អ្នកជំនាញសេដ្ឋកិច្ចព្រមានថា អត្រាអតិផរណានៅអាម៉េរិកនឹងហក់ឡើងខ្ពស់ ក្រោយពន្ធរបស់លោក ត្រាំ ចាប់ផ្តើមអនុវត្តនៅខែក្រោយ

តម្លៃទំនិញ និងសេវាកម្មដោយមិនរាប់បញ្ចូលតម្លៃអាហារ និងថាមពល បានកើនឡើង០,៣% នៅក្នុងខែមិថុនា ដែលជាការកើនឡើងខ្ពស់បំផុតក្នុងរយៈពេល៥ខែកន្លងមកនេះ ដែលកត្តានេះជំរុញឱ្យអត្រាអតិផរណាជារួមនៅសហរដ្ឋអាម៉េរិក កើនដល់២,៩%។ នេះបើយោងតាមរបាយការណ៍ស្ទង់មតិដែលធ្វើឡើងដោយសារព័ត៌មាន Bloomberg។

ក្រុមអ្នកជំនាញសេដ្ឋកិច្ចជឿជាក់ថា ពលរដ្ឋអាម៉េរិកនឹងពើបប្រទះនឹងការកើនឡើងថ្លៃទំនិញបន្ថែមទៀតនៅប៉ុន្មានខែចុងក្រោយនៅឆ្នាំ២០២៥នេះ ពោលគឺបន្ទាប់ពីរដ្ឋបាល លោក ដូណាល់ ត្រាំ ចាប់ផ្តើមអនុវត្តការយកពន្ធខ្ពស់លើទំនិញរបស់ប្រទេសនានា ចាប់ពីថ្ងៃទី១ ខែសីហា តទៅ ដោយសារវិធានការពន្ធនេះនឹងធ្វើឱ្យការចំណាយរបស់ក្រុមហ៊ុននាំចូលមានការកើនឡើង។ តួលេខលក់រាយដែលបានចេញផ្សាយកាលពីពេលថ្មីៗ ត្រូវបានគេរំពឹងថា នឹងបង្ហាញពីការកើនឡើងតិចតួចនៅក្នុងខែមិថុនា បន្ទាប់ពីបានធ្លាក់ចុះពីរខែជាប់គ្នា។

ស្របពេលតម្រូវការប្រើប្រាស់មាននិន្នាការធ្លាក់ចុះដូចទីផ្សារការងារដែរនោះ វានឹងជំរុញឱ្យមន្ត្រីធនាគារកណ្តាលអាម៉េរិក បិទការបញ្ចុះអត្រាការប្រាក់ ដោយសារពួកគេព្រួយបារម្ភថា ការយកពន្ធខ្ពស់នឹងធ្វើឱ្យអត្រាអតិផរណានៅសហរដ្ឋអាម៉េរិក កើនឡើងក្នុងល្បឿនលឿន។ អ្នកបង្កើតគោលនយោបាយរបស់ធនាគារកណ្តាលអាម៉េរិកនឹងជួបប្រជុំគ្នាជាថ្មីទៀតនៅថ្ងៃទី២៩-៣០ ខែកក្កដា នេះ៕

ដោយ៖ សុខ មង្គល