បើតាមការចុះផ្សាយពីគេហទំព័រខាងលើ ក្រុមហ៊ុនធានារ៉ាប់រងជប៉ុន ដែលមានមូលដ្ឋាននៅទីក្រុងតូក្យូ ឈ្មោះ Dai-ichi Life Holdings នឹងចាប់ផ្ដើមប្រតិបត្តិការដើម្បីបង្កើតក្រុមហ៊ុនបុត្រសម្ព័ន្ធរបស់ខ្លួនមួយនៅកម្ពុជា នៅក្នុងខែមីនានេះហើយ។
ក្រុមហ៊ុននេះ ក៏ជាក្រុមហ៊ុនធានារ៉ាប់រងអាយុជីវិតជប៉ុនដំបូងគេមួយ ដែលមានបំណងចាប់ផ្ដើមប្រតិបត្តិការអាជីវកម្មនៅកម្ពុជា នាខែមេសាឆ្នាំនេះ ជាមួយនឹងទឹកប្រាក់វិនិយោគប្រមាណ ៣៧,៧លានដុល្លារអាមេរិក។
តាមប្រសាសន៍របស់ឯកឧត្តម ងី តាយី រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ បានឲ្យដឹងថា បច្ចុប្បន្ន នៅកម្ពុជា មានក្រុមហ៊ុនធានារ៉ាប់រងទូទៅចំនួន ១១ក្រុមហ៊ុន ខណៈដែលក្រុមហ៊ុនធានារ៉ាប់រងអាយុជីវិតមានចំនួន ៧ក្រុមហ៊ុន។ ក្រុមហ៊ុនធានារ៉ាប់រងខ្នាតតូចមានចំនួន៨ ក្រុមហ៊ុនទីផ្សារធានារ៉ាប់រងចំនួន១២ ក្រុមហ៊ុនភ្នាក់ងារធានារ៉ាប់រងចំនួន១៦ ក្រុមហ៊ុនធានារ៉ាប់រងបន្តចំនួន១ និងក្រុមហ៊ុនវាយតម្លៃហានិភ័យចំនួន២។
តើអ្នកបានអានអត្ថបទនេះ ឬនៅ?
ជាមួយគ្នានេះ គិតតាំងពីឆ្នាំ១៩៩៩ មកទល់ឆ្នាំ២០១៧ កន្លងទៅ វិស័យធានារ៉ាប់រងបានបោះទុនជាទឹកប្រាក់សរុបចំនួន ១១២លានដុល្លារអាមេរិក ក្នុងនោះ ផ្នែកធានារ៉ាប់រងទូទៅមានចំនួន ៥៤,៤លានដុល្លារសហរដ្ឋអាមេរិក ធានារ៉ាប់រងអាយុជីវិត ៤៩,៧លានដុល្លារសហរដ្ឋអាមេរិក ធានារ៉ាប់រងខ្នាតតូចចំនួន ៧,៣លានដុល្លារសហរដ្ឋអាមរិក។
ការឈានជើងចូលរបស់ក្រុមហ៊ុនធានារ៉ាប់រងជប៉ុន Dai-ichi Life Holdings នឹងបង្ហាញឲ្យឃើញកាន់តែច្បាស់ពីសក្ដានុពលទីផ្សារនៃវិស័យធានារ៉ាប់រងនៅកម្ពុជា ខណៈដែលកន្លងមក ក្រុមហ៊ុនធានារ៉ាប់រងបរទេសជាច្រើន បានឈានជើងចូលក្នុងទីផ្សារកម្ពុជាបន្តបន្ទាប់ ដោយសារតែការសម្លឹងឃើញពីការកំណើនដ៏ច្រើននៃចំនួនប្រជាជនវ័យក្មេងរបស់កម្ពុជា និងកំណើនសេដ្ឋកិច្ចខ្ពស់ក្នុងរង្វង់៧% ក្នុងរយៈពេលជាច្រើនឆ្នាំកន្លងមកនេះ។ តួយ៉ាង ក្រុមហ៊ុនធានារ៉ាប់រង Bangkok Life Assurance ដែលមានក្រុមហ៊ុនធានារ៉ាប់រងជប៉ុន Japan’s Nippon Life Insurance ជាម្ចាស់ភាគហ៊ុនដ៏ធំនៅពីក្រោយនោះ ក៏បានចូលមកទីផ្សារកម្ពុជាកាលពីឆ្នាំ២០១៧ កន្លងទៅ ខណៈដែលក្រុមហ៊ុនធានារ៉ាប់រងអន្តរជាតិដ៏ធំ AIA ក៏បានចូលមកកម្ពុជារួចរាល់ហើយដែរ។
បើតាមឯកឧត្តម ងី តាយី វិស័យធានារ៉ាប់រងត្រូវបានចាត់ទុកថា ជាសសរស្តម្ភមួយបន្ទាប់ពីវិស័យធនាគារ និងទីផ្សារមូលបត្រ ហើយវិស័យទាំងបីនេះ គឺជាដៃគូបំពេញគ្នាទៅវិញទៅមកយ៉ាងសំខាន់ ដើម្បីជំរុញវិស័យហិរញ្ញវត្ថុឲ្យមានការរីកចម្រើន៕
