រូបភាពនៃការចាប់ដៃគ្នារវាងមេដឹកនាំកាណាដា និងចិន នៅកូរ៉េខាងត្បូង កាលពីពេលថ្មីៗ កំពុងធ្វើឱ្យមានការដាក់ការសង្ស័យនៃការផ្លាស់ប្តូរគោលនយោបាយរវាងប្រទេសទាំងពីរ ក្រោយចំណងមិត្តភាពរបស់ពួកគេបានរលំរលាយនៅឆ្នាំ២០១៨ បន្ទាប់ពីប៉ូលិសកាណាដាបានចាប់ខ្លួននាយកប្រតិបត្តិក្រុមហ៊ុនបច្ចេកវិទ្យា Huawei លោកស្រី ម៉េង វាន់ចូវ (Meng Wanzhou) ហើយទីក្រុងប៉េកាំង បានចាប់ឃុំខ្លួនជនជាតិកាណាដាពីរនាក់ពីបទចារកម្មជាការសងសឹក។
បញ្ហាខាងលើបានធ្វើឱ្យទំនាក់ទំនងការទូតរវាងប្រទេសទាំងពីរកាន់តែអាក្រក់ទៅៗ និងបង្កឱ្យមានការមិនទុកចិត្តគ្នាយ៉ាងខ្លាំងរវាងទីក្រុងអូតាវ៉ា និងទីក្រុងប៉េកាំង។ ប៉ុន្តែក្រោយប្រធានាធិបតីអាម៉េរិក ដូណាល់ ត្រាំ បង្កើនសង្គ្រាមពាណិជ្ជកម្មជាមួយសម្ព័ន្ធមិត្តជិតស្និទ្ធបំផុតមួយរបស់ខ្លួន បានជំរុញឱ្យកាណាដា ងាកទៅរកសត្រូវយូរអង្វែងរបស់ខ្លួន គឺចិន។
ទំនោរថ្មីនេះបានចាប់ផ្តើមប្រែប្រួលនៅដើមខែមុន នៅពេលដែលអ្នកការទូតកំពូលរបស់កាណាដា លោកស្រី អានីតា អាណាន់ (Anita Anand) បានទៅទីក្រុងប៉េកាំង ដើម្បីជួបជាមួយសមភាគីរបស់ខ្លួន គឺលោក វ៉ាង យី រដ្ឋមន្ត្រីការបរទេសចិន។ បន្ទាប់មកលោកនាយករដ្ឋមន្ត្រី ម៉ាក ខាណេ (Mark Carney) និងលោក ស៊ី ជីនពីង បានជួបប្រជុំគ្នានៅខាងក្រៅកិច្ចប្រជុំ APEC ដែលជាជំនួបដំបូងបំផុតក្នុងរយៈពេល៨ឆ្នាំកន្លងមកនេះ។
ក្រៅពីកាណាដា សម្ពន្ធមិត្តអាម៉េរិកខ្លះដូចជាអូស្រ្តាលី ក៏បានបង្ហាញចេតនាក្នុងការរក្សាទំនាក់ទំនងពាណិជ្ជកម្មវិជ្ជមានជាមួយប្រទេសចិន ផងដែរ៕
ដោយៈ សរ សុជាតិ
