រដ្ឋាភិបាលនូវែលសេឡង់ផ្តល់ប្រាក់ដល់គ្រួសារមានចំណូលទាបដើម្បីជួយសម្រាលការចំណាយក្នុងអំឡុងពេលប្រេងកំពុងហក់ឡើងថ្លៃ
រដ្ឋាភិបាលនូវែលសេឡង់បានប្រកាសដាក់ចេញវិធានការបន្ទាន់មួយ ដោយផ្តល់ប្រាក់ឧបត្ថម្ភប្រចាំសប្តាហ៍ដល់ពលរដ្ឋប្រមាណ១៥ម៉ឺនគ្រួសារ ដើម្បីជួយសម្រាលបន្ទុ…
យោងតាមការចុះផ្សាយរបស់សារព័ត៌មាន CNA តម្លៃប្រេងឆៅនៅលើទីផ្សារអន្តរជាតិ បានងើបឡើងវិញនៅក្នុងការជួញដូរនៅថ្ងៃទី ២៤ ខែមីនា។ ការកើនឡើងនេះកើតមានឡើងបន្ទាប់ពីមានការភ័យខ្លាចជាថ្មី ក្រោយអ៊ីរ៉ង់បានបដិសេធយ៉ាងដាច់អហង្ការថា គ្មានការចរចាណាមួយជាមួយអាម៉េរិក ដើម្បីបញ្ចប់សង្គ្រាមនោះទេ ដែលវាផ្ទុយស្រឡះពីការអះអាងរបស់លោកប្រធានាធិបតី ដូណាល់ ត្រាំ។
ការចេញមកបដិសេធនេះបានជំរុញឱ្យតម្លៃប្រេងឆៅនៅលើទីផ្សារអង់គ្លេស ហក់ឡើង១,១%ភ្លាមៗឈានដល់១០១ ដុល្លារក្នុងមួយបារ៉ែល ខណៈតម្លៃប្រេងឆៅនៅលើទីផ្សារអាម៉េរិក បានកើនឡើង១,៨% ឈានដល់ជាង៨៩ដុល្លារក្នុងមួយបារ៉ែល។ កាលពីថ្ងៃទី២៣ ខែមីនា តម្លៃប្រេងឆៅបានធ្លាក់ចុះជាង១០% មកនៅក្រោម១០០ដុល្លារក្នុងមួយបារ៉ែល បន្ទាប់ពីលោក ត្រាំ ប្រកាសផ្អាកការវាយប្រហារលើអ៊ីរ៉ង់ រយៈពេល៥ថ្ងៃ ដើម្បីទុកឱកាសឱ្យមានការចរចា។
លោក ទីម វ័តធឺរឺ (Tim Waterer) ប្រធានអ្នកវិភាគនៅក្រុមហ៊ុន KCM Trade បានលើកឡើងថា ការប្រកាសផ្អាកការវាយប្រហារចំនួន៥ថ្ងៃរបស់លោក ត្រាំ គឺជាកត្តាចម្បង ដែលធ្វើឱ្យតម្លៃប្រេងស្រុតចុះកាលពីថ្ងៃចន្ទ។ ទោះជាយ៉ាងណាក៏ដោយ អ្នកវិភាគយល់ឃើញថា តម្លៃប្រេងបច្ចុប្បន្នពិបាកព្យាករបំផុត ដរាបណាស្ថានភាពសង្គ្រាមមិនទាន់មានភាពច្បាស់លាស់ ហើយច្រកសមុទ្រហ័រម៉ូសនៅតែស្ថិតក្នុងស្ថានភាពផុយស្រួយ តម្លៃប្រេងនឹងពិបាកធ្លាក់ចុះមកត្រឹមចន្លោះ៨៥ទៅ៩០ដុល្លារក្នុង១បារ៉ែលណាស់។
ក្រុមអ្នកជំនាញបានព្រមានថា ប្រសិនបើស្ថានការណ៍សង្គ្រាមនៅមជ្ឈិមបូព៌ាមិនមានភាពប្រសើរឡើង ហើយច្រកសមុទ្រហ័រម៉ូស នៅតែបន្តរងការគំរាមកំហែងរហូតដល់ខែមេសា នោះតម្លៃប្រេងឆៅអាចនឹងហក់ឡើងដល់១៥០ដុល្លារក្នុងមួយបារ៉ែលជាក់ជាមិនខាន៕
ដោយៈ សរ សុជាតិ
