លោក ត្រាំ ពិចារណាដាក់ទណ្ឌកម្មថ្មីៗលើរុស្ស៊ី និងហៅលោក ពូទីន ថាជាមនុស្សឆ្កួត ក្រោយរុស្ស៊ីបើកការវាយប្រហារយ៉ាងសាហាវលើអ៊ុយក្រែន

ការប្រកាសក្ដែងៗរបស់លោក ដូណាល់ ត្រាំ បានបង្ហាញពីការមួរម៉ៅក្ដៅចិត្តនឹងលោក ពូទីន កាន់តែខ្លាំង ហើយក៏បានធ្វើឱ្យដំណើរការចរចាបទឈប់បាញ់សម្រាប់អ៊ុយក្រែន ត្រូវជាប់គាំងផងដែរ។

លោក ដូណាល់ ត្រាំ បានលើកឡើងថា លោកមិនសប្បាយចិត្តទាល់តែសោះចំពោះអ្វីដែលលោក ពូទីន កំពុងធ្វើ ពោលគឺកំពុងសម្លាប់មនុស្សជាច្រើន ហើយលោកមិនដឹងថាលោក ពូទីន កើតអីនោះទេបានជាបែបនេះ។

ក្រោយមកនៅថ្ងៃទី២៥ ឧសភា លោក ដូណាល់ ត្រាំ បានបង្ហោះលើបណ្ដាញទំនាក់ទំនងសង្គម Truth Social ថា លោក ពូទីន ពិតជាឆ្កួតមែនទែនហើយ។

លោក ត្រាំ បានអះអាងថា លោកតែងតែងនិយាយរហូតមកហើយថា លោក ពូទីន មានមហិច្ឆតាធំចង់បានទឹកដីអ៊ុយក្រែនទាំងមូល គឺមិនត្រឹមតែចង់បានមួយចំណែកនោះទេ ហើយវាប្រហែលជាបែបនេះមែន។ ទន្ទឹមនឹងនេះ លោក ត្រាំ បានព្រមានថា ប្រសិនបើលោក ពូទីន ពិតជាធ្វើបែបនេះមែន នោះវានឹងនាំទៅរកការដួលរលំនៃប្រទេសរុស្ស៊ី ជាក់ជាមិនខាន៕

ដោយ: តែម សុខុម