សេចក្តីថ្លែងការណ៍ពីមន្ទីរបញ្ជកោណមេរិកបានបញ្ជាក់ថា អាមេរិកបានទទួលការយល់ព្រមពីព្រឹទ្ធសភាដើម្បីលក់ប្រព័ន្ធការពារដែនអាកាសតម្លៃ១០០លានដុល្លារទៅឲ្យកោះតៃវ៉ាន់ តបតាមការស្នើសុំរបស់ការិយាល័យតំណាងកោះតៃវ៉ាន់ប្រចាំនៅទីក្រុងវ៉ាស៊ីនតោន តាមរយៈក្រសួងការបរទេសអាមេរិក។ សេចក្តីថ្លែងការណ៍ដដែលបន្ថែមថា ប្រព័ន្ធការពារដែនអាកាសថ្មីនេះ នឹងជួយពង្រឹងសន្តិសុខរបស់កោះតៃវ៉ាន់ និងជួយក្នុងការរក្សាស្ថិរភាពនយោបាយ តុល្យភាពយោធា សេដ្ឋកិច្ច និងវឌ្ឍនភាពក្នុងតំបន់។
សម្រាប់សហរដ្ឋអាមេរិក ការបន្តលក់អាវុធឲ្យកោះតៃវ៉ាន់ គឺជាការបម្រើផលប្រយោជន៍ដល់ដែនកោះមួយនេះ ទាំងផ្នែកសេដ្ឋកិច្ច និងសន្តិសុខ ព្រមទាំងគាំទ្រដល់កិច្ចខិតខំប្រឹងប្រែងរបស់តៃវ៉ាន់ក្នុងការធ្វើទំនើបកម្មកងកម្លាំងប្រដាប់អាវុធរបស់ខ្លួន និងដើម្បីរក្សាបាននូវសមត្ថភាពការពារដែលអាចជឿទុកចិត្តបានមួយ។
ប្រមុខការទូតតៃវ៉ាន់ សម្តែងការស្វាគមន៍ចំពោះការយល់ព្រមលក់អាវុធរបស់អាមេរិកមកឲ្យខ្លួនលើកនេះ។ កោះតៃវ៉ាន់ ចាត់ទុកការលក់អាវុធរបស់អាមេរិកមកឲ្យខ្លួននេះ គឺវាជារឿងដែលគេគួរធ្វើ។ គួរធ្វើក៏ដោយសារតែចិន ចេះតែបន្តការគំរាមកំហែង ពិសេសសកម្មភាពដែនអាកាសដោយយន្តហោះចម្បាំង មកលើតៃវ៉ាន់់។
មន្ត្រីជាន់ខ្ពស់ក្រុងតៃប៉ិនិយាយថា នៅចំពោះមុខការបន្តពង្រីកឥទ្ធិពលយោធា និងសកម្មភាពបង្កហេតុមិនល្អរបស់ប្រទេសចិន តៃវ៉ាន់ប្តេជ្ញារក្សាសន្តិសុខជាតិរបស់ខ្លួន ជាមួយនឹងការការពារដ៏រឹងមាំ ហើយបន្តធ្វើការស៊ីជម្រៅ នូវភាពជាដៃគូសន្តិសុខដ៏ជិតស្និទ្ធរវាងតៃវ៉ាន់ និងសហរដ្ឋអាមេរិក។
អត្ថបទគួរអាន
យ៉ាងណាមិញ សម្រាប់ទីក្រុងប៉េកាំង ការបន្តលក់អាវុធ និងកិច្ចសហការផ្នែកយោធាពីសហរដ្ឋអាមេរិក គឺជាការកកូរកកាយស្ថិរភាព និងសន្តិសុខនៅក្នុងតំបន់។ ចិនតែងអះអាងថា កោះតៃវ៉ាន់ជាផ្នែកមួយស្ថិតក្រោមការគ្រប់គ្រងរបស់ខ្លួន ហើយប្តេជ្ញាថា នៅថ្ងៃណាមួយខ្លួននឹងបង្រួបបង្រួមជាមួយកោះតៃវ៉ាន់ឲ្យខាងតែបាន។ តៃវ៉ាន់ថា ខ្លួនចង់បានតែសន្តិភាព និងមិនចង់បង្កសង្គ្រាមជាមួយអ្នកណាឡើយ ប៉ុន្តែក៏នឹងមិននៅស្ងៀមឲ្យគេគំរាមកំហែងនិងជិះជាន់នោះដែរ។
សូមជម្រាបថា កិច្ចព្រមព្រៀងទិញយកប្រព័ន្ធការពារដែនអាកាសពីអាមេរិកលើកនេះ នឹងចូលជាធរមានក្នុងរយៈពេលមួយខែទៀត ខណៈដែលគេអាចទទួលបានប្រព័ន្ធការពារទាំងនេះ នៅក្រោយការចូលជាធរមានតែម្តង។
គ្រប់គ្រងតាមបែបប្រជាធិបតេយ្យកោះតៃវ៉ាន់ បានត្អូញត្អែរម្តងហើយម្តងទៀត ពីសកម្មភាពយន្តហោះចម្បាំងចិនដែលបានហោះចូល ក្នុងតំបន់ការពារដែនអាកាសរបស់ខ្លួនរាប់មិនអស់។ នេះជាផ្នែកមួយ ដែលទីក្រុងវ៉ាស៊ីនតោន មើលឃើញថា ជាការខិតខំប្រឹងប្រែងរបស់ទីក្រុងប៉េកាំងក្នុងការដាក់សម្ពាធលើទីក្រុងតៃប៉ិ ឱ្យទទួលយកការរួបរួមជាមួយចិន។
គួរជម្រាបថា សហរដ្ឋអាមេរិកក៏ដូចជាប្រទេសភាគច្រើនទៀតដែរ មិនមានទំនាក់ទំនង់ការទូតផ្លូវការណាមួយ ជាមួយកោះតៃវ៉ាន់នោះទេ ប៉ុន្តែទីក្រុងវ៉ាស៊ីនតោន គឺជាខ្នងបង្អែកដ៏ធំបំផុតរបស់តៃវ៉ាន់ ពិសេសនៅក្នុងការលក់អាវុធទំនើបៗតែម្តង៕
None
