ឧត្តមសេនីយ៍ឯក លោក ថូមាស់ ប៊ូសៀអឺរ៍ (Thomas Bussiere) មេបញ្ជាការរងនៃបញ្ជាការដ្ឋានយុទ្ធសាស្ត្រអាមេរិក ដែលមានតួនាទីត្រួតពិនិត្យតាមដានឃ្លាំងអាវុធនុយក្លេអ៊ែរបាននិយាយថា សមត្ថភាពអភិវឌ្ឍនុយក្លេអ៊ែររបស់ចិន ធៀបទៅនឹងការអះអាងជាសាធារណៈរបស់ប្រទេសនេះថាចង់រក្សាការទប់ស្កាត់នុយក្លេអ៊ែរឲ្យនៅតិចបំផុតនោះ គឺមិនត្រូវគ្នានោះឡើយ។
លោក ថូម៉ាស់ បានបន្ថែមថា មានការរកឃើញថា កម្រិតនៃការគំរាមកំហែងពីសំណាក់ប្រទេសចិន ទាក់ទងនឹងអាវុធនុយក្លេអ៊ែរចំពោះអាមេរិក នឹងមានកម្រិតខ្ពស់ជាងការគំរាមកំហែងពីប្រទេសរុស្ស៊ីនាពេលបច្ចុប្បន្ននេះទៅទៀត។
លោកគូសបញ្ជាក់ថា ការអះអាងបែបនេះ មិនមែនផ្អែកទៅលើចំនួនក្បាលគ្រាប់នុយក្លេអ៊ែរដែលក្រុងប៉េកាំងមានស្ដុកទុកប៉ុណ្ណោះទេ ប៉ុន្ដែ វាអាស្រ័យទៅលើរបៀបដែលពួកគេបំពាក់ក្នុងប្រតិបត្តិការតែម្ដង។
បើតាមការអះអាងរបស់មន្ត្រីយោធាជាន់ខ្ពស់អាមេរិករូបនេះ នៅត្រឹមតែប៉ុន្មានឆ្នាំទៀតប៉ុណ្ណោះ សមត្ថភាពអាវុធនុយក្លេអ៊ែររបស់ចិននឹងនាំមុខរុស្ស៊ីជាក់ជាមិនខានឡើង។
អត្ថបទគួរអាន
ការអត្ថាធិប្បាយរបស់មេបញ្ជាការរងនៃបញ្ជាការដ្ឋានយុទ្ធសាស្ត្ររបស់អាមេរិកនេះ គឺធ្វើឡើងខណៈពេលដែលសហរដ្ឋអាមេរិកកំពុងព្យាយាមរៀបចំគោលនយោបាយការបរទេសរបស់ខ្លួនឡើងវិញ ដើម្បីផ្ដោតលើការយកចិត្តទុកដាក់ខ្ពស់នៅក្នុងតំបន់ឥណ្ឌូ-ប៉ាស៊ីហ្វិក ដើម្បីទប់ទល់នឹងកំណើនសេដ្ឋកិច្ច និងយោធារបស់ចិន។
កាលពីដើមខែសីហា គេនៅចាំថា រដ្ឋមន្ត្រីការបរទេសអាមេរិក លោក Antony Blinken បានសម្ដែងការព្រួយបារម្ភយ៉ាងខ្លាំងចំពោះការបង្កើនអាវុធនុយក្លេអ៊ែររបស់ចិន ក្នុងអំឡុងពេលកិច្ចប្រជុំជាមួយរដ្ឋមន្ត្រីការបរទេសនៃបណ្ដាប្រទេសអាស៊ី និង ប្រទេសជាដៃគូ។
យ៉ាងណាក៏ដោយចុះ ខាងភាគីចិនបានចេញមុខតបតវិញថា ឃ្លាំងអាវុធរបស់ខ្លួនមានចំនួនតិចជាងអាមេរិក និងរុស្ស៊ី ហើយខ្លួនបានត្រៀមរួចជាស្រេចសម្រាប់ការសន្ទនា ប៉ុន្ដែ កិច្ចសន្ទនានេះ អាចធ្វើទៅបានលុះត្រាតែទីក្រុងវ៉ាស៊ិនតោនខ្លួនឯង មានការកាត់បន្ថយស្តុកអាវុធនុយក្លេអ៊ែររបស់ខ្លួនមកស្មើនឹងកម្រិតដែលប្រទេសចិនកំពុងតែមាននេះសិន។
យោងតាមទិន្នន័យពីក្រសួងការបរទេសអាមេរិក បានឲ្យដឹងថា អាមេរិកមានក្បាលគ្រាប់នុយក្លេអ៊ែរជាង១ពាន់៣រយ ដែលត្រូវបានដាក់ពង្រាយគិតត្រឹមថ្ងៃទី ០១ ខែមីនាកន្លទៅនេះ៕
None
