តើការបង្កភាពចលាចលរបស់ជនជាតិចិន មួយចំនួន នៅមួយរយៈចុងក្រោយ អាចជះផលអវិជ្ជមានយ៉ាងណាដល់សង្គម និងសេដ្ឋកិច្ចកម្ពុជា?

លោកបណ្ឌិត ហុង វណ្ណៈ អ្នកជំនាញសេដ្ឋកិច្ច នៃវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា យល់ឃើញថា សកម្មភាពបង្កភាពចលាចលដោយក្រុមជនជាតិចិន មួយចំនួន នៅមួយរយៈចុងក្រោយនេះចង់ ឬមិនចង់វានឹងធ្វើឱ្យប៉ះពាល់ដល់បញ្ហាសន្តិសុខ ការវិនិយោគ និងការធ្វើដំណើរកម្សាន្តរបស់ភ្ញៀវទេសចរជាតិ និងអន្តរជាតិ ហើយបានបង្កឱ្យប្រជាពលរដ្ឋកើតក្ដីព្រួយបារម្ភ​ផងដែរ។ បើតាមការអះអាងរបស់អ្នកជំនាញរូបនេះ រដ្ឋាភិបាលបានយកចិត្តទុកដាក់យ៉ាងខ្លាំងចំពោះករណីបង្កចលាចលដោយជនជាតិចិននេះ ហើយក៏មានគោលនយោបាយភូមិ ឃុំមានសុវត្ថិភាព ដែលបានដាក់ចេញដោយក្រសួងមហាផ្ទៃ កាលពីកន្លងទៅផងដែរ។ សម្រាប់អ្នកជំនាញរូបនេះ ក្រុមជនជាតិចិន ដែលបានបង្កចលាចលនៅកម្ពុជា គឺមានចំនួនមួយក្តាប់តូចតែប៉ុណ្ណោះ។

​ជាមួយគ្នានេះ លោក អំ សំអាត នាយកប្រតិបត្តិអង្គការសិទ្ធិមនុស្សលីកាដូ យល់ឃើញថា តាមរយៈបទដែលជនបរទេសជាជនជាតិចិន មួយចំនួន បានប្រព្រឹត្តិបទល្មើសនៅក្នុងប្រទេសកម្ពុជា កន្លងមកនេះ រាជរដ្ឋាភិបាល គួរតែពិនិត្យលើច្បាប់ ស្ដីពីជនអន្តោប្រវេសន៍ឱ្យបានតឹងរឹងបន្ថែមទៀត ដើម្បីទប់ស្កាត់លំហូរចូលនៃជនបរទេសខុសច្បាប់។ បន្ថែមលើនេះ អាជ្ញាធរមានសមត្ថកិច្ចគួរតែគ្រប់គ្រងជនជាតិចិន ឱ្យបានល្អមួយកម្រិតទៀត ដើម្បីជៀសវាងការប្រព្រឹត្តិបទល្មើសនាំឱ្យប៉ះពាល់ដល់សុវត្ថិភាព សណ្ដាប់ធ្នាប់ និងសន្តិសុខក្នុងសង្គម។ លោក អំ សំអាត បានគូសបញ្ជាក់ថា សកម្មភាព និងបទល្មើសដែលកើតចេញពីក្រុមជនជាតិចិន ទាំងនោះ កាន់តែច្រើនឡើង នាំឱ្យប៉ះពាល់ដល់វិស័យទេសចរណ៍ និងសេដ្ឋកិច្ចរបស់ប្រជាពលរដ្ឋ ក៏ដូចជាវិនិយោគិនបរទេស។

​គួរបញ្ជាក់ថា កាលពីកន្លងទៅនេះ សមត្ថកិច្ចធ្លាប់បានចុះបង្រ្កាប និងចាប់ខ្លួនជនជាតិចិន ដែលបានប្រព្រឹត្តិបទល្មើសជាហូរហែ ដូចជាករណីសង្ស័យចាប់មនុស្សញាត់វ៉ាលី ដើម្បីជំរិតទារប្រាក់ ករណីថ្នាំញៀនជិត៥០គីឡូក្រាម ករណីបាញ់គ្នានៅមជ្ឈមណ្ឌលរតនៈសម្បត្តិ ទល់មុខព្រលានយន្តហោះអន្តរជាតិភ្នំពេញ និងករណីសម្លាប់នារីខ្មែរយកទៅកប់ដីខ្សាច់ក្បែរផ្សារទំនើប Aeon ៣ ជាដើម៕

អត្ថបទដោយ៖ ជា ម៉ារ៉ា