យោងតាមទិន្នន័យពីក្រុមប្រទេសចំនួន២០ ដែលវិភាគដោយសារព័ត៌មាន Nikkei បានឱ្យដឹងថា ស្ថានភាពពាណិជ្ជកម្មរួមបញ្ចូលគ្នារបស់ប្រទេសចិន ជាមួយសហរដ្ឋអាម៉េរិក ជប៉ុន កូរ៉េខាងត្បូង និងសហភាពអឺរ៉ុបសរុបមានទំហំដល់ទៅ២ទ្រីលានដុល្លារ ដែលស្មើនឹង៣៥% នៃបរិមាណសរុបនៃទំហំពាណិជ្ជកម្មសកល។
យ៉ាងណាមិញ ដោយសារតែសង្រ្គាមពាណិជ្ជកម្ម បានទាញទម្លាក់ចិនឱ្យធ្លាក់ពីបញ្ជីកំពូលអ្នកនាំចេញទៅកាន់សហរដ្ឋអាម៉េរិក ហើយបានជំនួសដោយប្រទេសម៉ិកស៊ិក កាលពីឆ្នាំ២០២៣ ហើយពេលនេះសហរដ្ឋអាម៉េរិក កំពុងបង្កើនការនាំចូលគ្រឿងអេឡិចត្រូនិក និងផលិតផលផ្សេងទៀតពីកន្លែងផ្សេងជំនួសឱ្យប្រទេសចិន។
ស្ថិតិបានបង្ហាញថា ការនាំចូលស្មាតហ្វូនរបស់អាម៉េរិកពីប្រទេសចិនបានធ្លាក់ចុះប្រហែល ១០% នៅក្នុងរយៈពេល១១ខែឆ្នាំ២០២៣កន្លងទៅ ខណៈដែលការនាំចូលពីប្រទេសឥណ្ឌា បានកើនឡើងគួរឲ្យកត់សំគាល់។ ការនាំចូលកុំព្យូទ័រយួរដៃពីប្រទេសចិន បានធ្លាក់ចុះប្រហែល៣០% ខណៈដែលការនាំចូលពីប្រទេសវៀតណាមបានកើនឡើង៤ដង។
អត្ថបទគួរអាន
សង្រ្គាមពាណិជ្ជកម្មរវាងអាម៉េរិក និងចិន បានចាប់ផ្តើមនៅឆ្នាំ២០១៨ ក្រោមការគ្រប់គ្រងរបស់លោក ដូណាល់ ត្រាំ ដោយទីក្រុងវ៉ាស៊ីនតោន បានដំឡើងពន្ធលើការនាំចូលទំនិញមួយចំនួនរបស់ចិន។ រដ្ឋបាលលោកប្រធានាធិបតី ចូ បៃដិន បានបន្តអនុវត្តគោលនយោបាយនេះ និងជំរុញឱ្យប្រទេសសម្ព័ន្ធមិត្តពង្រឹងផលិតកម្មរបស់ខ្លួន ដើម្បីជួយអាមេរិកឱ្យផ្លាស់ប្តូរខ្សែច្រវាក់ផ្គត់ផ្គង់បន្ថែមទៀតទៅកាន់ប្រទេសជាមិត្ត ជាពិសេសគឺជប៉ុន និងកូរ៉េខាងត្បូង។
ស្ថិតិបានបង្ហាញថា ការនាំចេញរបស់ជប៉ុន និងកូរ៉េខាងត្បូង ទៅកាន់ប្រទេសចិនបានធ្លាក់ចុះ ខណៈសហរដ្ឋអាម៉េរិក បានក្លាយជាគោលដៅធំបំផុតសម្រាប់ការនាំចេញរបស់ជប៉ុន កាលពីឆ្នាំមុនជាលើកដំបូងក្នុងរយៈពេល៤ឆ្នាំ ដោយបានវ៉ាដាច់ប្រទេសចិន។ ការនាំចេញរបស់កូរ៉េខាងត្បូង ប្រចាំខែទៅអាម៉េរិក ក៏មានចំនួនច្រើនជាងការនាំចេញទៅប្រទេសចិនជាលើកដំបូងក្នុងរយៈពេល២០ឆ្នាំ កាលពីអំឡុងខែធ្នូ កន្លងទៅផងដែរ។
ជាមួយគ្នានេះ សូម្បីអឺរ៉ុបដែលមានទំនាក់ទំនងពាណិជ្ជកម្មខ្លាំងជាមួយចិន ក៏ហាក់មានទំហំថយក្រោយ។ ប្រទេសចិនបានធ្លាក់ចុះមកនៅលេខរៀងទី៣ក្នុងចំណោមអ្នកនាំចេញទៅកាន់ចក្រភពអង់គ្លេសសម្រាប់រយៈពេលពីខែមករា ដល់ខែវិច្ឆិកា ឆ្នាំ២០២៣។
យ៉ាងណាមិញ ការនាំចូលរបស់អាល្លឺម៉ង់ពីប្រទេសចិន បានធ្លាក់ចុះ១៣% នៅក្នុងឆ្នាំ២០២៣ នៅពេលដែលរដ្ឋាភិបាលរបស់អធិការបតី អូឡាហ្វ ស្កូល ( Olaf Scholz) បានប្រកាន់ជំហរតឹងរ៉ឹងលើទីក្រុងប៉េកាំង៕
ដោយៈ សរ សុជាតិ
None
