆ្នាំ២០១៩ មានសេដ្ឋីប្រាក់លានដុល្លារនៅទូទាំងពិភពលោកចំនួន ៤៦,៨លាននាក់។ ក្នុងនោះ អាមេរិក មានចំនួនសេដ្ឋីប្រាក់លានដុល្លារ ច្រើនជាងគេបង្អស់ ដែលមាន រហូតដល់ជាង ១៨,៦ លាននាក់ បន្ទាប់មកគឺចិន មាន ៤,៤ លាននាក់ ជប៉ុន មាន ៣ លាននាក់ ចក្រភពអង់គ្លេស មានប្រមាណ២,៥ លាននាក់ អាល្លឺម៉ង់ មាន ២,២ លាននាក់ និង បារាំង មាន២លាននាក់៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
