មនុស្សរាប់ម៉ឺននាក់នៅថ្ងៃទី៣០ ខែមេសា ឆ្នាំ២០២៥ បានប្រមូលផ្តុំគ្នានៅតាមផ្លូវនានាកណ្តាលទីក្រុងហូជីមិញ ដើម្បីប្រារព្ធពិធីរំលឹកខួបលើកទី៥០នៃការបង្រួបបង្រួមជាតិរបស់វៀតណាម ដែលសម្រេចបាននៅថ្ងៃទី៣០ ខែមេសា ១៩៧៥ ដែលគេដឹងថាជាថ្ងៃបង្រួបបង្រួមរវាងវៀតណាមខាងជើង និងវៀតណាមខាងត្បូង។ មហាវិថីធំៗនៅកណ្តាលទីក្រុងនេះត្រូវបានបំពេញដោយហ្វូងមនុស្ស ដែលនាំគ្នាមកធ្វើជាសក្ខីភាពនៃការប្រារព្ធពិធីដ៏ឧឡារឹក ដែលមានការចូលរួមពីមន្រ្តី កងកម្លាំងវៀតណាម ចិន កម្ពុជា និងឡាវសរុបប្រមាណ១ម៉ឺន៣ពាន់នាក់។ សម្តេចតេជោ ហ៊ុន សែន ប្រធានព្រឹទ្ធសភាកម្ពុជា ក៏បានចូលរួមជាមួយនឹងថ្នាក់ដឹកនាំបរទេសចំនួន២០រូបផ្សេងទៀតផងដែរ។
នៅក្នុងឱកាសប្រារព្ធពិធីរំលឹកខួបខាងលើ វៀតណាមបានបង្ហាញសក្តានុពលយោធា និងសេដ្ឋកិច្ច ហើយរដ្ឋាភិបាលវៀតណាមបានចំណាយថវិការហូតដល់ទៅ៣២លានដុល្លារ ដើម្បីចែកអំណោយដល់ឥស្សរជន និងប្រជាពលរដ្ឋវៀតណាមដែលមានគុណបំណាច់សម្រាប់ការបង្រួមបង្រួមជាតិនេះ។
លោក តូ ឡឹម អគ្គលេខាធិការបក្សកុម្មុយនីស្តវៀតណាមបានចាត់ទុកព្រឹត្តិការណ៍ថ្ងៃនេះ ជាថ្ងៃប្រវត្តិសាស្ត្រ និងជាជ័យជម្នះនៃស្មារតីស្នេហាជាតិ វីរភាពបដិវត្តន៍ និងឯកភាពជាតិរបស់វៀតណាម។ ជាមួយគ្នានេះ លោក បានថ្លែងអំណរគុណចំពោះការគាំទ្រ និងការផ្តល់ជំនួយពីសហគមន៍អន្តរជាតិ ជាពិសេសពីសហភាពសូវៀត ចិន ឡាវ និងកម្ពុជា។
វៀតណាមរំពឹងថា តាមរយៈព្រឹត្តិការណ៍ដ៏អធិកអធមនេះខ្លួននឹងអាចស្វាគមន៍ភ្ញៀវអន្តរជាតិបានជិត៨០ ម៉ឺននាក់ចន្លោះពីថ្ងៃទី៣០ ខែមេសា ដល់ថ្ងៃទី៤ ខែឧសភា ឆ្នាំ២០២៥។ នៅក្នុងអំឡុងពេលនេះ អាកាសយានដ្ឋានវៀតណាមរំពឹងទាក់ទាញជើងហោះហើរអន្តរជាតិបានប្រមាណ៥ពាន់ជើង ដោយជាមធ្យមប្រមាណ៨៣០ជើងក្នុងមួយថ្ងៃ កើនឡើង២០% បើធៀបនឹងរយៈពេលដូចគ្នាកាលពីឆ្នាំមុន៕
ដោយៈ សរ សុជាតិ
