ទីផ្សារពោតក្រហមឆ្នាំនេះ ប្រសើរជាងឆ្នាំមុន ខណៈប្រទេសថៃកំពុងមានតម្រូវការខ្ពស់សម្រាប់ផលិតចំណីសត្វ
ទីផ្សារពោតក្រហមរបស់កសិករខ្មែរសម្រាប់ឆ្នាំ២០២២នេះ ហាក់បីដូចមានទីផ្សារល្អប្រសើរឡើងវិញ ពោលគឺមានតម្លៃចន្លោះ១ ៣០០រៀល ទៅ១ ៤០០រៀល ក្នុង១គីឡូក្រ…
ការព្រមានកាលពីថ្ងៃអង្គារ ដែលថារុស្ស៊ីអាចនឹងជ្រើសរើសប្រើអាវុធនុយក្លេអ៊ែរនោះ បានធ្វើឡើង ពីសំណាក់ប្រធានស៊ើបការណ៍សម្ងាត់អាមេរិក ក្នុងការធ្វើសេចក្តីសង្ខេបប្រាប់ទៅកាន់ព្រឹទ្ធសភាអាមេរិក ស្តីពីបញ្ហាដែលកំពុងគំរាមកំហែងទូទាំងពិភពលោក។
លោកស្រី Avril Haines នាយកផ្នែកស៊ើបការណ៍ជាតិអាមេរិក បានធ្វើការវិភាគព្យាករសម្រាប់អ៊ុយក្រែនថា សង្គ្រាមលើកនេះជាសង្គ្រាមដ៏ធ្ងន់ធ្ងរ និងអូសបន្លាយពេលយូរអង្វែង ហើយ ស្ថានការណ៍ក្នុងសង្គ្រាមមួយនេះ ប្រឈមមុខនឹងភាពប្រែប្រួលកាន់តែខ្លាំងឡើង។
លោកស្រី Haines នាយកផ្នែកស៊ើបការណ៍ជាតិអាមេរិក បានបញ្ជាក់ច្បាស់ៗទៅកាន់ព្រឹទ្ធសភាអាមេរិកថា «ស្ថានការណ៍អាចប្រែប្រួលគ្រប់ពេល សូម្បីតែពេលដែលយើងកំពុងនិយាយគ្នានេះក្ដី។» លោកស្រីបន្តថា លោកពូទីនអាចនឹងចាត់វិធានការបន្ថែម រួមទាំងការចល័តទ័ពកាន់តែច្រើន ការដាក់ចេញច្បាប់អាជ្ញាសឹក ហើយប្រសិនបើមេដឹកនាំរុស្ស៊ីរូបនេះ មានអារម្មណ៍ថា សង្គ្រាមកំពុងស្ថិតទៅរកផ្លូវបរាជ័យ នោះពិភពលោកនឹងមានគ្រោះថ្នាក់កាន់តែខ្លាំង។ គ្រោះថ្នាក់ខ្លាំង នោះគឺសំដៅដល់ ការប្រើប្រាស់ក្បាលគ្រាប់នុយក្លេអ៊ែររបស់ទីក្រុងម៉ូស្គូ ប្រសិនបើលោកពូទីនយល់ថា បរាជ័យនៅអ៊ុយក្រែនអាចគំរាមកំហែងដល់របបដឹកនាំរបស់លោក។
ការព្រមាន ពីមេចារកម្មអាមេរិកបែបនេះ ធ្លាក់មកស្របពេលដែលការប្រយុទ្ធគ្នាឥតស្រាកស្រាន្តបានកើតឡើងនៅភាគខាងកើត និងភាគខាងត្បូងនៃប្រទេសអ៊ុយក្រែន គួបផ្សំនឹងការវាយប្រហារដោយមីស៊ីលរបស់រុស្ស៊ីលើតំបន់ អូដេសា(Odesa)។ អង្គការសហប្រជាជាតិបានប៉ាន់ប្រមាណថា ចំនួនអ្នកស្លាប់ជនស៊ីវិលក្នុងសង្គ្រាម ប្រហែលជាមានខ្ពស់ជាងការប៉ាន់ស្មានផ្លូវការនាពេលបច្ចុប្បន្ន ពោលបច្ចុប្បន្នគេបានប៉ាន់ស្មានថា មានមនុស្សជាង៣ពាន់នាក់បានស្លាប់។
បើតាមនាយកទីភ្នាក់ងារស៊ើបការណ៍សម្ងាត់ជាតិអាមេរិកដដែលនេះ លោកពូទីននឹងបន្តធ្វើទំនើបកម្មមីស៊ីលផ្ទុកគ្រាប់នុយក្លេអ៊ែរបន្ថែមទៀត ដូចដែលលោកទើបបានសាកល្បងដោយជោគជ័យកាលពីមួយរយៈមុន នូវមីស៊ីលប្រភេទថ្មី។ លោកពូទីនធ្វើដូចនេះ គឺជាការគំរាម និងរារាំងសហរដ្ឋអាមេរិក ក៏ដូចជាសម្ព័ន្ធមិត្តពីការគាំទ្រផ្នែកយោធាបន្ថែមទៀត សម្រាប់អ៊ុយក្រែន។
គួររំឭកថា ក្តីបារម្ភរបស់លោកខាងលិចចំពោះហានិភ័យនៃសង្គ្រាមនុយក្លេអ៊ែរបានកើនឡើងបន្ទាប់ពីលោកពូទីនបានចាប់ផ្តើមការលុកលុយអ៊ុយក្រែនកាលពីថ្ងៃទី២៤ខែកុម្ភៈ ជាមួយនឹងការដាក់បញ្ជាឲ្យកងកម្លាំងនុយក្លេអ៊ែររបស់ទីក្រុងម៉ូស្គូប្រុងជើងការខ្ពស់ ហើយថែមទាំងបានព្រមានចំៗថា ការប៉ុនប៉ងជ្រៀតជ្រែករបស់នរណាម្នាក់ក្នុងសង្គ្រាមនេះ នឹងនាំមកនូវផលវិបាកដែលពួកគេមិនធ្លាប់ជួបប្រទះនៅក្នុងប្រវត្តិរបស់ពួកគេផងដែរ។
ភាគីរុស្ស៊ីបាននិយាយកាលពីខែមុនថា ខ្លួនគ្រោងនឹងដាក់ពង្រាយកាំជ្រួចមីស៊ីលឆ្លងទ្វីបឈ្មោះ Sarmat ដែលទើបនឹងសាកល្បងដោយជោគជ័យ មានសមត្ថភាពអាចផ្ទុកក្បាលគ្រាប់នុយក្លេអ៊ែរអាចបាញ់ដល់ទឹកដីសហរដ្ឋអាមេរិក នៅក្នុងរដូវស្លឹកឈើជ្រុះខាងមុខ៕
