រដ្ឋមន្ត្រីក្រសួងអភិវឌ្ឍន៍អន្តរជាតិ និងប៉ាស៊ីហ្វិក របស់អូស្ត្រាលី លោក ផាត ខុនរ៉យ (Pat Conroy) បានប្រាប់សន្និសីទប៉ាស៊ីហ្វិកនៅថ្ងៃអង្គារនេះថា អូស្ត្រាលីនឹងបង្កើនមូលនិធិទ្វេដងរបស់ខ្លួនសម្រាប់ការឃ្លាំមើលផ្លូវអាកាសនៅតំបន់នេសាទដ៏ធំល្វឹងល្វើយនៃប្រទេសកោះប៉ាស៊ីហ្វិក និង ផ្តល់ហិរញ្ញវត្ថុដល់ប្រជុំកោះប៉ាស៊ីហ្វិកក្នុងការកសាងហេដ្ឋារចនាសម្ព័ន្ធរឹងមាំថែមទៀតខណៈដែលកម្ពស់ទឹកសមុទ្រប៉ាស៊ីហ្វិកត្រូវគេព្យាករណ៍ថា នឹងកើនឡើង ៤ ដងនៃមធ្យមភាគពិភពលោក។
រដ្ឋមន្ត្រីអូស្ត្រាលីរូបនេះ បាននិយាយទៅកាន់សន្និសីទក្នុងរដ្ឋធានីស៊ូវ៉ា (Suva) ប្រទេសកោះហ្វីជីថា រដ្ឋាភិបាលអូស្ត្រាលីដឹងថា បញ្ហាសន្តិសុខគឺមិនអាចផ្ដាច់ចេញពីបញ្ហានៃការប្រែប្រួលអាកាសធាតុបាននោះទេ។
ក្នុងអំឡុងពេលនៃវេទិកាប្រជុំកោះប៉ាស៊ីហ្វិកដែលនឹងរៀបចំធ្វើនៅរដ្ឋធានីស៊ូវ៉ានៅខែក្រោយនេះ គេរំពឹងថា ក្រុមមេដឹកនាំក្នុងតំបន់នឹងពិភាក្សាពីការប្រឹងប្រែងរបស់ប្រទេសចិនក្នុងការសម្រេចបានកិច្ចព្រមព្រៀងពាណិជ្ជកម្ម និងសន្តិសុខជាមួយប្រទេសកោះប៉ាស៊ីហ្វិកចំនួន ១០ដែលមានចំណងការទូតជាមួយប្រទេសចិន ហើយគេបានដឹងថា សេចក្ដីព្រាងកិច្ចព្រមព្រៀងនេះបានរាប់បញ្ចូលវិស័យជលផល សន្តិសុខដែនសមុទ្រ និងការបណ្ដុះបណ្ដាលមន្ត្រីប៉ូលិសជាដើម។
អត្ថបទគួរអាន
វេទិកានេះនឹងមានការចូលរួមពីប្រទេសអូស្ត្រាលី និងនូវែលហ្សេឡង់ ខណៈដែលប្រទេសទាំង២នេះកំពុងព្រួយបារម្ភពីកិច្ចព្រមព្រៀងសន្តិសុខថ្មីៗនេះរវាងប្រទេសចិន និងប្រទេសសូឡូម៉ុនព្រមទាំងប្រទេសមួយចំនួនទៀត ដែលទទួលស្គាល់តៃវ៉ាន់ និងមិនទទួលស្គាល់ក្រុងប៉េកាំង។
ប្រទេសចិនដែលមិនមែនជាសមាជិកវេទិកាប្រជុំកោះប៉ាស៊ីហ្វិក (PIF) នោះ កំពុងស្វែងរកធ្វើជាម្ចាស់ផ្ទះកិច្ចប្រជុំតាមវីដេអូជាមួយប្រទេសកោះទាំង១០ ដែលខ្លួនចង់ចុះហត្ថលេខាលើកតិកាសញ្ញាពហុភាគីនៅថ្ងៃទី១៤ ខែកក្កដា ដែលត្រូវនឹងថ្ងៃចុងក្រោយនៃកិច្ចប្រជុំមេដឹកនាំវេទិកាប្រជុំកោះប៉ាស៊ីហ្វិក។ នេះបើតាមប្រភពមួយដែលដឹងពីរឿងនេះបានប្រាប់ទីភ្នាក់ងាររ៉យទ័រ។
កិច្ចប្រជុំនោះ ក៏នឹងកើតឡើងស្របពេលគ្នាជាមួយថ្ងៃដែលគេរំពឹងថា ក្រុមមេដឹកនាំនៃវេទិកានេះនឹងចេញសេចក្តីថ្លែងការណ៍មួយផងដែរ ប៉ុន្តែគេមិនដឹងថា តើកិច្ចប្រជុំរបស់ចិននេះនឹងបន្តធ្វើទៅមុខទៀតឬអត់នោះទេ បន្ទាប់ពីប្រទេសមួយចំនួនត្រូវគេរាយការណ៍ថាមិនសប្បាយចិត្តចំពោះការកំណត់ពេលវេលារបស់ចិននោះទេ៕
អត្ថបទ៖ សុខ ជា
