លោក អាន់តូនី ប្លីងខិន (Antony Blinken) រដ្ឋមន្ត្រីការបរទេសអាម៉េរិកបានប្រាប់អ្នកកាសែតនៅបន្ទាប់ពីកិច្ចប្រជុំពីរបូកពីរ នៃរដ្ឋមន្ត្រីការបរទេស និងការពារជាតិរបស់អាម៉េរិក និងកូរ៉េខាងត្បូងថា មានកងទ័ពកូរ៉េខាងជើងប្រហែល១ម៉ឺននាក់កំពុងស្ថិតនៅក្នុងប្រទេសរុស្ស៊ី ហើយក្នុងចំណោមកងទ័ពទាំងនេះ មាន៨ពាន់នាក់ត្រូវបានបញ្ជូនទៅកាន់តំបន់ឃើសជាប់ព្រំដែនប្រទេសអ៊ុយក្រែន។
ទោះបីអាម៉េរិកមិនទាន់បានឃើញកងទ័ពកូរ៉េខាងជើងទាំងនេះបានចូលរួមប្រយុទ្ធតទល់នឹងកងកម្លាំងអ៊ុយក្រែនក៏ពិតមែន តែរដ្ឋមន្ត្រីការបរទេសរូបនេះវាយតម្លៃថា ការប្រយុទ្ធនេះអាចនឹងកើតឡើងនៅប៉ុន្មានថ្ងៃខាងមុខនេះ។ ជាមួយគ្នានេះ រដ្ឋមន្ត្រីការពារជាតិអាម៉េរិក លោក ឡយ អូស្ទីន (Lloyd Austin) បានអះអាងថា កងកម្លាំងរបស់រុស្ស៊ីបានហ្វឹកហ្វឺនទាហានកូរ៉េខាងជើងទាំងនេះពីប្រតិបត្តិការវាយប្រហារដោយកាំភ្លើងធំ យន្តហោះដ្រូន និងថ្មើរជើង រួមទាំងការបោសសម្អាតលេណដ្ឋានផងដែរ។
លោក អូស្ទីន បានបន្ថែមថា វិមានក្រឹមឡាំងក៏បានបំពាក់កងទ័ពកូរ៉េខាងជើងទាំងនេះជាមួយឯកសណ្ឋាន និងឧបករណ៍របស់រុស្ស៊ីផងដែរ ហើយថា ទាំងអស់នេះបានបង្ហាញឱ្យឃើញថា រុស្ស៊ីមានបំណងប្រើប្រាស់កងកម្លាំងបរទេសទាំងនេះនៅក្នុងប្រតិបត្តិការជួរមុខ។ រដ្ឋមន្ត្រីការពារជាតិរូបនេះបានគូសបញ្ជាក់ទៀតថា ប្រសិនបើកងទ័ពកូរ៉េខាងជើងទាំងនេះបានចូលរួមក្នុងប្រតិបត្តិការប្រយុទ្ធ ឬគាំទ្រការប្រយុទ្ធប្រឆាំងនឹងអ៊ុយក្រែនមែន នោះពួកគេនឹងក្លាយជាដៃគូយោធាស្របច្បាប់របស់រុស្ស៊ីជាក់ជាមិនខាន។
ដោយឡែក រដ្ឋមន្ត្រីការពារជាតិកូរ៉េខាងត្បូង លោក គីម យ៉ុងយ៉ាន់ (Kim Yong-hyun) បានប្រាប់អ្នកសារព័ត៌មានថា កូរ៉េខាងជើងបានបញ្ជូនកាំជ្រួចជាង១ពាន់គ្រាប់ទៅកាន់ប្រទេសរុស្ស៊ី។
បើតាមការអះអាងរបស់លោក Blinken កងទ័ពរុស្ស៊ីបានស្លាប់ និងរបួសប្រហែល១ពាន់២រយនាក់ក្នុង១ថ្ងៃ ហើយនេះជាលើកដំបូងក្នុងរយៈពេល១០០ឆ្នាំ ដែលរុស្ស៊ីបានអញ្ជើញទាហានបរទេសឱ្យចូលមកក្នុងប្រទេសខ្លួន។ រដ្ឋមន្ត្រីការបរទេសអាម៉េរិករូបនេះបាននិយាយថា លោក និងសមភាគីកូរ៉េខាងត្បូងស្នើឱ្យប្រទេសចិនគួរធ្វើការបន្ថែមទៀត ដើម្បីទប់ស្កាត់សកម្មភាពបង្កហេតុរបស់កូរ៉េខាងជើង និងបញ្ឈប់ការគាំទ្រសម្រាប់មូលដ្ឋានឧស្សាហកម្មការពារជាតិរបស់រុស្ស៊ី៕
អត្ថបទ៖ សុខ មង្គល
