ក្រុមអាជីវករលក់សាច់គោ និងសាច់ជ្រូក នៅផ្សារដើមគ បានត្អូញត្អែរពីការធ្លាក់ចុះប្រាក់ចំណូលក្រោយការលក់របស់ពួកគេមានការធ្លាក់ចុះនៅមួយរយៈចុងក្រោយ និងធ្វើឱ្យពួកគេបានកាត់បន្ថយបរិមាណសាច់សម្រាប់លក់ បន្ទាប់ពីមានការធ្លាក់ចុះចំនួនអ្នកទិញ។ ទោះបីមិនបានដឹងពីមូលហេតុជាក់លាក់ តែក្រុមអាជីវករវាយតម្លៃថា ការធ្លាក់ចុះបរិមាណលក់របស់ពួកគេនេះអាចបណ្តាលមកពីពលរដ្ឋជួបបញ្ហាធ្លាក់ចុះប្រាក់ចំណូល ស្របពេលតម្លៃសាច់មានការកើនឡើង។
មិនគ្នាពីក្រុមអាជីវករលក់សាច់នោះទេ ក្រុមអាជីវករលក់បន្លែនៅផ្សារដើមគ ក៏បានត្អូញត្អែរពីការធ្លាក់ចុះប្រាក់ចំណេញ និងបរិមាណលក់នេះផងដែរ។ បញ្ហានេះ ត្រូវបានក្រុមអាជីវករលក់បន្លែហាក់ដាក់បន្ទុកទៅលើការដំឡើងថ្លៃរបស់ឈ្មួញកណ្តាល ដែលឱ្យធ្វើបន្លែដាក់លក់នៅលើទីផ្សារមួយចំនួនបានហក់ឡើងថ្លៃខ្លាំង ដែលធ្វើឱ្យអ្នកទិញមានការរារែកក្នុងការទិញបន្លែទាំងនោះ។
ជុំវិញបញ្ហាការលក់បន្លែត្រីសាច់នៅលើទីផ្សារមានការធ្លាក់ចុះនេះដែរ លោក សេក សុជាតិ អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវយល់ឃើញថា បញ្ហានេះអាចបណ្តាលមកពីប្រជាពលរដ្ឋមានការកាត់បន្ថយការចំណាយ ក្រោយពួកគេជួបបញ្ហាសេដ្ឋកិច្ច និងធ្លាក់ចុះប្រាក់ចំណូល៕
អត្ថបទ៖ បូ ដូឡា,រូបភាព ណុក សាម៉េត
