លោក ខាលេប រ៉េក្លេន (Caleb Ragland) កសិករម្នាក់នៅរដ្ឋ ខេនតាក់គី និងជាប្រធានសមាគមសណ្តែកសៀងអាម៉េរិក បានចាត់ទុកការដាក់ចេញវិធានការពន្ធទៅវិញទៅមករបស់លោក ដូណាល់ ត្រាំ ប្រធានាធិបតីសហរដ្ឋអាម៉េរិក ជាការកាត់ផ្តាច់ក្តីសង្ឃឹមរបស់កសិករអាម៉េរិក។ ការចាត់ទុកបែបនេះ ក៏ដោយសារតែទិន្នផលសណ្តែកសៀងស្ទើរពាក់កណ្តាលនៃទិន្នផលសរុបរបស់អាម៉េរិក ដែលបាននាំចេញភាគច្រើននាំចូលទៅកាន់ទីផ្សារចិន។ បើតាមការអះអាងរបស់ប្រធានសមាគមរូបនេះ ក្រៅពីសណ្តែងសៀង ចិនក៏បាននាំចូលពោត សាច់គោ សាច់មាន់ និងដំណាំផ្សេងៗជាច្រើនទៀតរបស់អាម៉េរិកផងដែរ ដែលមានតម្លៃសរុបរហូតដល់ជិត២៥ពាន់លានដុល្លារ កាលពីឆ្នាំ២០២៤។
ជាមួយគ្នានេះ លោក ធីម ឌូហ្វូល (Tim Dufault) កសិករមួយរូបទៀតនៅរដ្ឋមីនីសូតា (Minnesota) បានឡើងថា កសិករដាំសណ្តែកសៀងនៅឆ្នាំនេះមិនត្រឹមតែមិនរំពឹងទទួលបានប្រាក់ចំណេញនោះទេ ពួកគេថែមទាំងបារម្ភពីការខាតបង់ទៀតផង ដោយសារថ្លៃផលិតឡើងថ្លៃ គួបផ្សំទីផ្សារនាំចូលសណ្តែកសៀងធំរបស់អាម៉េរិក ជាពិសេសចិន បានដាក់ពន្ធខ្ពស់លើទំនិញសព្វសារពើរបស់អាម៉េរិក។
ជាមួយការប្រឈមនឹងបញ្ហាទីផ្សារ និងវិធានការពន្ធរបស់ប្រទេសនាំចូលនេះ កសិកររូបនេះ ជឿជាក់ថា វាអាចបង្ខំឱ្យកសិករឈប់ដាំដំណាំនេះ ដែលអាចធ្វើឱ្យពួកគេប្រឈមនឹងការចំណាយលើថ្លៃរស់នៅប្រចាំថ្ងៃ។ កាលពីអាណត្តិមុនកសិករអាម៉េរិក បានរងគ្រោះដោយសារលោក ត្រាំ ម្តងហើយ។
គួរបញ្ជាក់ថា រដ្ឋាភិបាលចិន បានប្រកាសដំឡើងពន្ធ៣៤% លើទំនិញនាំចូលពីអាម៉េរិកទាំងអស់ភ្លាមៗ បន្ទាប់ពីលោក ដូណាល់ ត្រាំ ប្រធានាធិបតីសហរដ្ឋអាម៉េរិក បានប្រកាសដាក់ពន្ធលើទំនិញចិន ក្នុងបរិមាណដូចគ្នាកាលពីថ្ងៃទី២ ខែមេសា ឆ្នាំ២០២២៥៕
ដោយៈ សរ សុជាតិ
