វៀតណាមកាត់បន្ថយថ្លៃសេវា និងពន្ធលើសេវា៣៥ប្រភេទ ដើម្បីជំរុញកំណើនសេដ្ឋកិច្ច

ដើម្បីរួមចំណែកជួយស្តារ និងអភិវឌ្ឍន៍វិស័យសេដ្ឋកិច្ច ក៏ដួចជាជួយសម្រួលបន្ទុកការលំបាករបស់ប្រជាពលរដ្ឋ ក្រសួងហិរញ្ញវត្ថុរបស់ប្រទេសវៀតណាម នៅឆ្នាំ២០២៣ នេះ បានបន្តដាក់ចេញគោលនយោបាយលើកលែង កាត់បន្ថយ និងពន្យារពេលអនុវត្តពន្ធលើវិស័យ និងសេវាកម្មមួយចំនួន។

បើតាមសារព័ត៌មាន Vietnam News ក្រសួងហិរញ្ញវត្ថុរបស់ប្រជាជាតិ មានប្រជាជនជាង១០០លាននាក់មួយនេះបានសម្រេចកាត់បន្ថយថ្លៃសេវា និងពន្ធលើសេវាកម្មចំនួន៣៥ប្រភេទ នៅក្នុងវិស័យមូលបត្រ ការថែទាំសុខភាព ការកំណត់អត្តសញ្ញាណប្រជាពលរដ្ឋ និងការវាយតម្លៃលើគម្រោងវិនិយោគក្នុងវិស័យសំណង់។

តាមរយៈពេលគោលនយោបាយអនុគ្រោះដែលបានអនុវត្តចាប់ពីខែកក្កដា រហូតដល់ថ្ងៃទី ៣១ ខែធ្នូ ឆ្នាំ២០២៣ បានធ្វើឲ្យរដ្ឋាភិបាលវៀតណាម បាត់បង់ប្រាក់ចំណូលប្រមាណជា៧០០ពាន់លានដុង ឫប្រមាណជាង២៩លានដុល្លារអាម៉េរិក។

បន្ថែមលើគោលនយោបាយនេះ លោក ផាម មីញជិញ (Pham Minh Chinh) នាយករដ្ឋមន្ត្រីវៀតណាម ក៏ទើបដាក់ចេញសារាចរស្តីពីការបន្តអនុវត្តនូវដំណោះស្រាយដើម្បីបង្កើនលទ្ធភាពទទួលបានឥណទាន និងបំបាត់ការលំបាកសម្រាប់សកម្មភាពផលិតកម្ម និងអាជីវកម្ម សំដៅជួយកាត់បន្ថយឧបសគ្គភ្លាមៗដល់ពាណិជ្ជករ លើកកម្ពស់ធនធាន ក៏ដូចជាធ្វើឱ្យប្រសើរឡើងនូវលទ្ធភាពរបស់សេដ្ឋកិច្ចក្នុងការទទួលបាន និងស្រូបយកមូលធនឥណទាន ដើម្បីជំរុញកំណើនដែលជាប់ទាក់ទងនឹងការរក្សាស្ថិរភាពម៉ាក្រូសេដ្ឋកិច្ច។ តាមរយៈសារាចរនោះ លោកនាយករដ្ឋមន្ត្រី បានស្នើដល់ក្រសួងហិរញ្ញវត្ថុលើកលែង និងពន្យារពន្ធកម្រៃ និងថ្លៃសេវារហូតដល់ឆ្នាំក្រោយ។

មូលនិធិរូបិយវត្ថុអន្តរជាតិ បានព្យាករថា នៅឆ្នាំនេះសេដ្ឋកិច្ចវៀតណាមនឹងមានកំណើនក្នុងរង្វង់៤,៧% ប៉ុន្តែសារព័ត៌មានផ្សេងទៀតបានបង្ហើបថា រដ្ឋាភិបាលបានដាក់ចេញនូវយុទ្ធសាស្រ្តជាច្រើន ដោយរួមទាំងពង្រឹងវិធានការប្រឆាំងអំពើពុករលួយ ដើម្បីធ្វើយ៉ាងណាឲ្យកំណើនសេដ្ឋកិច្ចអាចកើនដល់ពី៦ទៅ៦,៥%ឆ្នាំ២០២៤៕

ដោយៈ សរ សុជាតិ