លោក ត្រាំ បានលើកយកបញ្ហាការធ្វើពាណិជ្ជកម្មដោយយុត្តិធម៌ ទៅជជែកជាមួយមេដឹកនាំឥណ្ឌា

លោក ដូណាល់ ត្រាំ ប្រធានាធិបតីសហរដ្ឋអាម៉េរិក និងលោក ណារិនដ្រា ម៉ូឌី នាយករដ្ឋមន្ត្រីឥណ្ឌាបានជួបសន្ទនាគ្នាតាមទូរសព្ទ ដើម្បីពង្រឹង និងពង្រីកកិច្ចសហប្រតិបត្តិការ និងបញ្ហាមួយចំនួនរួមទាំងសន្តិសុខនៅតំបន់ឥណ្ឌូ-ប៉ាស៊ីហ្វិក មជ្ឈិមបូព៌ា និងអឺរ៉ុប ផងដែរ។ នេះបើតាមការអះអាងរបស់មន្ត្រីជាន់ខ្ពស់របស់សេតវិមាន។

ជាមួយគ្នានេះ មេដឹកនាំទាំងពីរ ក៏បានពិភាក្សាគ្នាពីគម្រោងដំណើរទស្សនកិច្ចរបស់លោក ម៉ូឌី ទៅកាន់សេតវិមានផងដែរ។ អ្នកការទូតឥណ្ឌា និងអាម៉េរិក កំពុងព្យាយាមរៀបចំឱ្យមានជំនួបរវាងមេដឹកនាំទាំងពីរនេះនៅដើមខែកុម្ភៈ ខាងមុខនេះ។

បើតាមការអះអាងរបស់មន្ត្រីសេតវិមាននៅក្នុងកិច្ចពិភាក្សាខាងលើ លោក ដូណាល់ ត្រាំ បានសង្កត់ធ្ងន់លើសារសំខាន់របស់ឥណ្ឌាក្នុងការបង្កើនការទិញឧបករណ៍សន្តិសុខផលិតដោយអាម៉េរិក និងដំណើរឆ្ពោះទៅរកទំនាក់ទំនងពាណិជ្ជកម្មទ្វេភាគីដោយយុត្តិធម៌។

សហរដ្ឋអាម៉េរិក ជាដៃគូពាណិជ្ជកម្មធំបំផុតរបស់ឥណ្ឌា ហើយពាណិជ្ជកម្មទ្វេភាគីរវាងប្រទេសទាំងពីរបានកើនដល់ជាង១១៨ពាន់លានដុល្លារ នៅក្នុងឆ្នាំ២០២៣ និងឆ្នាំ២០២៤ ក្នុងនោះឥណ្ឌា មានអតិរេកពាណិជ្ជកម្មជាមួយអាម៉េរិក ប្រមាណ៣២ពាន់លានដុល្លារ។

ឥណ្ឌា ក៏ជាដៃគូយុទ្ធសាស្ត្រដ៏សំខាន់មួយរបស់អាម៉េរិក ក្នុងការទប់ទល់ជាមួយប្រទេសចិន ដោយកាលពីពេលថ្មីៗលោក ម៉ូឌី បានហៅលោក ត្រាំ ថា ជាមិត្តជាទីស្រឡាញ់មួយរូបរបស់លោក ហើយថា លោក និងលោក ត្រាំ បានប្តេជ្ញាចិត្តចំពោះភាពជាដៃគូ ដែលផ្ដល់អត្ថប្រយោជន៍ដល់គ្នាទៅវិញទៅមកដ៏គួរឱ្យទុកចិត្តបាន៕

អត្ថបទ៖ សុខ មង្គល