ក្រុមហ៊ុនអ្នកតាក់តែងច្បាប់របស់ជប៉ុនបានអះអាងថា នៅពេលនេះ ជប៉ុនកំពុងតែជំរុញនិង ខិតខំប្រឹងប្រែង ក្នុងការទប់ទល់នឹងការថយចុះអត្រាកំណើតរបស់ប្រទេស ដោយការបង្កើនថវិកាទ្វេដងសម្រាប់គោលនយោបាយទាក់ទងនឹងកុមារ សូម្បីតែគេដឹងថា ការជំរុញនេះអាចនឹងត្រូវបានគ្របដណ្តប់ដោយមូលនិធិដែលទាក់ទងនឹងបំណុលសាធារណៈរបស់រដ្ឋាភិបាលក៏ដោយចុះ។
លោកហ៊ីរ៉ូស៊ីហ្គេ ស៊ីកូ (Hiroshige Seko) សមាជិកសភាគណបក្សប្រជាធិបតេយ្យសេរី បាននិយាយនៅក្នុង កម្មវិធីទូរទស្សន៍មួយថា ជប៉ុនអាចនឹងចាត់វិធានការ ដែលមិនធ្លាប់មានពីមុនមកក្នុងការប្រឆាំងនឹងការធ្លាក់ចុះនៃអត្រាកំណើតរបស់ប្រទេសជប៉ុន ។
អត្ថបទគួរអាន
លោកបានឲ្យដឹងថា កម្មវិធីដែលជប៉ុនកំពុងតែគិតគូ ដើម្បីជំរុញអត្រាកំណើតនៅក្នុងប្រទេស ឡើងវិញនោះ គឺមានចាប់តាំងពីមូលនិធិគាំទ្រ ដល់គោលនយោបាយពន្ធ គម្រោងធានារ៉ាប់រង ឬការរួមបញ្ចូលគ្នានៃប្រភពផ្សេងៗ ដើម្បីធ្វើយ៉ាងណាសម្រួលដល់ប្រជាពលរដ្ឋដែលមានកូន ។
អត្រាកំណើតនៅទូទាំងប្រទេសជប៉ុនកាលពីឆ្នាំ២០២២ បានធ្លាក់ចុះដល់កម្រិតតិចជាង ៨០ម៉ឺននាក់ ពោលគឺជាអត្រាកំណើតកាន់តែទាប នៅក្នុងប្រវត្តិរបស់ខ្លួន។
កាលពីខែ មករា កន្លងទៅ លោក Fumio Kishida នាយករដ្ឋមន្ត្រីជប៉ុនបានអះអាងថា រដ្ឋាភិបាលនឹងដាក់ផែនការ ដើម្បីបង្កើនថវិកាទ្វេដងសម្រាប់គាំពារដល់គោលនយោបាយទាក់ទងនឹងអត្រាកំណើតមិនឲ្យហួសខែមិថុនានោះឡើយ៕
អត្ថបទ ៖ សរ សុជាតិ
