ក្រុមហ៊ុន Google ដែលជាបុត្រសម្ព័ន្ធរបស់ក្រុមហ៊ុនមេ Alphabet បានចេញសេចក្តីថ្លែងការណ៍ថា មជ្ឈមណ្ឌលរក្សាទុកទិន្នន័យដែលមានទីតាំងស្ថិតនៅចម្ងាយជាង២៤គីឡូម៉ែត្រពីភាគខាងជើង នៃទីក្រុងឡុងដ៍ ចក្រភពអង់គ្លេស ខាងលើនេះនឹងត្រូវបានសាងសង់លើផ្ទៃដី១៣ហិកតា ដែលខ្លួនបានទិញក្នុងឆ្នាំ២០២០។
រដ្ឋាភិបាលអង់គ្លេស ដែលកំពុងជំរុញឱ្យក្រុមហ៊ុនសហគ្រាសនានាបង្កើនការវិនិយោគដើម្បីជួយផ្តល់ហិរញ្ញប្បទានដល់ហេដ្ឋារចនាសម្ព័ន្ធថ្មីៗ ជាពិសេសក្នុងឧស្សាហកម្មដូចជាបច្ចេកវិទ្យា និងបញ្ញាសិប្បនិម្មិត (AI) បានចាត់ទុកការវិនិយោគរបស់ក្រុមហ៊ុន Google នេះថាជាការបង្ហាញពីទំនុកចិត្តយ៉ាងរឹងមាំមកលើប្រទេសអង់គ្លេស។
នាយករដ្ឋមន្ត្រីអង់គ្លេស លោក រីស៊ី ស៊ូណាក់ (Rishi Sunak) បានចេញសេចក្តីថ្លែងការណ៍ពាក់ព័ន្ធនឹងការវិនិយោគរបស់ក្រុមហ៊ុន Google នេះថា ការបោះទុនវិនិយោគក្នុងទំហំទឹកប្រាក់១ពាន់លានដុល្លារ នេះជាសក្ខីភាពបង្ហាញថា អង់គ្លេស គឺជាមជ្ឈមណ្ឌលបច្ចេកវិទ្យាប្រកបដោយឧត្ដមភាព និងមានសក្តានុពលយ៉ាងសម្បើមក្នុងការសម្រេចបានកំណើន។
អត្ថបទគួរអាន
ការវិនិយោគថ្មីនេះធ្វើឡើងបន្ទាប់ពីក្រុមហ៊ុន Google បានបោះទុនក្នុងទំហំទឹកប្រាក់១ពាន់លានដុល្លារ ក្នុងឆ្នាំ២០២២ ដើម្បីទិញយកអគារការិយាល័យមួយនៅកណ្តាលទីក្រុងឡុងដ៍ និងទីតាំងមួយកន្លែងទៀតក្បែរនោះ ដែលពេលនេះខ្លួនកំពុងសាងសង់អគារការិយាល័យថ្មី។
ការវិនិយោគថ្មីនេះក៏កើតឡើងតែប៉ុន្មានសប្តាហ៍ផងដែរ បន្ទាប់ពីក្រុមហ៊ុន Microsoft បានបង្ហាញផែនការចាក់បញ្ចូលទុនវិនិយោគក្នុងទំហំ៣,២ពាន់លានដុល្លារ ទៅក្នុងប្រទេសអង់គ្លេសដែរ ក្នុងរយៈពេល៣ឆ្នាំរួមទាំងការបង្កើនសមត្ថភាពសាងសង់មជ្ឈមណ្ឌលរក្សាទុកទិន្នន័យរបស់ខ្លួន ដើម្បីគាំទ្រសេវាកម្ម AI នៅថ្ងៃអនាគតផងដែរ។
លោកស្រី រូត ផូរ៉ាត (Ruth Porat) ប្រធានផ្នែកហិរញ្ញវត្ថុនៅក្រុមហ៊ុន Alphabet បានចេញសេចក្តីថ្លែងការណ៍ថា មជ្ឈមណ្ឌលរក្សាទុកទិន្នន័យថ្មីនេះនឹងជួយបំពេញកំណើនតម្រូវការសេវាកម្ម AI និងសេវាកម្មខ្លោត (Cloud) របស់ខ្លួន ហើយនឹងនាំមកនូវសមត្ថភាពរក្សាទុកទិន្នន័យដ៏មានសារៈសំខាន់ជូនដល់អាជីវកម្មនានានៅទូទាំងចក្រភពអង់គ្លេស ព្រមទាំងជួយបង្កើតការងារផ្នែកសាងសង់ និងបច្ចេកទេសផងដែរ ខណៈបច្ចុប្បន្នក្រុមហ៊ុន Google មានបុគ្គលិកជាង៧ពាន់នាក់រួចទៅហើយនៅក្នុងប្រទេសអង់គ្លេស៕
អត្ថបទ៖ សុខ ជា
None
