មេដឹកនាំអាម៉េរិក និងរុស្ស៊ី អាចនឹងជួបពិភាក្សាគ្នាលើបទឈប់បាញ់នៅអ៊ុយក្រែន ក្នុងសប្តាហ៍នេះ

លោក ស្ទីវ វិតខុហ្វ (Steve Witkoff) បេសកជនពិសេសរបស់លោក ដូណាល់ ត្រាំ បានប្រាប់អ្នកសារព័ត៌មានក្រោយវិលត្រឡប់ពីទីក្រុងម៉ូស្គូ ថា ប្រធានាធិបតីអាម៉េរិក អាចនឹងជួបជជែកជាមួយសមភាគីរុស្ស៊ី លោក វ៉្លាឌីមៀ ពូទីន នៅសប្តាហ៍នេះ ដើម្បីស្វែងរកវិធីសាស្ត្រក្នុងការបញ្ចប់សង្រ្គាមដ៏អូសបន្លាយនៅអ៊ុយក្រែន។ បេសកជនរូបនេះ បានបង្ហាញសុទិដ្ឋិនិយមថា ការពិភាក្សារវាងលោក ត្រាំ និងលោក ពូទីន អាចនឹងមានភាពវិជ្ជមានច្រើន។

ប្រធានាធិបតីអាម៉េរិក លោក ដូណាល់ ត្រាំ នៅពេលនេះ កំពុងព្យាយាមបញ្ចុះបញ្ចូលឱ្យលោក ពូទីន គាំទ្រសំណើបទឈប់បាញ់រយៈពេល៣០ថ្ងៃ ផ្តួចផ្តើមដោយខ្លួន ដែលអ៊ុយក្រែន បានគាំទ្រកាលពីសប្តាហ៍មុន ខណៈរុស្ស៊ី និងអ៊ុយក្រែន កំពុងវាយប្រហារគ្នាតាមផ្លូវអាកាស ស្របពេលទីក្រុងម៉ូស្គូ កំពុងសម្រុកការបាញ់ប្រហារនៅលើដីគោក ដើម្បីបណ្តេញកងកម្លាំងអ៊ុយក្រែន ចេញពីទីតាំង ដែលខ្លួនធ្លាប់ឈរជើងនៅក្នុងតំបន់ ឃឺស (Kursk ) ភាគខាងលិចប្រទេសរុស្ស៊ី។

ពាក់ព័ន្ធនឹងសំណើបទឈប់បាញ់រយៈពេល៣០ថ្ងៃខាងលើ លោក ពូទីន ក៏បានបង្ហាញជំហរគាំទ្រផងដែរ តែភ្ជាប់ជាមួយលក្ខខណ្ឌជាច្រើន ហើយចំណុចមួយដែលរុស្ស៊ី អាចនឹងប្រឆាំងខ្លាំងនោះ គឺពាក់ព័ន្ធនឹងវត្តមានកងទ័ពរក្សាសន្តិភាពមកពីអឺរ៉ុប ឬអាម៉េរិក នៅអ៊ុយក្រែន។

ជុំវិញបញ្ហានេះ ប្រធានាធិបតីបារាំងលោក អេម៉ានូអែល ម៉ាក្រុង បាននិយាយនៅក្នុងបទសម្ភាស​មួយថា ការបោះទីតាំងកងទ័ពរក្សាសន្តិភាពនៅប្រទេសអ៊ុយក្រែន ដែលបានស្នើឡើងដោយអង់គ្លេស និងបារាំង ជាផ្នែកមួយនៃកិច្ចព្រមព្រៀងបទឈប់បាញ់ជាមួយរុស្ស៊ី។ លោក ម៉ាក្រុង បាននិយាយនៅក្នុងបទសម្ភាស​ជាមួយកាសែតក្នុងតំបន់ជាច្រើនរបស់បារាំងថា អ៊ុយក្រែន ជារដ្ឋអធិបតេយ្យភាព ហើយអ៊ុយក្រែន មានសិទ្ធិស្វ័យសម្រេចលើកិច្ចការនេះ។

អ្នកវិភាគបានលើកឡើងថា ប្រទេសរុស្ស៊ីនឹងបន្តច្រានចោលពាក់ព័ន្ធនឹងការអះអាងរបស់លោក ម៉ាក្រុង ដោយសារតែរុស្ស៊ី មិនចង់ឲ្យមានការសម្រេចចិត្តណាមួយឆ្លងកាត់តាមយន្តការអឺរ៉ុប ឬណាតូ ហើយម្យ៉ាងវិញទៀតដើមចមដែលរុស្ស៊ី យកជាលេសលុកលុយអ៊ុយក្រែន ក៏មានទំនាក់ទំនងនឹងការដែលអ៊ុយក្រែន ប៉ុនប៉ងចង់ក្លាយជាសមាជិតអង្គការណាតូនេះដែរ៕

ដោយៈ សរ សុជាតិ