ថ្នាក់ដឹកនាំកោះតៃវ៉ាន់កាលពីឆ្នាំ២០២០ បានលើកបម្រាម ដោយអនុញ្ញាតឲ្យមានការនាំចូលសាច់គោ និងសាច់ជ្រូកពីអាមេរិកឡើងវិញ ទោះដឹងថា មានសារធាតុគីមី ដែលធ្វើឲ្យប៉ះពាល់ដល់សុខភាពក៏ដោយ។ ប្រការនេះ ត្រូវបានពលរដ្ឋតៃវ៉ាន់ខឹងសម្បារ និងមិនគាំទ្រឡើយ ជាហេតុធ្វើឲ្យពលរដ្ឋតៃវ៉ាន់ បច្ចុប្បន្នបានចេញធ្វើបាតុកម្ម និងចង់បោះឆ្នោតប្រជាមតិ ដើម្បីដាក់បម្រាមបិទខ្ទប់ការនាំចូលនេះឡើងវិញ។ នេះបើតាមការចុះផ្សាយដោយសារព័ត៌មានជប៉ុន Nikkei។
គេនៅចាំបានថា ក្រោយពីមានផ្ទុះជំងឺលើសត្វគោ និងជ្រូក នៅសហរដ្ឋអាមេរិក កាលពីឆ្នាំ២០០០មក កោះតៃវ៉ាន់បានដាក់រនាំងហាមមិនឱ្យនាំសាច់គោអាមេរិកចូលក្នុងដែនកោះរបស់ខ្លួនទេ។ ប៉ុន្តែទើបនៅចុងឆ្នាំ២០២០ កោះតៃវ៉ាន់បានលើកបម្រាមទាំងនោះចេញវិញ។ ប្រការនេះ ធ្វើឲ្យសាច់ជ្រូកអាមេរិកដែលចិញ្ចឹមដោយប្រើ ថ្នាំគីមី រ៉េកតូប៉ាមីន (ractopamine) បំប៉ន អាចជ្រៀតចូលក្នុងទីផ្សារតៃវ៉ាន់បានឡើងវិញដែរ។
រ៉េកតូប៉ាមីន (ractopamine) ជាសារធាតុគីមីបំប៉នសត្វ ដែលធ្វើឱ្យសត្វ ធាត់ទ្រលក់ទ្រលន់សាច់ពេញ មានប្រើប្រាស់ច្រើនក្នុងកសិកម្មចិញ្ចឹមសត្វនៅតំបន់អាមេរិកខាងជើង តែថ្នាំនេះត្រូវជាប់បម្រាមមិនឱ្យប្រើប្រាស់ទេ នៅតំបន់អឺរ៉ុប ប្រទេសរុស្ស៊ី និងនៅប្រទេសចិន ហើយតៃវ៉ាន់ក៏ធ្លាប់ហាមឃាត់ដែរ ពីមុនមក។ គួររំឭកថា តៃវ៉ាន់ពីមុនមក មានច្បាប់សុវត្ថិភាពនាំចូលសាច់តឹងតែងណាស់។ ជាច្បាប់ដែលគិតគូរខ្លាំងដល់សុខភាពអ្នកប្រើប្រាស់។អត្ថបទគួរអាន
ប៉ុន្តែដោយសារតែឥទ្ធិលនយោបាយ និងទំនាក់ទំនងជាមួយអាមេរិក ក្រុងតៃប៉ិ ក្រោមការគ្រប់គ្រងរបស់លោកស្រី សៃ អ៊ីងវិន កាលពីចុងឆ្នាំ២០២០ បានលើកបម្រាមនេះចេញខ្លះ ជាហេតុធ្វើឲ្យពលរដ្ឋតៃវ៉ាន់ជាច្រើនមិនសប្បាយចិត្ត និងបានចេញតាមផ្លូវធ្វើបាតុកម្មប្រឆាំង។ មកទល់នឹងពេលនេះ ពលរដ្ឋតៃវ៉ាន់បានសម្រេចចាប់ផ្តើមបោះឆ្នោតប្រជាមតិនៅរៀងរាល់ថ្ងៃសៅរ៍សម្រាប់រយៈពេល ៤សប្តាហ៍ជាប់ៗគ្នា ដើម្បីបង្ហាញការមិនពេញចិត្តដល់ចំណាត់ការរបស់ក្រុងតៃប៉ិ និងចង់ស្នើឲ្យមានការហាមឃាត់ការនាំចូលសាច់ជ្រូកពីអាមេរិកឡើងវិញ។
គួរកត់សម្គាល់ថា លទ្ធផលបានពីការបោះឆ្នោតប្រជាមតិ នឹងជះឥទ្ធិពលមិនល្អ ដល់សំណើរបស់តៃវ៉ាន់ ដើម្បីចូលរួមក្នុងកិច្ចព្រមព្រៀង CP TPP បើទោះជា អាមេរិកលែងជាមាជិកហើយក្តី ប៉ុន្ដែនៅមានសម្ព័ន្ធមិត្តរបស់អាមេរិកជាច្រើនទៀតនៅជាសមាជិកនៃកិច្ចព្រមព្រៀងនេះ។ បន្ថែមពីលើនេះ វាក៏អាចប៉ះពាល់ដល់ទំនាក់ទំនងមួយផ្នែករវាងទីក្រុងតៃប៉ិ និងវ៉ាស៊ីនតោនផងដែរ។ នេះបើតាមការអះអាងពីអ្នកជំនាញរបស់តៃវ៉ាន់៕None
