![ក្រុមហ៊ុន Samsung](https://cdn.cambonomist.com/media/images/vtnmchngaoy_Samsung_ykbrtskhlnthvc.2e16d0ba.fill-960x540.jpg)
នាយករដ្ឋមន្ត្រីវៀតណាម លោក ផាម មិញ ជិញ បានកោតសរសើរលោក ផាក ហាក់គ្យូ ប្រធានផ្នែកហិរញ្ញវត្ថុរបស់ក្រុមហ៊ុន Samsung ចំពោះការខិតខំ និងការប្ដេជ្ញាចិត្តរបស់ក្រុមហ៊ុននេះ ដែលបានបន្តដំណើរការពាណិជ្ជកម្ម ក៏ដូចជាការវិនិយោគនៅប្រទេសវៀតណាម។ជាមួយគ្នានេះ នាយករដ្ឋមន្ត្រីវៀតណាម បានអះអាងថា រដ្ឋាភិបាលវៀតណាមជានិច្ចកាលតែងតែយកចិត្តទុកដាក់លើការកែលម្អបរិយាកាសវិនិយោគ ហើយបានសន្យាថា នឹងបង្កើតលក្ខខណ្ឌអំណោយផលសម្រាប់ប្រតិបត្តិការរយៈពេលវែងដល់សហគ្រាសបរទេស ជាពិសេសនឹងបន្តផ្ដល់លក្ខខណ្ឌដ៏ល្អប្រសើរសម្រាប់គម្រោងរបស់ក្រុមហ៊ុន Samsung ដើម្បីដំណើរការប្រកបដោយផ្លែផ្កា និងចីរភាពនៅក្នុងប្រទេសនេះ។
ជាមួយគ្នានេះលោក ផាក ហាក់គ្យូ បានគូសបញ្ជាក់ថា ក្រុមហ៊ុន Samsung បានបណ្តាក់ទុនជាង២២ពាន់លានដុល្លារនៅវៀតណាមរហូតមកដល់ពេលនេះ ហើយគ្រោងបន្ថែមប្រមាណ១ ពាន់លានដុល្លារក្នុងការវិនិយោគរបស់ខ្លួននៅក្នុងប្រទេសអាស៊ីអាគ្នេយ៍មួយនេះរៀងរាល់ឆ្នាំដោយបន្តផ្ដោតលើការស្រាវជ្រាវ អភិវឌ្ឍន៍ ផលិតកម្ម និងការនាំចេញផលិតផលអេឡិចត្រូនិក និងបច្ចេកវិទ្យាទំនើប ព្រមទាំងជួយបណ្តុះបណ្តាលធនធានមនុស្សសម្រាប់ក្រុមហ៊ុនរបស់វៀតណាម និងជួយក្រុមហ៊ុនក្នុងស្រុកឱ្យចូលរួមក្នុងខ្សែច្រវាក់ផលិតកម្ម និងផ្គត់ផ្គង់របស់ខ្លួន។
យ៉ាងណាមិញលោក ផាម មិញជិញ ស្នើឱ្យក្រុមហ៊ុន Samsung បន្តមើលឃើញវៀតណាមជាមូលដ្ឋានយុទ្ធសាស្ត្រសម្រាប់ផលិតកម្ម និងការនាំចេញផលិតផលសំខាន់ៗរបស់ខ្លួនទៅកាន់ទីផ្សារអន្តរជាតិ ជាពិសេសនៅពេលដែលកិច្ចព្រមព្រៀងមួយចំនួនបានចូលជាធរមានដូចជាកិច្ចព្រមព្រៀងគ្រប់ជ្រុងជ្រោយ និងជឿនលឿនសម្រាប់ភាពជាដៃគូអន្តរប៉ាស៊ីហ្វិក (CPTPP) កិច្ចព្រមព្រៀងពាណិជ្ជកម្មសេរីសហភាពអឺរ៉ុប-វៀតណាម (EVFTA) និងកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP)ជាដើម៕
អត្ថបទ៖ សុខ មង្គល