ម៉ាឡេស៊ី ត្រៀមរៀបចំកិច្ចប្រជុំជាង៣០០ ពេលខ្លួនធ្វើជាប្រធានប្តូរវេនអាស៊ាននៅឆ្នាំនេះ
ក្នុងនាមជាប្រធានប្តូរវេនកិច្ចប្រជុំកំពូលអាស៊ាននៅឆ្នាំនេះ ម៉ាឡេស៊ីបានត្រៀមរៀបចំកិច្ចប្រជុំរហូតដល់ទៅ៣០០ ក្នុងនោះកិច្ចប្រជុំ ដែលនឹងបើកសម្ភោធ…
លោក ដូណាល់ ត្រាំ ប្រធានាធិបតីជាប់ឆ្នោតរបស់សហរដ្ឋអាម៉េរិក បានធ្វើឱ្យពិភពលោកមានការភ្ញាក់ផ្អើលជាថ្មី បន្ទាប់ពីលោកបានបង្ហោះសារនៅលើបណ្តាញសង្គម Truth Social កាលពីពេលថ្មីៗ ដោយបង្ហាញបំណងចង់ទិញយក Green Land ដែលជាតំបន់ស្វយ័តមួយរបស់ដាណឺម៉ាក បញ្ចូលជាទឹកដីរបស់សហរដ្ឋអាម៉េរិក។ សម្រាប់លោក ត្រាំ ហ្រ្គីនឡែន ជាកន្លែងដ៏អស្ចារ្យមួយ ហើយប្រជាជននៅទីនោះនឹងទទួលបានអត្ថប្រយោជន៍ច្រើន ប្រសិនបើកោះនេះក្លាយជាផ្នែកមួយនៃទឹកដីសហរដ្ឋអាម៉េរិក។
ពាក់ព័ន្ធនឹងការលើកឡើងបែបនេះ លោក មុត អ៊ីហ្គេត (Mute Egede) នាយករដ្ឋមន្ត្រី ហ្រ្គីនឡែន ដែលកំពុងមាននិន្នាការទាមទារឯករាជ្យភាពពីប្រទេសដាណឺម៉ាក បាននិយាយម្តងហើយម្តងទៀតថា កោះនេះមិនមែនសម្រាប់លក់ទេ តែជោគវាសនារបស់កោះនេះវាអាស្រ័យលើការសម្រេចចិត្តរបស់ប្រជាជនទាំងមូល។
ហ្រ្គីនឡែន គឺជាកោះមួយ ដែលគ្របដណ្តប់ដោយទឹកកកភាគច្រើនហើយមានប្រជាជនត្រឹមតែ៥ម៉ឺន៧ពាន់នាក់ប៉ុណ្ណោះ។ ទីនោះ ជាតំបន់ដែលគេជឿថា មានកំណប់ធនធានរ៉ែដ៏មហាសាល និងមានសារសំខាន់ជាយុទ្ធសាស្ត្រសម្រាប់យោធាសហរដ្ឋអាម៉េរិក តែវាជាផ្នែកមួយរបស់ប្រទេសដាណឺម៉ាក អស់រយៈពេលជាង៦00ឆ្នាំមកហើយ។
កោះនេះជាអតីតដែនដីអាណានិគមរបស់ដាណឺម៉ាក ហើយបានក្លាយជាទឹកដីផ្លូវការរបស់ប្រទេសនេះក្នុងឆ្នាំ១៩៥៣។ ក្រោយមកនៅអំឡុងឆ្នាំ២០០៩ កោះនេះត្រូវបានផ្តល់ស្វ័យភាពគ្រប់គ្រងដោយខ្លួនឯងយ៉ាងទូលំទូលាយ រួមទាំងសិទ្ធិក្នុងការប្រកាសឯករាជ្យពីប្រទេសដាណឺម៉ាកតាមរយៈការធ្វើប្រជាមតិ។
ក្រៅពីលោក ត្រាំ កោះហ្រ្គីនឡែននេះជាបំណងប្រាថ្នារបស់សហរដ្ឋអាម៉េរិកជាយូរមកហើយ ពោលគឺតាំងពីសម័យនៃសង្រ្គាមត្រជាក់ជំនាន់លោកប្រធានាធិបតី ហារី ទ្រូមែន (Harry Truman) ដោយលោកបានស្នើទិញកោះនេះក្នុងតម្លៃ១០០លានដុល្លារ ប៉ុន្តែដាណឺម៉ាកបានបដិសេធ។ សហរដ្ឋអាម៉េរិកចង់បានកោះទឹកកកនេះ គឺដោយសារកោះនេះ មានសារសំខាន់ជាយុទ្ធសាស្ត្រសម្រាប់យោធាអាម៉េរិក និងប្រព័ន្ធមីស៊ីលរំលងទ្វីបរបស់ខ្លួន៕
ដោយៈ សរ សុជាតិ
