ផលិតផលក្នុងស្រុកសរុបរបស់ចិនមានកំណើន៥.៤%នៅក្នុងត្រីមាសដំបូង ខណៈសង្គ្រាមពន្ធធ្វើឱ្យទស្សនវិស័យស្រពិចស្រពិល
សេដ្ឋកិច្ចរបស់ប្រទេសចិនមានកំណើន៥.៤%ក្នុងរយៈពេល៣ខែដំបូងនៃឆ្នាំនេះពោលគឺបានកើនលើសពីគោលដៅប្រចាំឆ្នាំរបស់ខ្លួនប្រហែល៥%ដែលអាចបង្ហាញអំពីការស្ទ…
សារព័ត៌មានជាច្រើនបានរាយការណ៍ថា ក្រសួងការបរទេសអាម៉េរិកបានចេញសេចក្ដីជូនដំណឹង ឬម៉េម៉ូទៅកាន់អង្គទូតរបស់ខ្លួននៅជុំវិញពិភពលោកស្ដីពីការកាត់បន្ថយការចំណាយរបស់ខ្លួនឱ្យបាន៥០%សម្រាប់ឆ្នាំសារពើពន្ធ២០២៦។
សេចក្ដីជូនដំណឹងនេះបាននិយាយថា ស្ថិតនៅក្រោមការពិភាក្សាដ៏ម៉ត់ចត់ជាមួយនឹងមន្ត្រីជាន់ខ្ពស់ ក្រសួងការបរទេសនឹងលុបចោលមូលនិធិស្ទើរតែទាំងអស់សម្រាប់អង្គការអន្តរជាតិរួមទាំងអង្គការសហប្រជាជាតិ និងអង្គការណាតូផងដែរ។
ការគាំទ្រផ្នែកហិរញ្ញវត្ថុសម្រាប់ការរក្សាសន្តិភាពអន្តរជាតិនឹងត្រូវបានកាត់បន្ថយរួមជាមួយនឹងការផ្តល់មូលនិធិសម្រាប់ការផ្លាស់ប្តូរផ្នែកអប់រំ និងវប្បធម៌ដូចជាកម្មវិធី Fulbright ដែលជាកម្មវិធីផ្ដល់អាហារូបករណ៍ដ៏មានកិត្យានុភាពបំផុតមួយរបស់សហរដ្ឋអាម៉េរិកផងដែរ។
បើតាមកាសែត The New York Times បានឱ្យដឹងថា សេចក្ដីជូនដំណឹងនេះបាននិយាយថា ក្រសួងការបរទេសនេះនឹងស្នើសុំថវិកាចំនួនជាង២៨ពាន់លានដុល្លារក្នុងឆ្នាំសារពើពន្ធ២០២៦គិតចាប់ពីថ្ងៃទី១ ខែតុលា ពោលគឺតិចជាង២៦ពាន់លានដុល្លារអាម៉េរិកបើធៀបនឹងតួលេខឆ្នាំ២០២៥។
ផែនការនេះបានកើតឡើងស្របពេលដែលប្រធានាធិបតីអាម៉េរិកលោក ដូណាល់ ត្រាំ បានសង្កត់ធ្ងន់លើការចំណាយរបស់រដ្ឋាភិបាល និងការកាត់បន្ថយតួនាទីឈានមុខគេរបស់អាម៉េរិកនៅលើឆាកអន្តរជាតិ។
អ្នកនាំពាក្យក្រសួងការបរទេសអាម៉េរិកលោក ថាមី ប្រ៊ុស (Tammy Bruce) បាននិយាយបន្ធូរបន្ថយស្ថានការណ៍នេះដោយប្រាប់អ្នកកាសែតថា ពេលនេះក្រសួងមិនទាន់សម្រេចអំពីផែនការចុងក្រោយ និងការកំណត់ថវិកាចុងក្រោយនៅឡើយទេ៕
