អាជ្ញាធរស្រុកបន្ទាយស្រី មានគម្រោងនឹងរៀបចំជាតំបន់ ឬភូមិបុរាណ នៅក្នុងស្រុកបន្ទាយស្រី ដើម្បីទាក់ទាញភ្ញៀវទេសចរទាំងជាតិ និងអន្តរជាតិក្រោយចប់កូវីដ-១៩ តែគម្រោងនេះមានឧបសគ្គខ្លះ ព្រោះខ្វះការចូលរួមពីក្រុមហ៊ុនឯកជន។
លោក ឃឹម ហ្វីណង់ បានមានប្រសាសន៍ថា «អ្វីដែលខ្ញុំចង់បានបំផុតនោះ គឺខ្ញុំចង់ឲ្យវិស័យឯកជនគាត់មើលឃើញថា អូ!វាជាសក្តានុពលមួយ ដែលអាចរកប្រាក់ចំណូលបាន ដែលមានការទាក់ទាញខ្លាំង ដែលអាចបង្កើតជាមុខរបរមួយ ដែលមានប្រាក់ចំណេញ ដើម្បីទទួលបានផលប្រយោជន៍ទាំងអស់គ្នា»។
លោកអភិបាលស្រុកបន្ទាយស្រីរូបនេះ អះអាងថា បើសិន ជាមានវិស័យឯកជនចូលរួមវិនិយោគជាមួយគម្រោងនេះមែន ទីតាំងដែលស័ក្ដិសមបំផុតសម្រាប់រៀបចំជាភូមិបុរាណនោះគឺ ភូមិប្រដាក ឃុំប្រដាក ក្នុងស្រុកបន្ទាយស្រីនេះតែម្តង។
អត្ថបទគួរអាន!
លោកអភិបាលស្រុកបានបញ្ជាក់ថា «ដោយសារតែប្រជាជននៅទីនេះ ជាប្រពៃណីទំនៀមទំលាប់នោះគឺមានលក្ខណៈរាងបុរាណស្រាប់ទៅហើយ ប៉ុន្តែសួរថា អាចធ្វើទៅកន្លែងផ្សេងបានទេ ខ្ញុំថា វាអាចទៅរួច ស៊ីសងទៅលើទំហំវិនិយោគ ព្រោះធម្មតា ការរៀបចំឲ្យមានភូមិបុរាណណាមួយ ដើម្បីបង្អួតបង្ហាញភ្ញៀវទេសចរនោះ គឺយើងអាចធ្វើបាន សំខាន់ឲ្យមានការផ្សាភ្ជាប់ទំនៀមទំលាប់ប្រពៃណីផ្សេងៗឲ្យត្រឹមត្រូវ»។
បែបនេះក្តី បច្ចុប្បន្ននេះ មិនទាន់មានក្រុមហ៊ុនឯកណាមួយទាក់ទង ឬចាប់អារម្មណ៍ពោះគម្រោងនេះ នៅឡើយនោះទេ ប៉ុន្តែលោកអភិបាលស្រុកបន្ទាយស្រី បញ្ជាក់ថា តាមរយៈផែនការចក្ខុវិស័យរបស់រដ្ឋបាលស្រុកបន្ទាយស្រី នឹងរៀបចំវេទិការទាក់ទាញអ្នកវិនិយោគខាងវិស័យទេសចរណ៍មកកាន់ស្រុកបន្ទាយស្រី ដើម្បីបង្ហាញពីសក្តានុពលនៃវិស័យទេសចរណ៍នៅក្នុងតំបន់នេះ ។
លោក ឃឹម ហ្វីណង់ អភិបាលស្រុកបន្ទាយស្រី
ចំពោះស្ថានភាពទេសចរណ៍ ក្នុងស្រុកបន្ទាយស្រីនារៀងរាល់ពេលចុងសប្តាហ៍ បើទោះមិនមានភ្ញៀវទេសចរបរទេសក៏ដោយ តែសម្បូររភ្ញៀវទេសចរក្នុងស្រុក ទៅកម្សាន្ដនៅតំបន់ពេញនិយមនានាដូចជា ភូមិប្រដាក បឹងឈូកជាដើម ដោយបានធ្វើឲ្យពលរដ្ឋនៅក្នុងតំបន់នេះ អះអាងថា អាចរកចំណូលបានជាធម្មតា មិនមានផលប៉ះពាល់ខ្លាំងដោយសារកូវីដនោះទេ៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
