វៀតណាមនឹងហាមឃាត់ម៉ូតូប្រើឧស្ម័នមិនឱ្យបើកចូលកណ្តាលទីក្រុងហាណូយនៅឆ្នាំក្រោយ

នាយករដ្ឋមន្ត្រីវៀតណាម លោក ផាម មិញឈិញ បានចេញសារាចរមួយកាលពីថ្ងៃទី១២ ខែ កក្កដា ដើម្បីណែនាំឱ្យស្ថាប័នពាក់ព័ន្ធអនុវត្តបម្រាមមិនឱ្យម៉ូតូដែលប្រើប្រាស់ថាមពលឧស្ម័នបើកបរនៅកណ្ដាលរដ្ឋធានីហាណូយនៃប្រទេសវៀតណាម ចាប់ពីខែកក្កដា ឆ្នាំ២០២៦ តទៅដើម្បីរួមចំណែកដល់ផែនការកាត់បន្ថយការបំភាយឧស្ម័ន និងបង្កើនគុណភាពខ្យល់។ នៅត្រឹមឆ្នាំ២០២៨ ការរឹតបន្តឹងនេះនឹងពង្រីករហូតដល់រថយន្ត ហើយនៅត្រឹមឆ្នាំ២០៣០ រដ្ឋធានីហាណូយមានបំណងដាក់កម្រិតយានយន្តឥន្ធនៈហ្វូស៊ីលទាំងអស់មិនឱ្យបើកបរនៅលើផ្លូវជុំវិញតំបន់ជាយទីក្រុងហាណូយ និងផ្លូវហាយវេ និងផ្លូវល្បឿនលឿនដែលតភ្ជាប់ទៅតាមខេត្តជិតខាងរដ្ឋធានីមួយ​​នេះផងដែរ។

ក្រុមមន្ត្រីបាននិយាយថា ផែនការនេះត្រូវបានរៀបចំឡើងដើម្បីប្រែក្លាយទីក្រុងហាណូយទៅជាទីក្រុង ដែលមានការបំភាយឧស្ម័នតិចតួចជាមួយនឹងការផ្លាស់ប្តូរពេញលេញទៅរករថយន្តអគ្គិសនី និងការដឹកជញ្ជូនសាធារណៈស្អាតក្នុងរយៈពេល៥ឆ្នាំខាងមុខ ខណៈទីក្រុងនេះមានភារកិច្ចបញ្ចប់ផែនការតំបន់ដែលមានការបំភាយឧស្ម័នទាប (LEZ) នៅត្រីមាសទី៣ ឆ្នាំ២០២៥ដោយដាក់ចេញពីរបៀបធ្វើទំនើបកម្មមធ្យោបាយធ្វើដំណើរ ពង្រីកហេដ្ឋារចនាសម្ពន្ធសាកថ្ម និងចាកចេញពីការប្រើឥន្ធនៈកខ្វក់។

នៅត្រឹមឆ្នាំ២០៣០ ប្រព័ន្ធដឹកជញ្ជូនសាធារណៈរបស់ទីក្រុងហាណូយ ត្រូវបានគេរំពឹងថា នឹងតភ្ជាប់គ្នាយ៉ាងពេញលេញនៅតាមផ្លូវសំខាន់ៗ សង្កាត់ដែលមានមនុស្សច្រើន និងមជ្ឈមណ្ឌលធ្វើដំណើរសំខាន់ៗដោយប្រើប្រាស់រថយន្តក្រុងអគ្គិសនី និងខ្សែរថភ្លើងក្រោមដី៕

ដោយ៖ សុខ មង្គល