តើមានកត្តាអ្វីខ្លះជំរុញឱ្យវៀតណាមក្លាយជាប្រទេសមានកំណើនទ្រព្យសម្បត្តិលឿនបំផុតលើពិភពលោក?

អ្នកជំនាញសេដ្ឋកិច្ចអន្តរជាតិ បានអះអាងថា វៀតណាមត្រូវបានគេសង្កេតឃើញមានកំណើនទ្រព្យសកម្មយ៉ាងសម្បើមនៅមួយទស្សវត្សរ៍ចុងក្រោយ ដោយសារប្រទេសនេះពង្រឹងជំហររបស់ខ្លួនរហូតក្លាយជាមជ្ឈមណ្ឌលផលិតកម្មពិភពលោក។ ក្រុមហ៊ុនស៊ើបការណ៍ទ្រព្យសម្បត្តិសកលដែលមានឈ្មោះថា New World Wealth បានព្យាករថា វៀតណាមនឹងមានកំណើនទ្រព្យសម្បត្តិដល់ទៅ១២៥% នៅក្នុងរយៈពេល១០ឆ្នាំខាងមុខ ដែលជាកំណើនដ៏លឿនបំផុត។

លោក អេនឌ្រូវ អាមូអ៊ីល (Andrew Amoils) អ្នកវិភាគទ្រព្យសម្បត្តិសាកលមួយរួបបានអះអាងថា វៀតណាម កំពុងក្លាយជាមូលដ្ឋានផលិតកម្មដ៏ពេញនិយមកាន់តែខ្លាំងឡើងៗសម្រាប់ក្រុមហ៊ុនបច្ចេកវិទ្យាពហុជាតិ យានយន្ត អេឡិចត្រូនិក និងក្រុមហ៊ុនវាយនភណ្ឌ។ កំណើនទ្រព្យសកម្មរបស់វៀតណាម គឺនាំមុខទាំងឥណ្ឌាដែលគេរំពឹងថា នឹងក្លាយជាមហាអំណាចសេដ្ឋកិច្ចទីបីរបស់ពិភពលោកនៅឆ្នាំ២០២៧ ដោយឥណ្ឌាទទួលបានកំណើននេះត្រឹមតែចំណាត់ថ្នាក់លេខ២ ជាមួយនឹងកំណើនទ្រព្យសម្បត្តិដែលរំពឹងទុកត្រឹមតែ១១០%។

លោកបានបន្ថែមថា វៀតណាមនៅពេលនេះមានមហាសេដ្ឋីខ្ទង់រាប់ពាន់លានដុល្លារសរុបចំនួន១ម៉ឺន៩ពាន់នាក់ និងមហាសេដ្ឋីលំដាប់រយលាន៥៨នាក់។ វៀតណាមត្រូវបានចាត់ទុកជាប្រទេសដែលមានសុវត្ថិភាព បើធៀបទៅនឹងប្រទេសផ្សេងទៀតនៅក្នុងតំបន់អាស៊ីប៉ាស៊ីហ្វិក ពាក់ព័ន្ធនឹងការវិនិយោគ។

ដោយៈ សរ សុជាតិ