ប្រទេសវៀតណាម បានសម្រេចដំឡើងពន្ធ ចំនួន ៥ឆ្នាំបន្ថែមទៀតលើ ផលិតផលដែក នាំចូលមកពី ចិន តៃវ៉ាន់ ម៉ាឡេស៊ី ឥណ្ឌូនេស៊ី និងកូរ៉េខាងត្បូង ដែល អត្រាពន្ធថ្មីនេះ មានសុពលភាពរហូតដល់ខែ តុលា ឆ្នាំ ២០២៣។
តាមការបញ្ជាក់ពី ក្រសួងឧស្សាហកម្ម និងពាណិជ្ជកម្មវៀតណាម បានឲ្យដឹងថា ក្រសួងបានធ្វើការស៊ើបអង្កេតអស់រយៈពេលជាច្រើនខែ នឹងបានរកឃើញ ការលក់បង្ខូចថ្លៃទំនិញ បានធ្វើឲ្យប៉ះពាល់ដល់ ផលិតកម្មក្នុងស្រុកយ៉ាងធ្ងន់ធ្ងរ ដែលឈានដល់ ការបិទអាជីវកម្ម និងកាត់បន្ថយកម្មករជាច្រើននាក់។
អត្ថបទទាក់ទង!
អត្រាពន្ធខ្ពស់បំផុត គឺដាក់ទៅលើ ផលិតផលដែកតៃវ៉ាន់ ដែលមានរហូតដល់ ៣៧% ខណៈដែរ ផលិតផលដែកចិន ទទួលរងពន្ធ ៣១% និងកូរ៉េខាងត្បូង ៣៤%។
ក្រសួងឧស្សាហកម្ម និងពាណិជ្ជកម្មវៀតណាម បានបញ្ជាក់ឲ្យដឹងថា ពន្ធនេះ ត្រូវបានអនុវត្តឡើង ដើម្បីការពារ ការខាតបង់ និងផលប៉ះពាល់ដល់ វិស័យឧស្សាហកម្មផលិតដែកក្នុងស្រុក ដែលសឹងតែដួលរលំ ដោយសារតែ ការនាំចូលថោកៗ មកលក់នៅក្នុងវៀតណាម។
ការតដំឡើងពន្ធប្រឆាំងការលក់បង្ខូចថ្លៃនេះ ជាការចាត់វិធានការព្រមានមួយ របស់ រដ្ឋាភិបាលវៀតណាម បន្ទាប់ពី បានរកឃើញភាពមិនប្រក្រតី នៃប័ណ្ណបញ្ជាក់ប្រភពដើម ក្លែងក្លាយជាច្រើន និងការដឹកជញ្ជូនដោយខុសច្បាស់របស់ ក្រុមហ៊ុនជាច្រើន ដែលព្យាយាមគេចពី ការដំឡើង ពន្ធរបស់អាមេរិកនោះ។
សូមជម្រាបដែរថា គិតត្រឹម ៣ត្រីមាសដំបូង ដើមឆ្នាំ ២០១៩នេះ វៀតណាមបាននាំចូលផលិតផលដែក និងដែកថែប សរុបជាង ៧ពាន់លានដុល្លារអាមេរិក ដែលមានការធ្លាក់ចុះ ៣% ធៀបនឹងរយៈពេលដូចគ្នា កាលពីឆ្នាំមុន៕
© 2024 រក្សាសិទ្ធិគ្រប់បែបយ៉ាងដោយ ខេមបូណូមីស។ សម្រាប់ការប្រើប្រាស់ ឬផ្សាយបន្ត សូមទាក់ទងមក អ៊ីម៉េល sothea[at]cambonomist.com ឬទូរស័ព្ទលេខ 089 777 076។
