ធនាគារធំៗពីរនឹងបោះផ្សាយលក់មូលបត្របំណុលចំនួន២០០លានដុល្លារនៅឆ្នាំនេះ

ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនិយ័តករមូលបត្រកម្ពុជា បានចាត់ទុកវិស័យមូលបត្រ គឺជាជម្រើសមួយដែលមិនអាចខ្វះបានក្នុងការផ្តល់នូវប្រភពទុនសម្រាប់ក្រុមហ៊ុនសហគ្រាសនៅកម្ពុជា ដើម្បីពង្រឹងនិងពង្រីកការអភិវឌ្ឍធុកិច្ចរបស់ខ្លួន លើកកម្ពស់តម្លាភាព និងអភិបាលកិច្ចល្អ ក៏ដូចជាការទាក់ទាញវិនិយោគិនពីបរទេស និងបង្កើនប្រាក់ចំណូលសេដ្ឋកិច្ចជាតិ។ ជាក់ស្តែងធនាគារ អេស៊ីលីដា ដែលជាធនាគារខ្មែរពាណិជ្ជកម្មបោះផ្សាយលក់មូលបត្រកម្មសិទ្ធិដំបូងគេនៅផ្សារមូលបត្រកម្ពុជា នឹងបោះផ្សាយលក់សញ្ញាបណ្ណ ឬមូលបត្របំណុលក្នុងទំហំទឹកប្រាក់១០០លានដុល្លារនៅថ្ងៃទី២៤ ខែកុម្ភៈ ឆ្នាំ២០២៥។

ទន្ទឹមនេះឯកឧត្តម ស៊ូ សុជាតិ បានបញ្ជាក់ឱ្យដឹងដែរថា នៅក្នុងអំឡុងខែមិថុនា ខាងមុខ ធនាគារវីង ក៏គ្រោងនឹងបោះផ្សាយលក់សញ្ញាបណ្ណដែលមានទំហំសាច់ប្រាក់ប្រមាណជាង១០០លានដុល្លារផងដែរ។ តាមរយៈការបោះផ្សាយលក់សញ្ញាបណ្ណរបស់ធនាគារធំៗទាំងពីរនេះ ថ្នាក់ដឹកនាំរូបនេះជឿជាក់ថា ទំហំទុនដែលក្រុមហ៊ុនចុះបញ្ជីនៅផ្សារមូលបត្រកម្ពុជាអាចកៀរគរបានពីទីផ្សារនឹងកើនលើស៥០០លានដុល្លារនៅត្រឹមឆ្នាំ២០២៥នេះ ខណៈគិតត្រឹមចុងឆ្នាំ២០២៤កន្លងទៅក្រុមហ៊ុនទាំងនេះកៀរគរទុនពីផ្សារបានជាង៣០០លានដុល្លារ។

គួរបញ្ជាក់ថា គិតមកទល់ពេលនេះមានក្រុមហ៊ុនសរុបចំនួន២៣បានចុះបញ្ជីនៅផ្សារមូលបត្រកម្ពុជា ក្នុងនោះមានក្រុមហ៊ុនបោះផ្សាយភាគហ៊ុនចំនួន១១ និងក្រុមហ៊ុនបោះផ្សាយសញ្ញាបណ្ណ ឬបណ្ណបំណុលចំនួន១២៕