អាម៉េរិក កំពុងបន្ធូរបន្ថយច្បាប់ ដើម្បីឱ្យធនាគារធំៗចាក់បញ្ចូលសាច់ប្រាក់២៩ទ្រីលានដុល្លារទៅក្នុងទីផ្សារហិរញ្ញវត្ថុ

រដ្ឋបាលប្រធានាធិបតីសហរដ្ឋអាម៉េរិក លោក ដូណាល់ ត្រាំ កំពុងរៀបចំដើម្បីបន្ធូរបន្ថយច្បាប់ដែលបានដាក់លើធនាគារធំៗតាំងតែពីវិបត្តិហិរញ្ញវត្ថុពិភពលោកឆ្នាំ២០០៨ សំដៅបើកផ្លូវឱ្យធនាគារធំៗបញ្ចេញសាច់ប្រាក់ចូលទៅក្នុងប្រព័ន្ធសេដ្ឋកិច្ច ដើម្បីជួយស្រោចស្រង់សេដ្ឋកិច្ចអាម៉េរិក ដែលបានធ្លាក់ចុះកំណើន០,២% នៅត្រីមាសទី១ ឆ្នាំនេះ។ ការធ្លាក់ចុះកំណើនសេដ្ឋកិច្ចរបស់អាម៉េរិកនេះ គឺដោយសារការកើនឡើងការនាំចូលទំនិញពីបរទេសមកកាន់ទីផ្សារសហរដ្ឋអាម៉េរិក ពីសំណាក់ក្រុមហ៊ុននានា នៅក្នុងអំឡុងពេលរដ្ឋបាលលោក ត្រាំ ពន្យារពេលអនុវត្តពន្ធបដិការលើប្រទេសនានា ចំនួន៩០ថ្ងៃ និងការទម្លាក់ពន្ធលើទំនិញចិន មកនៅត្រឹម៣០%។

ពាក់ព័ន្ធបញ្ហានេះ លោក ស្កុត បេសេន ( Scott Bessent) រដ្ឋមន្រ្តីរតនាគារសហរដ្ឋអាម៉េរិក បានអះអាងថា និយ័តករអាម៉េរិក អាចបន្ធូរបន្ថយច្បាប់ដែលជាឧបសគ្គលើការជួញដូររបស់ធនាគារនៅក្នុងទីផ្សារហិរញ្ញវត្ថុដែលមានតម្លៃដល់ទៅប្រមាណ២៩ទ្រីលានដុល្លារ។

ស្ថាប័នដែលកំពុងតែធ្វើកិច្ចការខាងលើ រួមមាន ធនាគារកណ្តាល ការិយាល័យត្រួតពិនិត្យរូបិយប័ណ្ណ និងសាជីវកម្មធានារ៉ាប់រងប្រាក់បញ្ញើសហព័ន្ធ។ តែយ៉ាងណាស្ថាប័នទាំង៣នេះមិនបានបញ្ជាក់ព័ត៌មានលម្អិតជុំវិញផែននេះនោះទេ៕

ដោយៈ សរ សុជាតិ