លោក ដូណាល់ ត្រាំ ព្រ.មានដំឡើងពន្ធ២៥% ឬច្រើនជាងនេះលើរថយន្តដែលនាំចូលទីផ្សារអាម៉េរិកនៅខែមេសា ខាងមុខនេះ

ប្រធានាធិបតីអាម៉េរិក លោក ដូណាល់ ត្រាំ បានអះអាងកាលពីថ្ងៃទី១៨ ខែកុម្ភៈ ថា លោកចង់ដំឡើងពន្ធលើរថយន្តនាំចូលក្នុងអត្រាយ៉ាងហោចណាស់២៥% ដើម្បីទាក់ទាញក្រុមហ៊ុនផលិតរថយន្តឱ្យផ្លាស់ប្តូរផលិតកម្មរបស់ពួកគេទៅកាន់ទឹកដីសហរដ្ឋអាម៉េរិក ហើយលោកទំនងជានឹងប្រកាសអំពីការសម្រេចចិត្តលើពន្ធគយនេះនៅថ្ងៃទី២ ខែមេសា។

លោក ត្រាំ មិនបានបញ្ជាក់ទេថា តើនឹងមានការលើកលែងចំពោះពន្ធនាំចូលរថយន្តដែលខ្ពស់ស្រាប់ហើយ ឬយ៉ាងណានោះទេ ប៉ុន្តែលោកបានបញ្ជាក់ថា ប្រទេសដែលអាចរងគ្រោះខ្លាំងជាងគេរួមមានជប៉ុន កាណាដា កូរ៉េខាងត្បូង និងអាល្លឺម៉ង់ និងប្រទេសម៉ិកស៊ិក ជាទីដែលក្រុមហ៊ុនផលិតរថយន្តអាស៊ីមួយចំនួនបានបង្កើតរោងចក្រដំឡើងរថយន្តនៅទីនោះ។

ប្រធានាធិបតីទី៤៧របស់អាម៉េរិករូបនេះ បានអះអាងថា លោកបានទាក់ទងក្រុមហ៊ុនធំៗមួយចំនួននៅក្នុងពិភពលោក ហើយបានប្រាប់ក្រុមហ៊ុនទាំងនោះថា អាម៉េរិកកំពុងអភិវឌ្ឍផ្នែកសេដ្ឋកិច្ច និងមានការដំឡើងពន្ធគយ និងការលើកទឹកចិត្ត។ ជាការឆ្លើយតបក្រុមហ៊ុនទាំងនោះហាក់បង្ហាញបំណងចង់ត្រលប់មកកាន់សហរដ្ឋអាម៉េរិកវិញ។

ពាក់ព័ន្ធនឹងផែនការប្រកាសពន្ធរថយន្តរបស់លោក ដូណាល់ ត្រាំ នេះ ក្រុមហ៊ុនជប៉ុនមួយចំនួនដូចជាហុងដា នីសាន់ និងម៉ាសដា (Mazda) ជាដើម កំពុងពិចារណាលើវិធីមួយចំនួនដើម្បីកែសម្រួលផែនការផលិតកម្មរបស់ពួកគេមុនពេលលោក ត្រាំ អនុវត្តការយកពន្ធលើផលិតផលរថយន្តរបស់ខ្លួននៅពីរបីសប្តាហ៍ខាងមុខនេះ។

វិធានការដំឡើងពន្ធថ្មីនេះ បានបន្ថែមការព្រួយបារម្ភថ្មីសម្រាប់ក្រុមហ៊ុនផលិតរថយន្តជាច្រើនរួមទាំងក្រុមហ៊ុនរថយន្តទាំង៣ខាងលើរបស់ជប៉ុនផងដែរ ខណៈដែលពួកគេកំពុងប្រឈមមុខនឹងវិធានការពន្ធផ្សេងទៀត ដូចជាពន្ធទ្វេភាគី ពន្ធដែកថែប និងអាលុយមីញ៉ូម និងពន្ធដែលអាចមាន២៥%ទៀតទៅលើប្រទេសម៉ិកស៊ិក និងកាណាដាជាដើម៕

អត្ថបទ៖ សុខ មង្គល