លោក ហ្សេលេនស្គី បានជំរុញឱ្យក្រុមប្រឹក្សាសន្តិសុខនៃអង្គការសហប្រជាជាតិ បណ្តេញរុស្ស៊ីចេញពីអង្គការសហប្រជាជាតិ និងបង្កើតសាលាក្តីមួយ ដើម្បីស៊ើបអង្កេតសកម្មភាពយោធារបស់រុស្ស៊ីនៅអ៊ុយក្រែន ដែលបានចូលឈ្លានពានតាំងតែថ្ងៃទី២៤ ខែកុម្ភៈមក។ ទោះបីជាយ៉ាងណា ប្រទេសរុស្ស៊ីមានអំណាចវេតូនៅក្នុងក្រុមប្រឹក្សានេះ ហើយអាចការពារខ្លួនពីការចោទប្រកាន់នេះផងដែរ។
លោក ហ្សេលេនស្គី បានប្រាប់ក្រុមប្រឹក្សាសន្ដិសុខថា រុស្ស៊ីមិនមានសិទ្ធិចូលរួមក្នុងការពិភាក្សា និងការបោះឆ្នោតទាក់ទងនឹងសង្គ្រាមនៅអ៊ុយក្រែននោះទេ។ លោកថែមទាំងបាន ជំរុញឱ្យក្រុមប្រឹក្សាសន្តិសុខដកអំណាចរបស់ប្រតិភូរបស់រុស្ស៊ី ដែលលោកហៅថា ជារដ្ឋភេរវករ ចេញពីស្ថាប័នអង្គការសហប្រជាជាតិផងដែរនេះ។
ទីក្រុងមូស្គូបានហៅការលុកលុយរបស់ខ្លួនទៅលើអ៊ុយក្រែនថាជា «ប្រតិបត្តិការយោធាពិសេស» ដើម្បីកម្ចាត់ពួកហ្វាស៊ីនិយមចេញពីប្រទេសអ៊ុយក្រែន ប៉ុន្តែនោះគ្រាន់តែជាទង្វើមួយដែលរដ្ឋាភិបាលទីក្រុងកៀវ និងសម្ព័ន្ធមិត្តលោកខាងលិចបានអះអាងថា ជាលេសគ្មានមូលដ្ឋានរបស់រុស្ស៊ី ដើម្បីធ្វើសង្គ្រាមឈ្លានពានចូលអ៊ុយក្រែនតែប៉ុណ្ណោះ។
ក្នុងកិច្ចប្រជុំកាលពីថ្ងៃម្សិលមិញនេះ សមាជិកក្រុមប្រឹក្សាសន្តិសុខទាំង ១៥ ប្រទេសរួមទាំងប្រទេស រុស្ស៊ីដែរនោះ បាននាំគ្នាក្រោកឈរ និងរក្សាភាពស្ងៀមស្ងាត់មួយភ្លែតក្រោយពីលោក ហ្សឺឡិនស្គី បានស្នើសុំឱ្យពួកគេគោរពដល់វិញ្ញាញក្ខន្ធពលរដ្ឋអ៊ុយក្រែនទាំងអស់ដែលបានស្លាប់នៅក្នុងសង្គ្រាមនេះ។
អត្ថបទគួរអាន
លោក Dmitry Polyanskiy ឯកអគ្គរដ្ឋទូតរងរបស់រុស្ស៊ីប្រចាំនៅអង្គការសហប្រជាជាតិបានប្រាប់ក្រុមប្រឹក្សាសន្តិសុខនៃអង្គការសហប្រជាជាតិថា ការបង្ហាញខ្លួនរបស់លោកហ្សេលេនស្គីតាមរយៈវីដេអូពីចម្ងាយនេះបានធ្វើឱ្យប៉ះពាល់ដល់សិទ្ធិអំណាចរបស់ស្ថាប័នដែលទទួលបន្ទុករក្សាសន្តិភាព និងសន្តិសុខអន្តរជាតិមួយនេះ។
កិច្ចប្រជុំក្រុមប្រឹក្សាសន្តិសុខនេះបានធ្វើឡើងក្រោយពីប្រទេសអ៊ុយក្រែនបាននិយាយថា ប្រទេសរុស្ស៊ីមានចេតនាវាយប្រហារមីស៊ីលសំដៅទៅរកផ្សារទំនើបមួយនៅប្រទេសអ៊ុយក្រែនដោយបានសម្លាប់មនុស្សយ៉ាងតិច ១៨ នាក់ និងរាប់សិបនាក់ទៀតរងរបួស។
ប៉ុន្តែប្រទេសរុស្ស៊ីបានបដិសេធការវាយប្រហារមីស៊ីលទៅលើផ្សារទំនើបនោះ ដោយនិយាយថា ខ្លួនបានវាយប្រហារទៅលើឃ្លាំងស្តុកទុកអាវុធរបស់សហរដ្ឋអាមេរិក និងអឺរ៉ុបមួយកន្លែងដែលស្ថិតនៅក្បែរផ្សារទំនើបនោះដែលបង្កឱ្យមានការផ្ទុះខ្ទាតទៅឆេះផ្សារទំនើបនៅក្បែរនោះតែម្ដង៕
អត្ថបទ៖ សុខ ជា
