ម៉ាឡេស៊ី និងសិង្ហបុរី កំពុងពន្លឿនការដាក់ឱ្យដំណើរការតំបន់សេដ្ឋកិច្ចពិសេសរួមគ្នាខ្នាតយក្ស
ដែលជាប្រទេសជាប់ភូមិផងរបងជាមួយគ្នាកំពុងពន្លឿនការដាក់ឱ្យដំណើរការគម្រោងតំបន់សេដ្ឋកិច្ចពិសេសខ្នាតយក្សរួមគ្នា ដែលគ្រប់ដណ្ដប់លើផ្ទៃដីរហូតដល់ទៅជ…
លោក ស្កុត បេសេន រដ្ឋមន្ត្រីក្រសួងរតនាគារអាម៉េរិក បានរិះគន់យ៉ាងចាស់ដៃចំពោះប្រតិបត្តិការរបស់ធនាគារពិភពលោក និងមូលនិធិរូបិយវត្ថុអន្តរជាតិ បើទោះបីជាលោកបានព្យាយាមធានាដល់អ្នកវិនិយោគ ដែលមានការភ័យខ្លាចពាក់ព័ន្ធនឹងការខិតខំរក្សាតួនាទីជាអ្នកដឹកនាំពិភពលោករបស់ខ្លួនក៏ដោយ។ រដ្ឋមន្ត្រីរូបនេះ បានថ្លែងសុន្ទរកថា ទៅកាន់វិទ្យាស្ថានហិរញ្ញវត្ថុអន្តរជាតិថា គោលនយោបាយគិតផលប្រយោជន៍អាម៉េរិកជាធំ ឬ American First របស់អាម៉េរិក មិនមែនមានន័យថា អាម៉េរិកត្រូវនៅតែម្នាក់ឯងនោះទេ។ ទន្ទឹមនឹងនេះ លោក ក៏បានអំពាវនាវឱ្យមានកិច្ចសហការកាន់តែស៊ីជម្រៅ និងការគោរពគ្នាទៅវិញទៅមកក្នុងចំណោមដៃគូពាណិជ្ជកម្មនានា ផងដែរ។
លោក បេសេន បានលើកឡើងថា មូលនិធិរូបិយវត្ថុអន្តរជាតិ IMF និងធនាគារពិភពលោកហាក់ខ្វះខាតលើការគ្រប់គ្រង ដែលទាមទារឱ្យមានការធ្វើកំណែទម្រង់បន្ថែមទៀត ប៉ុន្តែលោកមិនបានអំពាវនាវឱ្យសហរដ្ឋអាម៉េរិក ដកខ្លួនចេញពីស្ថាប័នហិរញ្ញវត្ថុកំពូលទាំងពីរនេះនោះទេ។ ទន្ទឹមនឹងរិះគន់លោកបានលើកសរសើរថា ស្ថាប័នហិរញ្ញវត្ថុទាំងពីរនេះបានដើរតួនាទីយ៉ាងសំខាន់នៅក្នុងប្រព័ន្ធហិរញ្ញវត្ថុអន្តរជាតិ ហើយរដ្ឋបាលលោក ត្រាំ នឹងខ្នះខ្នែងធ្វើការជាមួយស្ថាប័នទាំងពីរនេះ ដរាបណាស្ថាប័នទាំងពីរអាចរក្សាបានភាពស្មោះត្រង់ចំពោះបេសកកម្ម និងការទទួលខុសត្រូវរបស់ពួកគេ។
មូលនិធិរូបិយវត្ថុអន្តរជាតិ ត្រូវបានគេដឹងថា ជាស្ថាប័នហិរញ្ញវត្ថុដ៏សំខាន់មួយនៅលើពិភពលោក ដែលគាំទ្រដោយប្រទេសចំនួន១៩១។ IMF ត្រូវបានបង្កើតឡើងនៅថ្ងៃទី២២ ខែកក្កដា ឆ្នាំ១៩៤៤ ដោយមានមូលដ្ឋាននៅទីក្រុងវ៉ាស៊ីនតោន។ ដោយឡែក ធនាគារពិភពលោកវិញ គឺជាស្ថាប័នហិរញ្ញវត្ថុដែលផ្តល់កម្ចីនិងជំនួយឥតសំណងដល់រដ្ឋាភិបាលរបស់ប្រទេសក្រីក្រ និងមានចំណូលទាប ដែលបានបង្កើតឡើងនៅថ្ងៃទី៧ ខែកក្កដា ឆ្នាំ១៩៤៤ មានទីស្នាក់ការនៅទីក្រុងវ៉ាស៊ីតោន ដូចគ្នាដែរ៕
ដោយៈ សរ សុជាតិ
