គំនិតផ្ដួចផ្ដើមនេះ បង្កើតឡើងស្ថិតនៅក្នុងគម្រោងការចែករំលែកហានិភ័យរបស់ធនាគារទាំងពីរនេះ ដែលបានដាក់ចេញកាលពីខែមិថុនាឆ្នាំមុន ដើម្បីជួយផ្ដល់មូលនិធិដល់អ្នកផ្គត់ផ្គង់ឧបករណ៍ការពារការឆ្លងមេរោគកូវីដ ស្របពេលដែលក្រុមហ៊ុនផលិតវ៉ាក់សាំង កំពុងដុតដៃដុតជើងខ្លាំងមែនទែន ធ្វើយ៉ាងណាឲ្យការផលិតអាចឆ្លើយតបទៅនឹងតម្រូវការសកលលោក ដែលកំពុងកើនឡើងខ្លាំង។
អ្នកជំនាញពីធនាគារ HSBC បាននិយាយថា ឥឡូវនេះតម្រូវការវ៉ាក់សាំងគឺមានខ្ពស់ជាងការផ្គត់ផ្គង់ឆ្ងាយណាស់ ហើយចំណុចមួយនៃបញ្ហា គឺថា បណ្ដាញផ្គត់ផ្គង់និងចែកចាយត្រូវតែបង្កើតឡើងឲ្យបានត្រឹមត្រូវ ដែលវាទាមទារឲ្យមានសាច់ប្រាក់ជាច្រើនដើម្បីធ្វើការងារទាំងអស់នេះ។
តាមរយៈថវិកាដែលបានដាក់ចេញ៣០០លានដុល្លារនោះ នឹងត្រូវផ្ដល់ជាមូលនិធិ តាមរយៈការផ្ដល់កម្ចីបែបពាណិជ្ជកម្ម សម្រាប់ក្រុមហ៊ុន ដែលបម្រើក្នុងវិស័យផលិតផ្គត់ផ្គង់វ៉ាក់សាំងកូវីដ-១៩ នៅអាស៊ី ខណៈដែលបច្ចុប្បន្នប្រទេសជាច្រើននៅទូទាំងតំបន់នេះ កំពុងព្យាយាមស្ដារស្ថានភាពសេដ្ឋកិច្ចសង្គមឲ្យវិលមករកសភាពធម្មតាវិញ ហើយដើម្បីអាចធ្វើបែបនេះទៅបាន គេចាំបាច់ត្រូវការការចាក់វ៉ាក់សាំងកូវីដ-១៩ ជាលក្ខណៈទ្រង់ទ្រាយធំសម្រាប់ពលរដ្ឋរបស់ខ្លួន។
អត្ថបទទាក់ទង
ជាមួយគ្នានេះ សម្រាប់កម្រិតនៃការចាក់វ៉ាក់សាំងនៅអាស៊ី គឺមានភាពខុសប្លែកគ្នាទៅតាមប្រទេសនីមួយ ដោយសារតែរដ្ឋាភិបាលអាចសម្រេចបាននូវកិច្ចព្រមព្រៀងទទួលបានវ៉ាក់សាំងនៅមានកម្រិតតិចតួច ធៀបនឹងតម្រូវការមានច្រើន ហើយការផ្គត់ផ្គង់វ៉ាក់សាំងនេះទៀតសោត ក៏កំពុងប្រជែងគ្នាក្រោមរូបភាពនយោបាយផងដែរ។
សូមបញ្ជាក់ថា ថ្មីៗនេះ ក្រុមមេដឹកនាំប្រទេសសេដ្ឋកិច្ចធំៗចំនួន៤ ដែលជាសម្ព័ន្ធមិត្តនឹងគ្នា គឺអាមេរិក ឥណ្ឌា អូស្ត្រាលី និងជប៉ុន បានសន្យាប្រមែរប្រមូលថវិកាគ្នា ដើម្បីផលិតចែកចាយវ៉ាក់សាំងកូវីដ-១៩ ឲ្យបាន១ពាន់លានដូសសម្រាប់ប្រទេសនៅតំបន់អាស៊ី នៅត្រឹមចុងឆ្នាំ២០២២ខាងមុខនេះ។ ការដាក់ចេញនូវគម្រោងផលិតផលវ៉ាក់សាំង១ពាន់ដូសរបស់ប្រទេសទាំង៤នេះ ត្រូវបានគេមើលឃើញថា ពួកគេកំពុងតែព្យាយាមទប់ទល់នឹងឥទ្ធិពលរបស់ចិនមកលើតំបន់អាស៊ី ដ្បិតថាកន្លងមក ចិនបានផលិតវ៉ាក់សាំង និង ចែកចាយដល់ប្រទេសតូចៗជាច្រើននៅក្នុងតំបន់អាស៊ីរួចទៅហើយ៕
ចុច Like Facebook Page របស់ខេមបូណូមីស ព្រមទាំងចូលរួមជាមួយយើងក្នុង Telegram ដើម្បីទទួលបានព័ត៌មានថ្មីៗលឿនរហ័ស និងមុនគេ: https://t.me/cambonomist
None
