វិស័យការងារ

សហជីពថា ការអនុវត្តលក្ខខណ្ឌការងារនៅតាមរោងចក្រហាក់ពុំសូវមានភាពល្អប្រសើរ តែមន្ត្រីថា ការលើកឡើងនេះហាក់គ្មានមូលដ្ឋានសិក្សាច្បាស់លាស់


ស្របពេលការបញ្ជាទិញ និងការនាំចេញផលិតផលកាត់ដេរមានការកើនឡើងខ្លាំងនៅមួយរយៈចុងក្រោយ ប្រធានសម្ព័ន្ធសហជីពជាតិ កត់សម្គាល់ឃើញថា ការអនុវត្តលក្ខខណ្ឌការងារ និងការយកចិត្តទុកដាក់លើសុខុមាលភាពការងាររបស់កម្មករ និយោជិតក្នុងវិស័យនេះហាក់មិនសូវមានភាពល្អប្រសើរនោះទេ។
វិស័យការងារ
ដោយ

ជាមួយគ្នានេះ តំណាងកម្មករ និយោជិត ស្នើឱ្យក្រសួងស្ថាប័នពាក់ព័ន្ធគួរបង្កើនការចុះត្រួតពិនិត្យដល់ទីតាំងរោងចក្រសហគ្រាសទាំងអស់នៅទូទាំងប្រទេសឱ្យបានហ្មត់ចត់បន្ថែមទៀត ដើម្បីពង្រឹងសុវត្ថិភាពការងារ និងសិទ្ធិជូនដល់កម្មករនិយោជិត។ តែយ៉ាងណាមន្ត្រីជាន់ខ្ពស់ក្រសួងការងារ និងបណ្តុះបណ្តាលវិជ្ជាជីវៈ ចាត់ទុកការលើកឡើងនេះ ហាក់ពុំមានមូលដ្ឋានសិក្សា និងទទួលព័ត៌មានច្បាស់លាស់។

លោក ហ្វា សាលី ប្រធានសម្ព័ន្ធសហជីពជាតិ កត់សម្គាល់ឃើញថា ក្រោយកម្ពុជា ទទួលបានរោងចក្របង្កើតថ្មីជាបន្តបន្ទាប់នៅមួយរយៈចុងក្រោយនេះ ការអនុវត្តលក្ខខណ្ឌ សុវត្ថិភាព និងសុខុមាលភាពការការងារនៅនឹងកន្លែងនៅក្នុងវិស័យឧស្សាហកម្មកាត់ដេរ វាយនភណ្ឌ សម្លៀកបំពាក់ ការបូប ស្បែកជើង និងផលិតផលធ្វើដំណើរនៅកម្ពុជា ហាក់បីដូចជាស្ថិតក្នុងសភាពទ្រឹង និងមិនមានស្ថានភាពល្អប្រសើរនោះទេ។ ការលើកឡើងបែបនេះ ធ្វើឡើងក្រោយលោកសង្កេតឃើញថា មានរោងចក្រមួយចំនួនបានបង្ខំឱ្យកម្មករធ្វើការថែមម៉ោងយ៉ាងសម្បើម និងរោងចក្រខ្លះទៀតមិនទាន់បានគោរពច្បាប់ ស្តីពីការងារឱ្យបានត្រឹមត្រូវ និងមិនមានសូម្បីថ្នាំពេទ្យ ឬគ្រូពេទ្យសម្រាប់សង្រ្គោះបឋម និងគ្មានការត្រួតពិនិត្យរកសារជាតិគីមីលើក្រណាត់ កាវស្បែកជើង ស្បែក និងប្លាស្ទិក និងមិនមានទីតាំងសមរម្យសម្រាប់ឱ្យកម្មករសម្រាកទទួលទានអាហារថ្ងៃត្រង់ជាដើម។ ម្យ៉ាងទៀត ការធ្វើដំណើររបស់កម្មករនៅតែជាបញ្ហាចម្បង ចំណែកឯសុខុមាលភាព និងការគាំពារផ្នែករាងកាយ ស្មារតី និងផ្លូវច្បាប់ពុំទាន់ធ្វើឱ្យបានល្អប្រសើរនៅឡើយ។

​ទន្ទឹមនឹងនេះ លោក ហ្វា សាលី បានស្នើដល់មន្ត្រីអធិការកិច្ចនៃក្រសួងការងារ គួរចុះត្រួតពិនិត្យការអនុវត្តស្តង់ដាការងារ និងលក្ខខណ្ឌការងារនៅតាមបណ្តារោងចក្រនានា នៅទូទាំងប្រទេស ឱ្យបានហ្មត់ចត់ និង​ពិន័យម្ចាស់ក្រុមហ៊ុនរោងចក្រសហគ្រាសណា ដែលមិនគោរពតាមច្បាប់ការងារឱ្យបានដិតដល់ សំដៅជួយពង្រឹងវិស័យការងារ លក្ខខណ្ឌការងារ និងសិទ្ធិជូនកម្មករនិយោជិត។ តែយ៉ាងណា អ្នកជំនាញរូបនេះ ក៏បានកោតសរសើដល់រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ដែលបានខិតខំពង្រឹងសមត្ថភាពមន្ត្រី និងបានចុះត្រួតពិនិត្យដល់ទីតាំងក្រុមហ៊ុនរោងចក្រនានានា ពេលកន្លងមកផងដែរ។

​ឆ្លើយតបនឹងបញ្ហានេះ ឯកឧត្តម កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បានចាត់ទុកការលើកឡើងរបស់ថ្នាក់ដឹកនាំសហជីបជាតិ ខាងលើ ហាក់ពុំមានមូលដ្ឋានសិក្សា និងទទួលព័តមានច្បាស់លាស់នៅឡើយទេ។ ជាក់ស្តែងនៅក្នុងឆ្នាំ២០២៤ កន្លងទៅ អធិការការងារ បានចុះធ្វើអធិការកិច្ចចំនួន១ម៉ឺន៤​៨៤លើក និងដាក់ពិន័យដល់រោងចក្រសហគ្រាសចំនួន ៤៣៤រោងចក្រ សហគ្រាស។ ទន្ទឹមនោះ ថ្នាក់ដឹកនាំ និងមន្រ្តីក្រសួងការងារ ​ក៏កំពុងចុះពិនិត្យស្ថានភាពការងារតាមរោងចក្រសហគ្រាសនានា ផងដែរ៕




អត្ថបទបន្ទាប់


ធនាគារ ប្រ៊ីដ ចាប់ដៃគ្នាជាមួយក្រុមហ៊ុនធំៗ២ ដើម្បីផ្ដល់ការគាំទ្រផ្នែកហិរញ្ញវត្ថុ ដល់បណ្ដុំសហគ្រាសខ្នាតតូច និងមធ្យម (SME Cluster 4.0)

ខេត្តកណ្តាល, – ធនាគារប្រ៊ីដ (BRIDGE Bank PLC) ក្រុមហ៊ុនបារាយណ៍ ក្លូបល មេនើចម៉ិន ឯ.ក(Baray Global Management Co.,ltd) និងក្រុមហ៊ុន…
More

Related Stories


ផ្សេងទៀត


ច្រើនទៀត

ពេញនិយមបំផុត


ច្រើនទៀត

ថ្មីៗ